Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

2. Iesus gheuast hebbende, 3. wert versocht van den Satan, 11. ende ghedient van de Engelen, 12. daerna wijckende na Galileen, woont hy te Capernaum, 17. begint te prediken, 18. roepende Petrum ende Andream, 21. Iacobum ende Ioannem, 23. gaet het lant van Galilea omme, verkondigende het Euangelium, ende heelende alle krancke.

A.1

DOe ^a wert Iesus vanden Gheest geleyt in de woestijne, ⁺ om vanden Duyuel versocht te worden.

a Marc. 1.b.12 Luc. 4.a.1

+ Christus versocht.

2

Ende doe hy ^b veertich dagen, ende veertich nachten geuast hadde, hongerde hem ^c ten laetsten.

b Exod. 34.c.28 1.Reg. 19.a.8

c Ofte, daerna

3

Ende de versoecker quam tot hem, ende sprack: Indien du Gods Sone bist, so ghebiedt dat dese steenen brooden worden.

4

Doe antwoordde hy ende seyde: ⁺ Daer is gheschreuen: ^d De mensche sal niet vanden broode alleenlick leuen, maer van allen woorde dat wt den monde Gods gaet.

+ Christus verwint den Duyuel met der Schrift.

d Deut. 8.a.3. ende 32.e.47 Sapient 16.c.26.

5

Doe nam hem de Duyuel mede na de heylige stadt: ende stelde hem op de ^e tinnen des tempels:

e Ofte, het vaenlinck

6

Ende seyde tot hem: Indien du Gods sone bist, so worpt dy seluen nederwaert: want daer is geschreuen: ^f Hy sal synen Enghelen beuelen van dy, ende sy sullen dy op de handen draghen, ⁺ op dat du dynen voet nerghens aen eenen steen en stootest.

f Psalm. 91.b.12

+ De Duyuel brengt Schrift voort.

7

Iesus seyde tot hem: Wederom daer is geschreuen: ^g Du salt den Heere dynen God niet versoecken.

g Deut. 6.b.16

8

Wederom nam hem de Duyuel mede op eenen seer hoogen berch, ende toonde hem alle de Koninckrijcken der werelt, ende hare eerlicheyt:

9

Ende seyde tot hem: Alle dese dingen sal ick dy geuen, indien du nederuallest ende my aenbiddest.

B.10

Doe seyde Iesus tot hem: Gaet wech ^h Satan, Want daer staet geschreuen: ⁱ Den Heere dynen God saltu aenbidden, ende hem alleene dienen.

h Dat is, vyant.

i Deut. 6.b.13 ende 10.c.20 1.Sam. 7.a.3.

11

Doe verliet hem de Duyuel, ende siet, de Enghelen quamen ende dienden hem.

12

^k Ende doe Iesus hoorde dat Ioannes geuangen was, ⁺ weeck hy weder na Galieam.

k Marc. 1.b.14. Luc. 4.b.14 Ioan. 4.e.43.

+ Christus predickt bekeeringe, ende dat hy gekomen is.

13

Ende verlatende Nazareth, ^l quam hy ende woonde te Capernaum, die aen der Zee gelegen is, in de eynden Zabulon ende Nephthali.

l Luc. 4.d.31

14

Op dat veruult worde dat geseyt is door den Propheet Esaiam, segghende:

15

^m Het lant Zabulon, ende het lant Nephthali, aen den wech der zee ouer den Iordane, de Galilea der Heydenen.

m Esai. 9.a.1.

16

Dat volck dat in duysternisse satt, heeft een groot licht ghesien: ende den genen die saten in de landouwe ende schaduwe des doots, dien is een licht opghegaen.

17

ⁿ Van dier tijt aen begonst Iesus te prediken,

n Marc. 1.b.14

[fol. 3r]

ende te seggen: ^o Betert v. Want het Koninckrijcke der Hemelen is na by.

o Matth. 3.a.2. Marc. 1.b.15

18

^p Ende wandelende aen de Galileetsche zee, sach hy twee broeders [namelic] Simonem die daer heet Petrus, ende Andream synen broeder het net in de zee worpen: (want sy waren visschers.)

p Marc. 1.b.16. Luc. 5.a.1.

19

Ende hy seyde tot hen: ⁺ Volghet my na, ende ick sal v ^q visschers der menschen maken.

+ Petrus ende Andreas, Iacobus ende Ioannes worden geroepen.

q Iere. 16.b.16 Ezech. 47.a.9

C.20

^r Ende sy verlieten terstont hare netten, ende volchden hem.

r Matth. 19.c.27 Marc. 10.c.28. Luc. 5.b.11. ende 18.c.28.

21

^s Ende als hy van daer voort ghinck, sach hy twee andere broeders, Iacobum den sone Zebedei, ende Ioannem synen broeder in een schipken met haren vader Zebedeo hare netten vermaken, ende riepse.

s Marc. 1.b.19.

22

Ende sy verlieten terstont dat schipken ende haren vader, ende volchden hem.

23

Ende Iesus ommeginck gheheel Galileam, ⁺ leerende in hare vergaderingen, ende predikende het Euangelium des Koninckrijcx, ende heelende alderley sieckten ende kranckheden onder den volcke.

+ Christus predict het Euangelium, ende heelt de krancken.

24

Ende zijn gheruchte ginck tot in geheel Syrien lant, ende sy brachten hem toe alle krancken, met menigherley sieckten ende qualen beuanghen, ende ^t die van de Duyuelen ghequelt waren, ende de maensuchtighe, ende de ghichtighe: ende hy maecktese ghesont.

t Griecx, beduyuelde

25

^u Ende hem volchden veel scharen na, van Galilea, van ^x de thien steden, van Ierusalem, van Iudea, ende van ouer den Iordaen.

u Marc. 3.a.7. Luc. 6.b.17.

x Griecx, Decapoli