Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

Een klaghe ende vermaninghe tot het volck Israels, dat sy hen beteren ende verduldich zijn.

A.1

DEse ^a† Wijsheyt is het boeck vanden geboden Gods, ende ^b van de Wet die eewich is, ^c alle diese houden, die sullen leuen: maer diese ouertreden, die sullen steruen.

a† And. Dit is het, etc.

b Iesaie. 40.a.8. Matth. 5.b.18. ende 24.d.35. Psalm. 33.a.4. 1.Pet. 1.c.25.

c Leuit. 18.a.5. Hesek. 10.b.13. Roma. 10.a.5.

2

Keert dy daer wederom toe Israel, ende neemt het aen: wandelet sulcken lichte na, dat dy verlichtet.

3

Gheeft niet ouer dyne eere eenen anderen, ende dynen schat eenen vreemden volcke.

4

^d O salich zijn wy Israel: want God heeft ons synen wille gheopenbaert.

d Deute. 33.c.29.

5

^* Hebbet eenen goeden moet mijn volck, du prijs Israels.

* Cap. iiij. Lut. Een vermaninge ten volcke Israels, haer te troosten, dat sy verduldich zijn souden.

6

^e Ghy zijt den Heyedenen verkocht niet ten verderue: maer daeromme, dat ghy God vertoornt hebt, zijt ghy uwen vyanden ouerghegheuen.

e 2.Reg. 17.c.23. ende 25.a.3.

7

Want ghy hebbet dien die v geschapen heeft vertoornt, in dien, dat ghy niet God, ^f maer den Duyuels, gheoffert hebt.

f Deuter. 32.b.17. Psalm. 106.d.37.

8

Ghy hebbet vergheten des eewigen Gods, die v geschapen heeft, ende Ierusalem, die v heeft opgheuoedt, die hebbet ghy bedroeft.

9

Want sy heeft ghesien den toorne Gods, die ouer v komen soude, ende gheseyt: Hoort toe, ghy ^g† inwooners Zion, God heeft my groot leedt toeghesonden.

g† And. aenstooters.

B.10

Want ick hebbe ghesien de gheuanckenisse myner sonen ende dochteren, welcke de Eewighe ouer hen ghebracht heeft.

11

^h Ick hebse met vreuchden opgheuoedt, maer met weenen ende met hertenleede, hebbe ickse sien wechuoeren.

h 4.Esdr. 2.a.3.

12

Niemant verblijde hem ouer my, dat ick een weduwe, ende van velen verlaten ben: ick ben tot eener woestijne ghemaeckt, om der sonden wille myner kinderen.

13

Want sy zijn van de Wet Gods afgeweken, ende en hebben niet bekent syne rechten: sy en hebben niet gheleeft na Gods beuelen, ende en hebben syne gheboden niet ghehouden.

14

Koemt herwaerts ghy inwooners Zion, ende verkondiget de geuanckenisse myner sonen ende dochteren, die de Euwighe ouer hen gebracht heeft.

15

ⁱ Want hy heeft ouer hen gebracht een volck van verren, een grouwelick volck, ende van een onbekende sprake.

i Deute. 28.e.49. Ierem. 5.b.15. ende 50.e.41.

16

Die hen niet en ontsien door den ouden, noch hen der kinderen en ontfermen, deselue hebben wech gheuoert de lieue [sonen] der weduwen, ende de eensame harer dochteren berooft.

17

Doch hoe kan ick v helpen?

18

Want die dit ongeluc ouer v gebracht heeft, die sal v van uwer vyanden hant ^† verlossen.

† vrijen.

19

Trecket henen, ghy lieue kinderen, trecket henen: maer ick ben verlaten eensaem.

C.20

Ick hebbe mijn vreuchdenkleet wtgetogen: ick wil schreyen tot den Eewigen, altoos ende eewichlic.

21

Hebbet eenen goeden moet, kinderen, ^k schreyet tot God, so sal hy v verlossen, van het gheweldt ende hant der vyanden.

k Deute. 4.c.29. ende 30.a.1. Psalm. 130.a.1.

22

Want ick hope alreede, dat de Eewighe v helpen sal: ende ick sal vreuchde hebben, vanden Heyligen, om der barmherticheyt wille, die v snellick geschieden sal, van onsen eewigen Salichmaker.

23

^l Ick hebbe v trecken laten met treuren ende weenen, maer God sal v my wedergheuen, met ^m vreuchde, ende blijschap eewichlick.

l Psalm. 126.a.5.

m hertenurolickheyt.

24

Ende gelijck als de inwooners Zion, nu ghesien hebben uwe gheuanckenisse: also sullen sy oock haest sien, de hulpe van uwen Gode, die ouer v komen sal, met grooter heerlicheyt ende eewighen trooste.

25

ⁿ Ghy kinderen, lijdet verduldichlicken den toorne, die van God ouer v koemt: want dijn vyant heeft dy veruolcht, ende du salt in korten sien zijn verderf, ende op hare halsen saltu treden.

n 2.Sam. 16.b.10

26

Myne ^o teere [kinderen] moesten gaen, op eenen boosen wech: sy zijn wech geuoert, gelijck als een kudde, vanden vyanden gherooft.

o verwaenden

27

Hebbet eenen goeden moet, ghy kinderen, ende schreyet tot God: want die v heeft wechuoeren laten, die en sal uwer niet vergheten.

[fol. 48v]

28

Want ^p ghelijck als ghy v beneersticht hebt, van God af te wijcken: ^q also bekeert v nu, ende beneerstighet v thienmael meer, den Heere te soecken.

p Roma. 6.b.19.

q Iesa. 55.a.9.

29

Want die ouer v dese straffe heeft laten gaen, die sal v helpen, ende eewige vreuchde brengen.

D.30

Ierusalem hebbet eenen goeden moet: want die sal dy troosten, daer du na ghenoemt bist.

31

^r Onsalich moeten zijn, die dy gheplaecht, leedt ghedaen, ende hen ouer dynen val verblijt hebben.

r Ierem. 50.a.9.b.15.

32

Onsalich moeten zijn de steden, die dyne kinderen ghedient hebben, ende onsalich moetse zijn, die dyne kinderen gheuanckelick houdt.

33

Want ghelijck als sy ouer dynen val gheiuychet, ende haer ouer dynen verderue, verblijdet heeft: also sal sy bedroeft zijn, wanneer sy verwoestet wordt.

34

^† Ende ick wil hare macht wech nemen, daer sy haer op verlieten, ende haren roem in klaghe veranderen.

† an. ick sal afhouwen dese vreuchde diese heeft van so veel volcks te zijn: ende haer wrake in etc.

35

^s Want een vyer sal ouer haer komen vanden Eewighen, vele daghen lanck, ende Duyuels sullen hare wooninghe in haer hebben, langen tijdt.

s Iob. 20.c.26. Iesaie 30.d.33. ende 66.c.24.

36

^* Siet rondtomme dy Ierusalem, na den Oosten, ende siet den troost, die dy van Godt koemt.

* Cap. v. Luth. Een troostinge tot het volc, om dat goet, dat hen God wederghelden sal.

37

Siet, dyne kinderen, ⁺ die daer wech gheuoert zijn, komen, Ia sy komen versamelt, beyde ^t van Oosten ende van Westen, door het woort des Heylighen, ende prijsen Gods eere.

+ Baruch. 5.a.6.

t Iesaie. 43.a.3. Matth. 8.b.12. Luc. 13.c.27.