Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

EEN SCHOON aendachtich ghebet Manasse, des Konincx Iuda, doe hy te Babylon gheuancklick lach.

A.1

O Heere almachtighe God, ^a onser vaderen Abraham, Isaac ende Iacob, ende haers gherechten zaedts:

a Exod. 3.a.6. Matth. 22.d.32.

2

^b Die du Hemel ende Aerde met allen dat daer in is, ghemaeckt hebst:

b Gen. 1.a.1. Psalm. 146.a.6. Act. 4.c.24. ende 14.b.14. ende 17.c.24. Apoca. 14.a.7.

3

^c Ende hebst de Zee versegelt, met dynen gebode, ende hebst de diepte veruatet ende verseghelt, tot eeren dijns verschricklicken ende heerlicken Naems,

c Gene. 1.a.9. Hiob. 26.b.10. Prouer. 8.c.29. Iere. 5.c.21.

4

Dat een yegelick moet voor dy verschricken, ^d ende hem vreesen voor dyner grooter macht.

d Iesai. 2.b.10.

5

Want dynen toorne is ondraechlic, dien du de sondaers dreygest: ^e maer onwtspreecklick ende onbegrijplick is de barmherticheydt dyner toesegginghe:

e Exod. 20.a.6.

6

Want du bist Heere de Allerhoogheste ouer den gantschen Aerdtbodem, ^f lanckmoedich, van grooter goedicheyt, ende seer ghenadich, ende en straffest de lieden niet gheerne: ende hebst na dyner goedicheyt toegheseyt, ^g boete ter vergeuinghe der sonden.

f Exod. 34.a.6. Psalm. 86.a.5. ende 145.a.8. Ioel. 2.b.13. Ion. 4.a.2.

g Luc. 24.e.46. Actu. 2.d.38.

7

Maer dewijle dat du bist een God der rechtueerdigen, so hebstu sulcke boete niet ghesettet den rechtueerdigen, ^h Abraham, ⁱ Isaac ende ^k Iacob, die teghen dy niet ghesondicht en hebben.

h Ge. 15.b.17.c.22.

i Genes. 26.a.6.

k Gene. 28.b.13.

8

^l Maer ick hebbe ghesondighet, ende myner sonde is meer, dan des zandts aen der Zee is, ende ben ^m ghekrommet in sware ijsere banden, ende hebbe gheen ruste.

l 2.Reg. 21.a.2.

m 2.Para. 33.b.13.

9

Daerom dat ick dynen toorne verwecket hebbe, ende groot quaet voor dy gedaen, daer mede dat ick sulcke grouwelen, ende so vele ergernisse, aengherichtet hebbe.

B.10

Daerom buyghe ick nu de knyen mijns herten, ende bidde dy Heere om ghenade.

11

ⁿ Och Heere, ick hebbe gesondiget: Ia gesondiget hebbe ick, ^o ende bekenne myne misdaedt.

n Psalm. 51.a.6.

o Psalm. 31.a.5. Hiob. 13.b.15.

12

So bidde ick nu, ende smeecke dy, vergheeft het my O Heere, vergheeft het my.

13

Laet my niet in mynen sonden verderuen, ende en laet de straffe niet eewichlick op my blijuen:

14

Maer wilt doch my onweerdighen helpen, na dyner grooter barmherticheyt: ^p so wil ick dy alle tijt louen mijn leefdaghe:

p Iesai. 38.c.20. Luc. 1.g.69.

15

Want dy loeft alle Hemelsche heyr, ende dy salmen prijsen altoos ende eewichlick, Amen.