Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hoemen sal aelmoessen doen, 5. ende bidden, 16. ende vasten, 25. ende zijn betrouwen also op God setten, 33. dat gheen aerdsche sorchuuldicheyt synen dienst en verhindere.

A.1

SIet toe dat ghy uwe aelmoessen niet en doet voor de menschen om van hen gesien te worden: ⁺ anders, so sult ghy geenen loon hebben by uwen Vader die in de Hemelen is.

+ Aelmoessen.

2

Daerom wanneer du aelmoessen doest, doet gheen trompet voor dy blasen, ghelijck de gheueynsde doen in hare vergaderingen ende op de straten om van de menschen gheeert te worden: voorwaer segghe ick v, sy ontfangen haren loon.

3

^a Maer als du aelmoessen doest, so laet dijn slincker hant niet weten, wat dijn rechter handt doet:

a Rom. 12.a.8

4

Op dat dijn aelmoesse verborghen zy: ende dijn Vader diet int verborghen aensiet, ^b salt dy int openbaer vergelden.

b Luc. 14.b.14

5

Ende wanneer du biddest, ⁺ so weest niet gelijck de gheueynsde: want die begheeren in de vergaderinghen ende op de hoecken der straten te bidden, om van de menschen gesien te worden: voorwaer segghe ick v, sy ontfanghen haren loon.

+ Ghebet.

6

^c Maer als du biddest, gaet in dijn secreetcamer, sluyt dijn deure toe, ende bidt dynen vader die int verborghen is: ende dyn vader die int verborgen siet, salt dy int openbaer verghelden.

c 2.Reg. 4.d.33 Act. 10.a.4

7

^d Ende als ghy bidt so weest niet veel sprekende, ghelijck de Heydenen: want sy meynen door haer veel spreken verhoort te worden.

d 1 Reg. 18.c.28 Esai. 1.b.15

8

Werdet dan den desen niet gelijck: want uwe Vader weet wat v van noode is, eer ghy hem bidt.

9

^e So sult ghy dan aldus bidden: Onse Vader die du in de Hemelen bist, Dijn naem worde geheylicht.

e Luc. 11.a.2

B.10

Dijn rijcke kome. Dijn wille gheschie op der Aerden ghelijck in den Hemel.

11

Onse dagelicksche broot gheeft ons huyden.

12

Ende vergeeft ons onse schulden, gelijck wy oock onse schuldenaren vergheuen.

13

Ende leyt ons niet in versoeckinge, maer verlost ons van den ^f boosen. Want dijn is het rijcke, ende de macht, ende de eerlickheyt inder eeuwicheyt. Amen.

f Matth. 13.b.19

14

^g Want indien ghy den menschen hare misdaden vergheeft: ⁺ so sal v oock uwe hemelsche Vader vergheuen.

g Marc. 11.c.25 Syrach 28.a.2 Colos. 3.b.13 18.d.35

+ Synen naesten vergheuen.

15

^h Maer indien ghy den menschen hare misdaden niet en vergheeft: so sal oock uwe hemelsche Vader uwe misdaden niet vergheuen.

h Matth. 18.d.35 Iacob. 2.b.13

16

ⁱ Ende als ghy vast, ⁺ weest niet droeuich siende gelijck de geueynsde: want sy verstellen haer aensichten, om dat sy den menschen souden schijnen te vasten. Voorwaer ick segghe v, sy ontfanghen haren loon.

i Esai. 58.a.3 Matth. 9.b.14 Marce 2.b.18 Luce 5.d.33

+ Vasten.

17

Maer als du vastest, so salft dijn hooft, ende wascht dijn aensicht.

18

Op dat du den menschen niet en schijnest te vasten, maer dynen Vader die int verborgen is: ende dijn Vader die int verborghen siet, salt dy int openbaer verghelden.

19

^k Vergadert v gheen schatten op der Aerden, ⁺ daer de motte ende de roest schendet, ende daer de dieuen doorgrauen ende stelen.

k Syrach 29.b.13 Prouer. 23.a.4 Iacob. 5.a.1 Hebr. 5.a.5

+ Schat.

C.20

^l Maer vergadert v schatten in den Hemel, daer noch de motte noch de roest niet en schendet, ende daer de dieuen niet doorgrauen noch stelen.

l Luc. 12.d.33 1.Timoth. 6.b.19

21

Want waer uwe schat is, daer sal oock uwe herte zijn.

22

^m De keerse des lichaems is de ooghe: Indien dan dijn ooghe eenuoudich is, so sal geheel dijn lichaem luchtich wesen.

m Luce 11.d.34

23

Maer indien dijn ooge boos is, so sal geheel dijn lichaem duyster wesen. Indien dan het licht dat in dy is, duysterheyt is, hoe groot sal dan die duysternisse wesen.

24

ⁿ Niemant kan tween Heeren dienen: want of hy sal den eenen haten, ende den anderen lief hebben: of hy sal den eenen aenhanghen, ende den anderen verachten, ghy kont niet Gode dienen ende den Rijckdom.

n Luc. 16.b.13

25

Hieromme segghe ick v: ^{+ o} sorcht niet voor uwe ^p leuen, wat ghy eten ende drincken sult: noch voor uwe lichaem, waermede ghy v kleeden sult: Is niet het leuen meer dan de spijse, ende het lichaem meer dan de kleedinghe?

+ Sorchfuldicheydt.

o Luce 12.c.22 Philip. 4.a.6 1.Timot. 6.a.8 1.Petr. 5.a.7 Psalm. 55.c.23

p Griecx, ziele,

26

^q Aensiet de voghelen des Hemels: want sy saeyen niet noch maeyen niet, noch sy vergaderen niet in de schuren: ende uwe hemelsche Vader voetse: en gaet ghy die niet veel te bouen?

q Iob 39.a.3 Psalm. 147.a.9

27

Wie isser doch van v, die sorchuuldelick denckende, soude konnen een elle tot zijn grootte doen?

28

Ende wat zijt ghy sorchuuldich voor kleedinge? Leert van de Lelien op de Velden, hoe sy wassen, sy ^r en arbeyden niet, noch spinnen niet:

r ofte, worden niet vermoeyt,

29

Nochtans segghe ick v, dat oock Salomon in alle syne eerlickheyt so niet bekleedt en is gheweest, ghelijck een van dien.

D.30

Indien dan God het gras des veldts, dat heden is, ende morghen in den ouen gheworpen wort, also bekleet, sal hy v niet veel meer doen, O ghy kleyn gheloouighe?

31

Daerom weest niet sorchuuldich, segghende: Wat sullen wy eten, of wat sullen wy drincken, of waer van sullen wy bekleedt zijn?

32

Want alle dese dinghen soecken de Heydenen. Want uwe hemelsche Vader weet dat ghy alle dese dinghen van noode hebt.

33

^s Maer soeckt eerst het rijcke Gods, ende zijn gherechticheyt, ende alle dese dinghen sullen v toegheworpen worden.

s 1.Reg. 3.b.13 Psalm. 37.c.25 ende 55.c.23 Sapient. 7.b.11

34

Daerom weest niet sorchuuldich voor den morgen, want de morgen sal voor het syne sorgen, de dach heeft ghenoech aen zijn verdriet.

[fol. 4r]