Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Ioannes in de wildernisse predickt bekeeringhe, 3. ende de toekoemste des Heeren, 6. ende het volck doopende, 7. straft de Phariseen, 11. geuende ghetuyghenisse van Iesu Christo, 13. den welcken hy ooc doopt.

A.1

ENde ^a in die daghen quam Ioannes de Dooper, ⁺ predikende in de woetijne des Iootschen lants,

a Marc. 1.a.4. Luc. 3.a.3. Ioan. 1.c.23 ende 3.c.23.

+ Ioannes de Dooper.

2

Ende segghende: ^b Betert v: Want het Koninckrijck der Hemelen is na by.

b Esai. 56.a.1 Matth. 4.b.17.

3

Want dese is de ghene daer de Propheet Esaias van ghesproken heeft, segghende: ^c De Stemme des ghenen die roept in de woestijne, is, Bereyt den wech des Heeren, maect syne paden recht.

c Esai. 40.a.3. Marc. 1.a.3. Luc. 3.a.4. Ioan. 1.c.23.

4

^d Ende dese Ioannes hadde zijn kleedinge van kemels hayre, ende eenen leederen gordel om zijn lenden: ende zijn spijse was ^e sprinckhanen ende ^f wilt honich.

d Marc. 1.a.6. 2.Reg. 1.a.8

e Leuit. 11.c.22

f 1.Sam. 14.c.26.

5

^g Doe quamen tot hem, Ierusalem, ende dat gantsche Ioedsche lant, ende het gantsche lant omtrent den Iordaen.

g Marc. 1.a.5. Luc. 3.a.7.

6

Ende werden van hem ghedoopt in den Iordaen, ^{+ h} bekennende hare sonden.

+ Belijdinge der sonden.

h Act. 19.b.18.

7

Ende doe hy vele Phariseen ende Saduceen sach tot synen Doop komen, seyde hy tot hen: ^{+ i} Ghy Aderen ghebroedtsel, wie heeft v ghewaerschout dat ghy sout vlieden vanden toecomenden tooren?

+ De Phariseen.

i Matth. 22.d.33.

8

^k Draecht dan vrucht die der bekeeringe weerdich is. ⁺

k Griecx, maeckt dan vrucht

+ Vrucht der bekeeringhe.

9

Ende denckt niet by v seluen te seggen: ^l Wy hebben Abraham tot eenen vader. Want ick segghe v: dat God machtich is oock wt dese steenen kinderen Abraham te verwecken.

l Luc. 3.a.8. Ioan. 8.d.39. Act. 13.c.26.

B.10

Ende nu is oock de bijle aen den wortel der boomen gheleydt: ⁺ daerom alle boom die gheen goede vrucht en draecht sal afghehouwen, ende int vyer gheworpen worden.

+ Bijle.

11

^m Ick ^n† doope v wel met water tot bekeeringe: maer hy die na my koemt, is machtigher dan ick: wiens schoenen ick niet weerdich ben te draghen ^o die sal v met den heylighen Gheest ende met Vyer doopen.

m Marc. 1.a.8 Luc. 3.b.16. Ioan. 1.c.26 Act. 1.a.5. ende 11.b.16 ende 19.a.4

n† and. So doope ick v dan

o Esai. 44.a.3 Ioel 2.c.28. Act. 2.a.4 ende 11.b.15. ende 9.a.6

12

^p De welcke synen wan in syne hant heeft, ende sal synen dorschvloer doorsuyueren: ende zijn tarwe in zijn schure samelen, ende het kaf met onwtblusschelicken vyere verbranden.

p Luc. 3.b.17.

13

^q Doe quam daer Iesus van Galilea tot den Iordaen, tot Ioannem, om van hem ghedoopt te worden.

q Marc. 1.a.9. Luc. 3.c.21.

14

Ende Ioannes weygerde hem seere, seggende: Ick hebbe noot van dy ghedoopt te worden, ende koemstu tot my?

15

Ende Iesus antwoordende, seyde tot hem: latet nu [wesen:] want aldus betaemt ons alle gerechticheydt te volbrenghen. Doen liet hy hem [gheworden.]

16

Ende doen Iesus gedoopt was, quam hy terstont op van den water: ende siet, de Hemelen werden hem geopent, ende ^r sach den gheest Gods neder dalen ghelijck een duyue, ende op hem komen.

r Ioan. 1.d.32.

17

Ende siet een stemme wt de Hemelen, seggende: ^s Dese is mijn wel lieue Sone, in den welcken ick mijn welbehaghen ghenomen hebbe.

s Esai. 42.a.1 Matth. 17.a.5. Marc. 1.b.11 ende 9.a.7. Luc. 3.c.22 ende 9.d.35. Colos. 1.b.13 2 Pet. 1.b.17