Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Men sal niet lichtueerdelick oordeelen, 6. De heylighe dinghen salmen wijsselick bedienen, 7. Men sal bidden, soecken, cloppen, 15. ende wtteeckenende de valsche Propheten, 21. beueelt hy de bedieninghe zijns woorts.

A.1

OOrdeelt ^a niet, ⁺ op dat ghy niet gheoordeelt en wort.

a Luc. 6.d.37 Roma 2.a.1 1.Corinth. 4.a.5

+ Oordeelen.

2

^b Want met sulcken oordeel als ghy oordeelt, sult ghy gooordeelt worden: Ende met sulcker mate als ghy meet, sal v wederom ghemeten worden.

b Marce 2.c.25 Luce 6.d.38.

3

^* Ende waerom aensietstu de splinter in dijns broeders ooghe: ende den balck in dyne ooghe bemerckestu niet?

* Luce 6.e.41.

4

Of hoe segtstu tot dynen broeder: Laet my dat splinter wt dijn ooghe worpen: ende siet, in dijn ooghe is eenen balck?

5

^c Du gheueynsde, worpt eerst dien balck wt dijn ooghe: ende dan salt du besien om den splinter wt dijns broeders ooghe te worpen.

c Prouerb. 18.b.17

6

^d En gheeft het heylighe den honden niet, noch en worpt oock uwe Peerlen voor de swijnen niet: op dat sy de selue met hare voeten niet en vertreden, ende henseluen ommekeerende, v verscheuren.

d Prouerb. 9.a.8 ende 23.a.9

7

^e Biddet, ⁺ ende v sal ghegeuen worden: soeckt ende ghy sult vinden: klopt, ende v sal gheopent worden.

e Matth. 21.c.22 Marce 11.c.24 Luce 11.a.9 Ioan. 14.b.13 ende 16.c.24 Iacob. 1.a.6 1.Ioan. 3.c.22 ende 5.b.14 Ierem. 29.b.12

+ Bidden.

8

Want wie daer bidt, die ontfangt: ^* ende wie soect, die vint: ende den ghenen die klopt sal op ghedaen worden.

* Prouer. 8.b.17.

9

Isser onder v een mensche, den welcken, so hem zijn sone bidt om broodt, sal hy hem eenen steen gheuen?

B.10

Of so hy hem om visch bidt, sal hy hem een slanghe gheuen?

11

Indien ghy dan ^f die boos zijt, weet uwen kinderen goede gauen te gheuen: hoe veel te meer sal uwe Vader die in de Hemelen is, goede gauen gheuen den ghenen diese van hem begheeren?

f Gene. 6.a.5 ende 8.c.21

12

^g Hierom, al wat ghy wilt dat v de menschen doen sullen, doet ghy hen dat oock: want dat is de Wet ende de Propheten.

g Luc. 6.d.31 Tob. 4.b.16

13

^h Gaet in door de enghe poorte: want de poorte is wijdt, ende den wech is breedt, die tot der verdoemenisse af leydt, ende vele zijnder die door de selue ingaen.

h Luce 13.c.24

14

ⁱ Want de poorte is enghe, ende de wech is smal, die tot den leuen leydt, ende luttel zijnder die hem vinden.

i 4.Esd. 7.a.7 ende 9.b.15

15

^k Wacht v voor de valsche Propheten, die in schaeps kleederen tot v komen, maer inwendich zijn grijpende Woluen.

k Deut. 13.a.3 Ierem. 23.b.16 Matth. 24.a.4 Roma. 16.b.17 Ephe. 5.a.6 Coloss. 2.a.8 1.Ioan. 4.a.1

16

Aen hare vruchten sult ghyse kennen. Kanmen wijndruyuen van de doornen lesen, of vijghen van de dijstelen?

17

^l Also een yeghelick goet boom ^m draecht goede vruchten: ende de verdoruen boom draecht quade vruchten.

l Matth. 12.c.23

m Griecx, maeckt

18

Een goet boom en kan geen quade vruchten draghen: noch eenen verdoruen boom goede vruchten.

19

ⁿ Een yegelick boom die gheen goede vruchten draecht, wort af ghehouwen, ende int vyer gheworpen.

n Matth. 3.b.10 Luce 3.a.9 Ierem. 11.b.16

C.20

Daerom so sult ghyse aen hare vruchten bekennen.

21

^o Niet een yeghelick die tot my seyt: Heere, Heere, sal int Koninckrijcke der Hemelen komen: maer die daer doet den wille mijns Vaders die in de Hemelen is.

o Matth. 25.b.11 Luce 6.e.46 ende 13.c.23 Roma. 2.b.13 Iacobi 1.c.22 Act. 19.b.13

22

^p Vele sullen te dien daghe tot my segghen: Heere, Heere, en hebben wy niet door dynen naem ghepropheteert, ende door dynen naem Duyuelen wtgheworpen, ende door dynen naem veel ^* krachten ghedaen?

p Ierem. 14.b.14 ende 27.b.15 Luce 13.c.23

* Oft, krachtighe daden

23

Ende dan sal ick hen belijden: ^q Ick en hebbe v noyt ghekent: ^r Wijcket wech van my ghy die ongherechticheyt doet.

q Matth. 25.b.12

r Matth. 25.e.41 Luce 13.c.25 Psalm. 6.a.9

24

^s Daerom so wie dese myne woorden hoort, ende de selue doet, dien sal ick eenen voorsichtighen manne ghelijcken, die zijn huys op een steenrotse ghetimmert heeft.

s Ierem. 17.a.8 Luce 6.e.47 Roma. 2.b.13 Iacobi 1.c.23

25

Ende daer is plasregen gheuallen, ende daer zijn waterstroomen ghekomen, ende de winden hebben ghewaeyt, ende zijn tegen dat huys gheuallen: ende het en is niet gheuallen, want het was op een steenrotse ghefondeert.

26

^t Ende so wie dese myne woorden hoort, ende de selue niet en doet, die sal eenen dwasen manne gheleken worden, die zijn huys op het zandt ghetimmert heeft:

t Roma. 2.b.13 Iacobi 1.c.23 Ezech. 31.b.11

27

Ende daer is plasreghen gheuallen, ende de waterstroomen zijn ghekomen, ende de winden hebben ghewaeyt, ende teghen dat huys gheslaghen, ende het is geuallen, ende synen val is groot gheweest.

28

^u Ende het is gheschiet doe Iesus dese woorden gheeyndicht hadde, so werden de scharen verschrickt ouer zijn leere.

u Marc. 1.b.22 ende 6.a.2 Luce 4.d.32

29

Want hy leerdese als macht hebbende, ende niet als de Schriftgheleerde.