Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

1. Ioannes gheuanghen zijnde, sendt syne discipulen tot Iesum, 7. de welcke Ioannem ghepresen hebbende, 16. dreycht ende verdoemt de verachters zijns woorts, 25. daer na God danckende, 27. verklaert wat macht hy van hem heeft.

A.1

ENde het is gheschiet doe Iesus gheeyndicht hadde synen twaelf discipulen geboden te gheuen, ⁺ ginck hy van daer voort om te leeren ende te prediken in hare steden.

+ Christus predickt.

2

^a Ende Ioannes in de gheuanckenisse ghehoort hebbende de wercken Christi, ⁺ sandt twee van syne discipulen,

a Luc. 7.b.18

+ Ioannes sendt tot Christum.

3

Ende seyde tot hem: Bistu de ghene die komen soude, of verwachten wy eenen anderen?

4

Iesus antwoordde ende seyde hen: Gaet ende bootschapt Ioanni wat ghy hoort ende siet.

5

^b De blinde sien, de kreupele wandelen, de malaetsche zijn gereynicht, ende de dooue hooren, de doode zijn opgheweckt, ende de arme ontfanghen dat Euangelium.

b Esai. 29.b.18 ende 35.a.5 ende 61.a.1

6

Ende ^c salich is hy die aen my niet gheergert en wordt. ⁺

c ofte, gheluckich

+ Christi ghetuyghenisse van Ioanne.

7

^d Ende doese wech gingen, begonst Iesus tot de scharen te segghen van Ioanne, Wat zijt ghy wtghegaen in de woestijne te sien? een riet dat van den winde gheroert wort?

d Luc.7.c.24

8

Maer wat zijt ghy wtghegaen te sien? Eenen mensche met saechten kleederen bekleedt? siet die saechte kleederen dragen, zijn in der Koninghen huysen.

9

Maer wat zijt ghy wtghegaen te sien? Eenen Propheet? Ia ick segghe v, oock meerder dan een Propheet.

B.10

Want dese isset van welcken gheschreuen is, ^e Siet ick sende mynen Enghel voor dijn aenghesichte, die dynen wech bereyden sal voor dy.

e Malach. 3.a.1 Marc.1.a.2 Luc. 7.c.27

11

Voorwaer ick segghe v, onder de ghene die van vrouwen gheboren zijn, is niemant opghestaen die grooter zy dan Ioannes de Dooper: nochtans die de minste is in het Koninckrijcke der Hemelen, is meerder dan hy.

12

^f Ende van de dagen Ioannis des doopers aen tot nu toe, lijdt het Koninckrijcke der Hemelen gewelt, ende die gewelt doen, die nemen het in.

f Luc. 16.b.16

13

Want alle de Propheten ende de Wet, ⁺ hebben tot Ioannem ghepropheteert.

+ De Wet ende Propheten.

14

^g Ende so ghy het wilt aennemen, ⁺ hy is Elias die komen soude.

g Malach. 4.a.5 Luc. 1.b.13

+ Elias.

15

Wie ooren heeft om te hooren, die hoore.

16

Maer wien sal ick dit gheslachte ghelijcken? Het is ghelijck de kinderen die op de marckten sitten, ende tot hare ghesellen toeroepen,

17

Seggende: Wy hebben v metter fluyte ghespeelt, ende ghy en hebt niet gedanst: wy hebben v klaechlieden ghesonghen, ende ghy en hebt niet gheweent.

18

^h Want Ioannes is gekomen niet etende noch drinckende: ⁺ ende sy seggen, Hy heeft den duyuel.

h Matth. 3.a.4 Marc. 1.a.6

+ Christus ende Ioannes.

19

De Sone des menschen is gekomen etende ende drinckende, ende sy seggen, Siet daer een mensche die een vraet, ende wijnsuyper is, ende een vrient der tollenaren ende sondaren. Nochtans is de wijsheyt gherechtueerdicht gheweest van hare kinderen.

C.20

ⁱ Doe heeft hy den steden daer syne krachten veel gheschiet waren, ⁺ begonnen [aldus] te verwijten, om dat sy haer niet bekeert en hadden:

i Luc. 10.b.13

+ Christus verwijt den ongeloouigen steden.

21

Wee dy Chorazin, wee dy Bethsaida: want hadden in [de steden] Tyro ende Sidon de krachten ghedaen gheweest, die in v ghedaen zijn, sy hadden voortijden in den ^k sacke ende asschen [sittende] haer bekeert.

k De Ioden als sy groot leet thoonen wilden, kleedden henseluen met sacken, ende bestroyden henseluen met asschen.

22

Doch segge ick v, Het sal Tyro ende Sidon verdragelicker wesen inden dach des oordeels dan v.

23

Ende du Capernaum, die du tot den Hemel verheuen hebst gheweest, du salt totter Hellen vernedert worden: Want ^l hadden onder de Sodomiten die krachten gedaen geweest die in dy gedaen zijn, sy waren tot op desen dach ghebleuen

l 2.Sam. 13.b.19 1 Reg. 20.d.32 Gene. 19.c.24 Ezech. 16.e.49

24

Doch segghe ick v, het sal den lande van Zodoma verdraghelicker zijn inden dach des oordeels, dan dy. ⁺

+ Christus danct den Vader voor de geloouighe.

25

^m Te dier seluer tijt antwoordde Iesus, ende seyde: Ick ⁿ dancke dy Vader Heere des Hemels ende der Aerden, dat du dese dingen voor de ^o Wijse ende verstandighe verborgen hebst, ende hebst de selue den kleynen gheopenbaert.

m Luc. 10.c.21

n Oft, loue

o Iob 5.b.12 Esai. 29.b.14 Luc. 10.c.21 2.Corinth. 1.b.19 ende 2.a.7

26

Ia Vader, want het heeft dy also behaecht.

27

^p Alle dinck is my ouergegeuen van mynen Vader. ^q ende niemant kent den Sone dan de Vader: Noch den Vader kent niemandt, dan de Sone, ende dien het de Sone sal willen openbaren.

p Matth. 28.b.18 Luce 10.c.22 Ioan. 3.d.35

q Ioan. 6.e.46 ende 7.c.29 ende 8.b.19 ende 10.b.15

28

Koemt tot my alle die vermoeyt ende beladen zijt, ende ick sal v verquicken.

29

Neemt mijn iock op v, ende leert van my dat ick saechtmoedich ben, ⁺ ende ootmoedich van herten: ^r ende ghy sult ruste vinden voor uwe zielen.

+ Christus roept eenen yegelicken tot hem.

r Iere. 6.b.16

30

^s Want mijn iock is ^t lieflick, ende mijn last is licht.

s 1.Ioan. 5.a.3

t oft, niet hardt