Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Tot den Leser, aengaende de Capittelen ende versen, van het derde boeck der Machabeen.

Dit derde Boeck der Machabeen, hebben wy ouergheset, wt de Zurische Latijnsche Bijbel, ende met de selue Capittelen onderscheyden. Maer dewijle de plaetsen die wt desen Boeck hier ende daer in desen Bijbel aenghewesen zijn, niet en zijn aenghewesen met Capittelen, maer met den ghetale der versen, den gantschen Boeck sonder ophouden doorgaende, so en hebben wy niet moghen in eenen yeghelicken Capittele het ghetal van nieus beghinnen, maer hebben moeten altijts doorgaende voort tellen, om dat de aenwijsinghen souden waer segghen. Dit en hebben wy niet willen verberghen, op dat de Leser hem niet en verwondere, waerom een yeghelick Capittel zijn eyghen ghetal der versen niet en heeft, ofte waeromme het Boeck in Capittelen ghedeylt is, dewijle het ghetal der versen sonder ophouden voortgaet tot den eynde des Boecx.