Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

1. By de ghelijckenisse van de maechden, 14. ende talenten, 19. leert Iesus eenen yegelicken zijn beroepinghe volghen, 31. daer na beschrijuende het laetste oordeel, 34. vermaent hy eenen yeghelicken tot wercken der liefde.

A.1

DAn sal het Koninckrijcke der Hemelen gelijck worden thien maechden, ⁺ de welcke hare lampen namen, ende ginghen den Bruydegom te ghemoete.

+ Ghelijckenisse van de maechden.

2

Ende de vijue waren voorsichtich, ende de andere vijue waren dwaes.

3

De dwase namen haer lampen, ende en namen gheen olie met haer.

4

Maer de voorsichtighe namen haer lampen, ende oock olie in hare vaten.

5

Ende doe de Bruydegom vertoefde te komen, werden sy alle slaperich, ende sliepen.

6

Ende ter middernacht wert daer een gheroep: Siet, de Bruydegom koemt, gaet wt hem te ghemoete.

7

Doe stonden alle de maechden op, ende vercierden hare lampen.

8

Ende de dwase seyden tot de voorsichtige: Geeft ons van uwe olie, want onse lampen gaen wt.

9

Doe antwoordden de voorsichtige, seggende: Gheensins, op dat niet ons ende v en ontbreke, Gaet lieuer tot de verkoopers, ende koopt voor v seluen.

B.10

Als sy henen gingen te koopen, quam de bruydegom: ende die bereyt waren, gingen met hem in ter bruyloft, ende de deure wert toegesloten.

11

Daer na komen oock de andere maechden, segghende: Heere heere, doet ons open.

12

Ende hy antwoordde, ende seyde: Voorwaer segghe ick v, ^a ick en kenne v niet.

a Matth. 7.c.23 Luc. 13.c.25

13

^b Daerom waect, want ghy en weet noch den dach noch de vre in de welcke de Sone des menschen komen sal.

b Matth. 24.e.42 Marci 13.d.33 Luce 12.e.40 ende 21.d.34 1.Thess. 5.a.6

14

^c Want het is gelijck een mensche die buyten lants reysende riep syne Dienstknechten, ende gaf hen zijn goet ouer.

c Marci 13.c.34 Luce 19.b.12

25[15]

Den eenen gaf hy vijf ^d talenten, den anderen twee: den derden een: eenen yeghelicken na zijn eyghen vermoghen, ende reysde terstont buyten lants.

d Een Talent mochte zijn ontrent ses hondert gouden kroonen.

16

Doe ginck hy die vijf talenten ontfanghen hadde, leyde die te wercke, ende ^e wan ander vijf talenten.

e Griecx, maeckte

17

Desghelijcx hy die de twee ontfangen hadde,

[fol. 12r]

wan oock andere twee.

18

Maer hy die een ontfangen hadde, ginck henen, ende maecte eenen kuyl in de Aerde, ende verberch het ghelt zijns heeren.

19

Ende na langhen tijt koemt de heere deser Dienstknechten, ende houdt rekenschap met hen.

C.20

Ende die de vijf talenten ontfanghen hadde, ⁺ quam ende bracht noch ander vijf talenten, segghende: Heere, vijf talenten hebstu my gegeuen, ende siet, ander vijue heb ick daer mede gewonnen.

+ De ghetrouwe Dienstknecht.

21

Doe seyde de heere tot hem: Wel goede ende ghetrouwe Dienstknecht, ^f du hebst ouer weynich ghetrouwe gheweest, ouer vele sal ick dy setten: gaet in de vruechde dijns heeren.

f Matth. 24.e.45. Luce 12.e.42

22

Doe quam oock die de twee talenten ontfangen hadde, ende seyde: Heere, du hebst my twee talenten ouerghegeuen, siet, twee andere hebbe ick daer mede ghewonnen.

23

Sijn heere seyde tot hem: Wel goede ende ghetrouwe Dienstknecht, ouer weynich hebstu ghetrouwe geweest, ouer vele sal ick dy setten, gaet in tot de vreuchde dijns heeren.

24

Doe quam hy oock die dat een talent ontfanghen hadde, ⁺ ende seyde: Heere, ick kende dy dat du een hardt man bist, maeyende daer du niet ghesaeyt en hebst, ende vergaderende daer du niet ghestroyt en hebst:

+ De ongetrouwe Dienstknecht.

25

Ende ick vreesende, ghinck henen ende verberchde dijn talent in de Aerde, Siet daer, du hebst dat dyne is.

26

Doe antwoordde zijn heere, ende seyde tot hem: Du boose ende traghe knecht, du wistest dat ick maeye daer ick niet ghesaeyt en hebbe, ende vergadere daer ick niet ghestroyt en hebbe.

27

So moestu dan mijn gelt den wisselaers ghedaen hebben, ende ick komende, hadde het myne ontfanghen met woecker.

28

Daerom neemt dat talent van hem, ende geeft het hem die thien talenten heeft.

29

^g Want een yeghelick die daer heeft, dien sal ghegheuen worden, ende hy sal oueruloedich hebben: Ende wie niet en heeft, van dien sal oock het ghene dat hy heeft, wech ghenomen worden.

g Matth. 13.b.12 Marci 4.c.24 Luce 8.b.18 ende 9.c.26.

D.30

Ende den onnuten Dienstknecht worpt wt in de wterste duysternisse, ^h daer sal wesen weeninghe ende knersselinghe der tanden.

h Matth. 8.b.12 ende 3.e.42 ende 22.b.13 ende 24.f.51 Luce 13.c.28

31

ⁱ Ende als de Sone des menschen sal komen in zijn eerlicheyt, ende alle syne heylighe Engelen met hem, dan sal hy sitten op den throon zijnder heerlicheyt. ⁺

i Matth. 16.c.27. ende 26.g.64. Marci 14.g.62 Luce 21.c.27 Act. 1.b.11 1.Thess 4.b.16 2.Thess. 1.b.10 Apoca. 1.a.7

+ Wterste oordeel.

32

Ende alle volcken sullen voor hem vergadert worden, ^k ende hy salse van een ander scheyden, ghelijck de Herder de Schapen van de bocken scheydt.

k Ezech. 34.c.20

33

Ende de schapen sal hy te syner rechter hant setten, ende de bocken te syner slincker hant.

34

Dan sal de Koninck segghen tot de ghene die te zijnder rechter hant zijn sullen, Koemt ghy geseghende mijns vaders, ⁺ besit dat Koninckrijcke dat ^l v bereyt is vanden beghinne der werelt.

+ Gheseghende.

l Matth. 20.c.23 Marci 10.e.40

35

^m Want ick ben hongherich gheweest, ende ghy hebt my gespijst: Ick ben dorstich geweest, ende ghy hebt my te drincken ghegheuen: ⁿ Ick was een vreemdelinck, ende ghy hebt my gheherbercht:

m Esai. 58.a.7 Ezech. 18.a.7

n Heb. 13.a.2

36

Ick was naeckt, ende ghy hebt my bekleedt: ^o Ick ben kranck gheweest, ende ghy hebt my besocht: ^p Ick ben gheuanghen gheweest, ende ghy zijt tot my ghekomen.

o Eccle. 7.d.36

p 2.Timot. 1.b.16

37

Dan sullen hem de rechtueerdighe antwoorden, ende segghen: Heere, wanneer hebben wy dy hongherich ghesien, ende hebben dy ghespijst: ofte dorstich, ende hebben dy te drincken ghegheuen?

38

Ende wanneer hebben wy v een vreemdelinck ghesien, ende hebben dy gheherbercht? of naect, ende hebben dy bekleedt?

39

Of wanneer hebben wy dy kranck, of in de gheuanckenisse ghesien, ende zijn tot dy ghekomen?

E.40

Ende de Koninck sal antwoordden, ende hen segghen: Voorwaer segghe ick v: ^q So wat ghy eenen van desen mynen minsten broederen ghedaen hebt, dat hebt ghy my ghedaen.

q Matth. 10.e.42 Marci 9.e.41 Ioan. 13.c.20 Prouerb. 14.d.31

41

Dan sal hy oock segghen tot de ghene die ter slincker handt zijn sullen, ^{+ r} Gaet wech van my ghy veruloecte, ^s in dat eewige vyer, dat bereyt is den Duyuel, ende synen Engelen.

+ Veruloeckte.

r Psalm. 6.a.9 Matth. 7.c.23 Luce 13.c.25

s Esai. 30.d.33 Apocal. 19.c.20

42

Want ick ben hongherich geweest, ende ghy en hebt my niet te eten ghegheuen: Ick ben dorstich geweest, ende ghy en hebt my niet te drincken ghegheuen.

43

Ick was een vreemdelinck, ende ghy en hebt my niet geherbercht: ick was naect, ende ghy en hebt my niet bekleedt: ick was kranck, ende in de geuanckenisse, ende ghy en hebt my niet besocht.

44

Dan sullen sy oock hem antwoordden, ende segghen: Wanneer hebben wy dy hongherich, of dorstich, of een vreemdelinck, of naeckt, of kranck, oft in de gheuanckenisse ghesien, ende en hebben dy niet ghedient?

45

Dan sal hy haer antwoordden ende segghen: ^t Voorwaer segghe ick v, wat ghy eenen van desen minsten niet ghedaen en hebt, dat en hebt ghy oock my niet ghedaen.

t Zach. 2.a.8 Exod. 14.d.31 ende 17.a.5

46

^u Ende dese sullen gaen in de eewighe pijne, ende de rechtueerdighe in dat eewighe leuen.

u Dan. 12.a.2 Ioan. 5.c.29