Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

HET GHEBET Asarie, Danielis III. wt den Griecxschen.

Asarie Ghebedt. De Wreedtheydt NebucadNezars.

24

ENde Asaria stont ^a midden in den gloeyendighen ouen,

a Danie. 3.c.23.

25

ende dede synen mont op, ⁺ badt ende sprack:

+ Asarie ghebet vol geloofs ende ootmoedicheydts.

26

^b Geloeft zijstu Heere, de God onser vaderen, ende dijn Name moet ghepresen ende gheeert worden eewichlick,

b 3.Reg. 8.b.15.

27

^c Want du bist rechtueerdich in allen, dat du ons ghedaen hebst: alle dyne wercken zijn rechtueerdich, ende wat du doest, dat is recht, ende alle dyne oordeelen, zijn onstraffelick.

c Threno. 1.b.18. Baruc. 1.b.15. ende 2.a.6.

28

^d Du doest ons recht, dat du ons gherichtet hebst, met sulcker straffe, die du ouer ons hebst gaen laten, ^e ende ouer Ierusalem, de heylighe stadt onser vaderen: Ia du doest recht ende wel daer aen, om onser sonden wille.

d Danie. 9.a.7.

e 4.Reg. 25.

29

^f Want wy hebben ghesondighet, ende quaet ghedaen, daer mede dat wy, van dy gheweken zijn, ende allesins teghen dy ghedaen hebben,

f Psalm. 106.a.6. Iudith. 7.c.20. Threno. 3.e.42. Baruc. 2.b.12.

D.30

Ende dynen gheboden niet ghehoorsaem geweest zijn, noch haer gheachtet hebben, dat wy daer na deden, als du ons beuolen hebst, op dat het ons wel ghinghe.

31

Daerom hebstu recht ghedaen, dat du sulcks alle ouer ons hebst gaen laten,

32

Ende ons gegeuen in de handen onser vyanden, der Godloosen boosen lieden, ende den onrechtueerdigen ende grousaemsten Koninck op Aerden.

33

Ende wy en doruen onsen mondt niet opdoen, so zijn wy tot schande ende tot spotte geworden, voor dynen knechten, ende voor alle dien, die dy vreesen.

34

Maer en verstoot ons doch ghelijckewel niet gantschelicken, om dijns heyligen Naems wille, ende en verwerpt dijn Verbont niet,

45[35]

^g Ende en neemt dyne barmherticheyt niet van ons, omme Abrahams dijns gheliefden vrients wille, ende dijns knechts Isaacs, ende Israels dijns heylighen,

g Genes. 22.b.16. ende 26.a.3. ende 28.b.13.

36

^h Dien du toegheseyt hebst, haer zaedt te vermeerderen, gelijck als de Sterren aen den Hemel, ende als het zandt aen der Zee.

h Gene. 15.a.5. ende 22.b.17. ende 26.a.4. ende 28.b.14

37

Want wy zijn ^* ringher gheworden dan alle Heydenen, ende zijn nu de aller verachtste op Aerden, om onser sonden wille.

* smaller, dunner,

38

ⁱ Also dat wy nu geenen Vorst, Propheet, noch Leeraer, ende noch brandtoffer, noch daechlicx offer, noch spijsoffer, noch reucwerck meer hebben.

i 2.Para. 15.a.3. Osee. 3.a.4.

39

Ende en hebben gheen stede, daer wy voor dy offeren, ende ghenade vinden mochten.

E.40

Maer met eenen bedroefden herte, ende verslaghen gheeste, komen wy voor dy, ghelijck als brochten wy brandoffer van rammen ende runderen, ende vele duysent vette schapen: ^k also woudestu doch onsen offer heden, voor dy gelden, ende aenghenaem zijn laten: ^l want du en laetst die niet te schanden worden, die so op dy ^m hopen.

k Sapient. 3.a.6.

l Psalm. 25.a.3. Syr. 2.b.12.

m Ierem. 17.a.7. Psalm. 2.b.12.

41

Also komen wy nu met gantschen herten, ende soecken dijn aenghesichte met vreesen.

42

Daerom en laet ons niet te schanden worden: maer doet ons Heere na dyner ghenade, ende na dyner grooter barmherticheyt,

43

Ende ⁿ verlost ons na dyne wonderdaden, ende gheeft dynen Name de eere.

n vrije, helpt ons wt.

44

Dat hen schamen moeten alle, die dynen knechten leedt doen, ende te schanden worden, voor dyner grooter macht ende gheweldt, ende hare macht verstooret worde.

45

Op dat sy gewaer worden, dat du bist de Heere, ^o de eenighe God, heerlick op den gantschen Aerdtbodem.

o Deut. 32.c.29. Iesai. 43.b.10.ende 45.a.5.

46

Ende de Dienaers des Konincks, diese inden ouen gheworpen hadden, hielden niet op, ende wierpen altoos toe sulphur ende peck, ende werck ende drooghe rijseren:

47

Dat de vlamme bouen wt den ouen sloech, by neghen ende veertich ellen hooch,

48

Ende verslont om haer, ende ^p verbrandde de Chaldeen, die het afreycken konde voor den ouen.

p Danie. 3.c.22. 3.Mac. r.187.s.201 Danie. 6.c.24. Susan. g.62. Psalm. 7.b.16.

49

Maer de Enghel des Heeren, ginck met die, die by Asaria waren, in den ouen, ende stiett de vlamme des vyers wt den ouen,

F.50

Ende makede het in den ouen, gelijck als eenen koelen dauw, ^q dat haer dat vyer niet eens aenroerde, noch haer brandde, ofte beschadichde.

q Iesai. 43.a.2. Psalm. 66.b.12.