Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

Uertroostinghe tot het volck van het goet dat God hen wederom wil gheuen, ende van de roepinghe der Heydenen.

A.1

TReckt wt Ierusalem, dijn treurkleedt, ende treckt aen het eerlicke verciersel eewichlick.

2

^a Trecket aen den rock der gherechticheydt Gods, ende settet de kroone der heerlicheyt des Eewighen, op dijn hooft.

a Syrach 6.d.32. ende 27.b.11.

3

Want God sal dyne heerlickheyt, onder den gantschen Hemel openbaren.

4

Want dynen Name sal van God ghenoemt worden eewichlick, Vrede, Gherechticheydt, Prijs, ende Godsalicheyt.

5

^b Maeckt dy op Ierusalem, ende treedt op de hoochte, ende ^c siet rondtomme dy, na den Oosten, ende siet dyne kinderen, die beyde vanden opganck der Sonnen, ende vanden nederganck versamelt zijn, door het woordt des Heylighen, ende verblijden haer, dat God harer weder ghedacht heeft.

b Baruch 4.d.36. Iesaie 15.b.17. ende 52.a.2.

c Iesaie 60.a.4.

6

Sy zijn te voete van dy, door de vyanden wech geuoert, Maer God brengtse tot dy, verhoocht met eeren, als kinderen des Rijcx.

7

Want ^d God wil alle hooghe berghen vernederen, ende de langhe Oeueren ende dalen, den lande ghelijck veruullen: op dat Israel seker wandele, ende God prijse.

d Iesaie. 2.b.11. ende 40.a.4. Luce 3.a.5.

8

De Wouden nu, ende alle welrieckende boomen, sullen Israel, wt Gods beuel, schaduwe gheuen.

9

Want God sal Israel weder hier brenghen, met vreuchden, door synen heerlicken troost, met bermherticheyt, ende syne gherechticheyt.