Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

1. Christus vermaent de syne tot ootmoedicheyt: 6. verbiedt yemant te ergeren, 10. thoont wat sorge God voor de syne draecht, 15. Ende gheeft een wyse om de sondaers te straffen in de Gemeynte, 18. ende macht om te binden ende te ontbinden, 23. verdoemt by een ghelijckenisse alle eyghen wrake.

A.1

TE ^a dier seluer vre ginghen de Discipulen tot Iesum, ⁺ segghende: Wie is de meeste int Koninckrijcke der Hemelen?

a Marci 9.d.32 Luce 9.e.46 ende 22.c.24

+ De meeste int Konincrijcke der Hemelen.

2

Ende Iesus een kindeken tot hem gheroepen hebbende, stelde dat midden onder hen,

3

Ende seyde: Voorwaer segghe ick v, ^b ten zy dat ghy v bekeert, ende wort als de kinderkens, so en sult ghy in het Konincrijcke der Hemelen niet komen.

b Matth. 19.b.14 1.Corint. 14.c.20 1.Petr. 2.a.2

4

^c Daerom, ⁺ so wie hemseluen vernedert ghelijck dit kindeken [is] dese is de grootste int Koninckrijcke der Hemelen.

c Iacobi 4.b.10 1.Petr. 5.a.6

+ Oodtmoedicheydt.

5

^d Ende so wie sulck een kindeken ontfangt in mynen name, die ontfangt my.

d Marci 9.d.37 Luce 9.e.48 Ioan. 13.c.20

6

^e Ende so wie een van desen kleynen die aen my gheloouen vererghert, het ware hem beter dat eenen ^f grooten molensteen aen synen hals ghehanghen worde, ende dat hy verdroncken worde in de diepte der Zee.

e Marci 9.e.42 Luce 17.a.2

f Griecx, Ezelmolensteen.

7

Wee der werelt van de erghernissen: ^g want het is noodich dat erghernissen komen: Nochtans wee dien mensche, door den welcken erghernisse koemt.

g 1.Corint. 11.b.19

8

^h Indien dijn hant, oft dijn voet dy ⁱ erghert, snijdtse af, ende worptse wech van dy, want het is dy beter totten leuen in te gaen kreupel oft lam zijnde, dan twee handen oft twee voeten hebbende, in dat eewige vyer geworpen te worden.

h Deut. 13.a.6 Matth. 5.d.30 Marci 9.e.43 Roma. 16.b.17

i Ofte, maeckte struyckelen,

9

Ende so dijn ooghe dy erghert, steecktse wt, ende worptse wech van dy: want het is dy beter met eener ooge tot den leuen in te gaen, dan twee ooghen hebbende in dat helsche vyer gheworpen te worden.

B.10

Siet toe dat ghy niet een van desen kleynen veracht: ⁺ Want ick segghe v, ^k dat hare Enghelen in de Hemelen altijdt sien het aenghesichte mijns Vaders die in de Hemelen is.

+ Kinderen.

k Psalm. 34.a.8

11

^l Want des menschen Sone is ghekomen om salich te maken dat verloren was. ⁺

l Luce 19.b.10

+ Christus Salichmaker.

12

^m Wat dunct v, of een man hondert schapen heeft, ende een vanden seluen verdwaelt is, en sal hy niet de neghen ende tnegentich verlaten, ende gaen op de berghen, om dat dwalende te soecken?

m Luce 15.a.3

13

Ende indien het gheschiet, dat hy het vindt, voorwaer segge ick v, hy verblijt hem meer daer ouer, dan ouer de neghen ende tneghentich die niet ghedwaelt en hebben.

14

Als en ist niet den wille uwes Vaders die in de Hemelen is, dat een van dese kleyne verloren gae.

15

ⁿ Maer in dien dijn broeder aen dy sondicht, ⁺ so gaet henen ende straft hem tusschen dy ende hem alleene: in dien hy dy hoort, so hebstu dynen broeder ghewonnen.

n Luce 17.a.3 Iacobi 5.b.19 Leuit. 19.b.17 Prouerb. 17.b.10 Syrach 19.b.13

+ Straffe.

16

Ende indien hy [dy] niet en hoort, so neemt noch eenen oft twee met dy: ^o op dat alle woort besta inden mont van twee oft drye ghetuygen.

o Num. 35.d.30 Deut. 17.a.6 ende 19.b.15 Ioan. 8.b.17 2 Corinth. 13.a.1 Heb. 10.c.28

17

In dien hy hen gheen ghehoor en gheeft, ^p so segt het der Ghemeynte: ende in dien hy oock der Ghemeynte gheen ghehoor en gheeft, ^q so houdt hem als een Heyden ende Tollenaer.

p 2 Thess. 3.b.14

q 1 Corin. 5.a.8

18

^r Voorwaer ick segghe v, ⁺ wat ghy op der Aerden binden sult, dat sal inden Hemel gebonden wesen: ende wat ghy op der Aerden ontbinden sult, dat sal inden Hemel ontbonden wesen.

r Matth. 16.b.19 Ioan. 20.c.23

+ De ban.

19

Wederomme segghe ick v, dat, ⁺ so daer twee onder v eens zijn op der Aerden van eenich dinck dat sy begheeren sullen, dat sal hen gheschieden van mynen Vader die in de Hemelen is.

+ Voor den broeder bidden om ghenade.

C.20

^s Want waer twee oft drye vergadert zijn in mynen name, daer ben ick midden onder hen.

s Luce 24.b.15.d.36

21

Doe trad Petrus tot hem, ende seyde: ⁺ Hoe menichmael sal ick mynen broeder vergeuen als hy aen my sal sondighen? ^t Tot seuenmael?

+ Den bekeerenden broeder moetmen altijt vergheuen.

t Luce 17.a.4

22

Iesus seyde hem: Ick en segghe dy niet tot seuenmael, maer ^u tot tseuentich mael seuenmael.

u Matth. 6.b.14 Marci 11.c.25 Coloss. 3.b.13 Syrach 28.a.2

23

Daeromme is het Konincrijcke der Hemelen vergeleken eenen Koninck, die daer rekenschap met syne Dienaren houden wilde.

24

Ende doe hy begonst te rekenen, wert hem

[fol. 9r]

een schuldenaer toeghebracht die hem schuldich was thien duysent talenten.

25

^x Ende als hy niet en konde betalen, beual zijn heere datmen hem soude verkoopen, ende zijn wijf, ende syne kinderen, ende al wat hy hadde, ende de schult betalen.

x Matth. 5.c.25

26

So viel dan de Dienstknecht neder, ende aenbadt hem, seggende: Heere, weest lanckmoedich ouer my, ende ick salt dy betalen.

27

Ende de heere deses Dienstknechts beroert zijnde met barmherticheyt, heeft hem los ghelaten, ende de schult quijt ghescholden.

28

Maer als de Dienstknecht wtghegaen was, heeft hy geuonden eenen syner mededienstknechten, die hem hondert penningen schuldich was: dien greep hy, ende track hem byder kelen, segghende: Betaelt dat du schuldich bist.

29

So viel dan zijn mededienstknecht voor syne voeten neder, ende badt hem, segghende: Weest lanckmoedich ouer my, ende ick salt dy al betalen.

D.30

Ende hy en wilde niet: maer ginck ende wierp hem inden karcker, tot dat hy de schult soude betaelt hebben.

31

Als syne mededienstknechten gesien hadden dat daer gheschiet was, zijn sy seer bedroeft gheworden: ende als sy ghekomen waren, verklaerden sy haren heere al dat gheschiet was.

32

Doe riep hem zijn heere, ende seyde hem: Du boose Dienstknecht, alle dese dyne schult hebbe ick dy quijt ghescholden, om dat du my ghebeden hebst.

33

Behoordestu oock dynes mededienstknechts niet te ontfermen, ghelijck ick oock dyner ontfermt hebbe?

34

Ende zijn heere toornich zijnde, leuerde hem den pijnders ouer, tot dat hy alle de schult soude betaelt hebben.

35

^y Also sal oock mijn Hemelsche Vader v doen, ten zy dat ghy van herten vergheeft een yeghelick synen broeder zijn misdaet.

y Matth. 6.b.15 Marci 11.c.26 Iacobi 2.b.13