Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Christus gheboren, 2, is aenghebeden van de wijse, 13, ende door de vermaninghe des Enghels gedraghen in Egypten om Herodis wreetheyt wille, 16. de welcke de kleyne kinderkens doodt, 19, van waer hy na de doot Herodis wederghebracht zijnde in het landt Israels, woont in Nazareth.

A.1

DOe nu Iesus ^a gheboren was te Bethlehem int Ioodtsche lant, ten tijde des Konincx Herodis, siet, daer quamen ^b Wijse van Oosten tot Ierusalem.

a Luc. 2.a.6

b Griecx Magi. Magi waren een volck in Media, so Herodotus schrijft. Ende de Persen noemden oec hare priesters ende wijsen Magos

2

Segghende: waer is de Koninck der Ioden, die gheboren is? want wy hebben zijn Sterre gesien int Oosten, ende zijn ghekomen om hem te aenbidden.

3

De Koninck Herodis dit gehoort hebbende, wert beroert, ende gheheel Ierusalem met hem.

4

Ende hy versamelde alle de Ouerpriesters ende Schriftgeleerde des volcx, ende onderuraechde van hen waer ^* Christus soude geboren worden?

* Ofte, Gesalfde

5

Sy seyden hem: Te Bethlehem int Iootsche lant: want also is geschreuen door den Propheet.

6

^c Ende du Bethlehem int Iootsche landt, bist gheensins de kleynste onder de Vorsten Iuda: want wt dy sal de Leydsman voort komen, die mijn volck Israel ^d regeeren sal.

c Mich. 5.a.2. Ioan. 7.e.42.

d ofte, hoeden gelijck een herder syne kudde.

7

Doe riep Herodes de Wijse heymelick, ende ondersochte van hen te wat tijde de Sterre hen verschenen was.

8

Ende sandtse na Bethlehem, seggende: Gaet henen derwaert, ende ondersoeckt neerstelick vanden kindeken: ende als ghijt sult geuonden hebben, latet my weten, op dat ick oock kome, ende dat ickt aenbidde.

9

Ende sy den Koninck gehoort hebbende, zijn henen ghegaen: Ende siet, de Sterre die sy int Oosten ghesien hadden, ghinck voor hen tot dat sy quam ende stondt bouen de plaetse daert kindeken was.

B.10

Doe sy nu de Sterre sagen, verureuchden sy hen seer met grooter vreuchden.

11

Ende in het huys komende, vonden sy dat kindeken met Maria zijn moeder: ^e ende nederuallende aenbadent: Ende hare schatten opgedaen hebbende, offerden sy hem gauen: Gout, ende Wieroock, ende Myrrhe.

e Psalm. 72.b.10 Esai. 60.a.6

12

Ende van God vermaent inden droom datse niet souden wederkeeren tot Herodem, keerden sy weder door eenen anderen wech na haer lant.

13

Doe sy nu henen ghetogen waren, siet de Enghel des Heeren verscheen Ioseph inden droom, seggende: Staet op, ende neemt dat kindeken ende zijn moeder, ende vliet in Egypten, ende blijft daer tot dat ickt dy segge: want het is voor handen, dat Herodes dat kindeken soecken sal te dooden.

14

Ende hy stont op, ende nam dat kindeken ende zijn moeder inder nacht, ⁺ ende weeck henen na Egypten:

+ Ioseph vliedt met Iesu ende de moeder in Egypten.

15

Ende was daer tot den doot Herodis: op dat veruult worde dat vanden Heere ghesproken is door den Propheet, segghende: ^f Wt Egyp-

f Num. 24.a.8 Osee. 11.a.1.

[fol. 2v]

ten hebbe ick mynen Sone gheroepen.

16

Doe nu Herodes sach dat hy bedroghen was van de Wijse, werdt hy seer toornich: ende zijn volck ghesonden hebbende, ⁺ doodde alle de kinders te Bethlehem, ende in alle hare palen, van twee iaren aen, ende daer onder, na den tijt dien hy van de Wijse vernomen hadde.

+ Herodes doodt de kinderen.

17

Doe wert veruult dat vanden Heere ghesproken is, door den Propheet Ieremiam, seggende:

18

^g In Rama is een stemme ghehoort, veel claghens, ende weenens, ende huylens, Rachel beweenende hare kinders: ende heeft haerseluen niet willen laten troosten, om dat sy niet en zijn.

g Iere. 31.b.15

19

Doe Herodes nu gestoruen was, siet, de Enghel des Heeren verscheen Ioseph in den droom in Egypten,

C.20

Seggende: Staet op, neemt het kindeken ende zijn moeder, ende gaet henen int lant Israels: want sy zijn ghestoruen die des kindekens ziele sochten.

21

Ende Ioseph opghestaen, nam dat kindeken ende zijn moeder, ende quam int lant Israels.

22

Maer doen hy hoorde dat Archelaus in Iudea regneerde in Herodis zijns vaders plaetse, vreesde hy daer henen te gaen: maer van Gode vermaent in den droom, weeck hy henen in de deelen des Galileetschen lants.

23

Ende daer gekomen zijnde, woonde hy in de stadt ghenaemt Nazareth: op dat veruult worde dat door de Propheten ghesproken is, [naemlick] ^h hy sal Nazarenus geheeten worden.

h Iudic. 13.a.7.