Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

Een hertelick roepen ende bidden tot God in de gheuanckenisse, ende vermaninghe tot den volcke, om bekeeringhe ende beteringhe.

A.1

ALmachtighe Heere, ⁺du God Israels, in desen grooten angst ende noot, schreye ich tot dy.

+ Een heerlic gebedt tot God, ende vermaninge tot den volcke, ter beteringhe.

2

Hoort ende weest ghenadich Heere: want wy hebben teghen dy ghesondighet.

3

Du regerest van eewicheydt tot eewicheydt, maer wy vergaen altoos.

4

Almachtighe Heere du God Israels, hoort nu het ghebet Israels, die den doode inden halse steken, ende het ghebet der ghenen, die teghen dy ghesondighet, ende der stemme des Heeren haers Gods, niet ghehoorsaem gheweest zijn: daeromme is oock de straffe, ^a altoos achter ons gheweest.

a allewege, doorgaens,

5

Dencket niet op der misdaedt onser vaderen, maer dencket alsnu aen dyne handt, ende aen dynen Name.

6

Want du Heere bist doch onse God: so willen wy Heere dy louen.

7

Want daeromme hebstu dyne vreese in onse herte ghegheuen, dat wy dynen Name aenroepen, ende dy in onser gheuanckenisse louen souden: ^b† want alle de misdaedt onser vaderen, die voor dy gesondicht hebben, gaet ons ter herten,

b† And. ende ons van der boosheyt onser etc. hebben, bekeeren. Siet hedens daechs liggen wy in onser, etc.

8

Die wy nu zijn in onser gheuanckenisse, daer du ons henen verstooten hebst, tot eener versmaedtheyt, ten vloecke ende grouwel, om aller misdaedt wille onser vaderen, die vanden Heere haren God, afgheweken zijn.

9

Hoort Israel, de gheboden des leuens, merct vlijtelick daerop, ^c† ende behoudtse wel.

c† And. Dat du kloeck werdest

B.10

Hoe koemt het Israel, dat du inder Heydenen lande versmachtest? dat du in eenen vreemden lande bist?

11

Dat du dy verontreynighest onder den dooden? dat du onder die gherekent bist, die in de Helle varen?

12

^d Dat is de oorsake, Dat du de fonteyne der wijsheyt verlaten hebst.

d Iere. 2.b.13.16.

13

Warestu op Godes weghen ghebleuen, du haddest wel doorgaens henen in vrede gewoont.

14

So leeret nu rechte wijsheyt: op dat du beuin-

[fol. 48r]

dest, ⁺ wie die zy, die een lanck leuen, goederen, vrede ende vreuchde gheeft.

+ Een vermaninge ter wijsheyt

15

Wie weet het waer sy woont? wie is in hare kamer gheweest?

16

Waer zijn de Vorsten der Heydenen, die ouer het wiltwerck op Aerden heerschen?

17

Die daer spelen met de vogelen des Hemels? ^e die siluer ende gout vergaderen, daer de menschen haer betrouwen op setten, ^f ende en konnen des nemmermeer satt worden?

e Iesa 2.a.7.

f Syrac. 5.a.9.

18

(Want sy vergaderen ghelt, ende beulijtigen hen daerop, ende is doch altemael te vergeefs.)

19

Sy zijn wtgheroeyt, ende in de Helle gheuaren, ende andere zijn in hare stede ghekomen.

C.20

De ^g† nakomelingen sien tis waer het licht wel, ende woonen op den Aerdtbodem, ende en vinden doch den wech niet, daermen de wijsheyt vindet.

g† And. Doe sy ionc waren, sagen sy tis waer, etc. ende woonden, etc. ende treffeden, etc.

21

Want sy verachtense, daertoe hare kinderen, zijn oock verdwaelt ghegaen.

22

In Chanaan en hoortmen niets van haer, te Theman en sietmense niet.

23

De kinderen Hagar ondergronden tis waer wel na de Aerdtsche wijsheyt: desghelijcken de kooplieden van Meran, ende die van Theman, die hen duncken laten kloeck te syne: maer sy en vinden doch den wech niet, daermen de wijsheyt vindet.

24

O Israel, hoe heerlick is het huys des Heeren? hoe wijdt ende groot is de stede syner wooninghe?

25

Sy en ^h heeft gheen eynde, ende is onmatich hooch.

h Deutero. 4.f. Ierem. 23.c.24. Psalm. 103.b.19.

26

Daer waren in voortijden Reusen, groote beroemde lieden, ende groote krijghers.

27

Dieselue en heeft de Heere niet verkoren, noch hen den wech der bekentenisse gheopenbaert.

28

Ende dewijle sy de wijsheyt niet en hadden, zijn sy onderghegaen in harer dwaesheyt.

29

Wie is ten Hemel geuaren, ende heeftse ghehaelt, ende wt den wolcken neder ghebracht?

D.30

Wie heeft ouer de Zee ghescheept, ende heeftse gheuonden, ende om kostelick gout hier gebracht?

31

Somma, Daer en is niemandt die den wech weet, daermen de wijsheyt vindet.

32

Maer die alle dinck weet, ⁺ die kentse, ende heeftse door zijn verstandt gheuonden: ⁱ die den Aerdtbodem bereydet heeft op eewige tijt, ende dien veruullet met allerley ghedierten.

+ God is een vinder der wijsheyt.

i Gene. 1.a.1.

33

^k Die het licht laet opgaen, ende wanneer hy het weder roept, so moet het hem ghehoor gheuen.

k Iosu. 10.b.12. Iesa. 38.a.8. Syrac. 46.a.4.

34

De sterren lichten in harer ordeninghe met vreuchden.

35

Ende wanneer hyse voorts roept, so antwoorden sy, Hier zijn wy: ende lichten met vreuchden, om diens willen diese gheschapen heeft.

36

Dat is onse God, ^l ende niemandt en is hem te verghelijcken.

l Iesaie. 44.a.7. Ierem. 10.a.6. ende 49.b.19.

37

Die heeft de wijsheyt gheuonden, ende heeftse ghegheuen Iacob synen dienaer, ende Israel synen gheliefden.

38

^m Daer na is ^n† sy verschenen op Aerden, ende heeft by den lieden ghewoont.

m Ioan. 1.b.14. 1.Ioan. 1.a.1. 1.Timot. 3.b.15.

n† And. hy