Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

De Koninghinne Hester verschijnt voor den Koninck, ende stelt hem den noot des volcx voor ooghen.

4

ENde ten derden dage, ^{+ a} leyde sy hare daghelickse kleederen af, ende ^b tooch hare Konincklicke cieraet aen,

+ ☞Dit stuck mach een glose zijn des begins inden vijfsten cap.

a Iudith 10.a.1.

b 1.Hest. 5.a.1.

5

Ende was seer schoon, ende riep God den Salichmaker aen, ^c die daer alle dinck siet.

c 2.Paral. 16.a.9. Psalm. 133.b.13. Prouerb. 15.a.3. Syrach. 23.c.27. 2.Macha 9.a.5. Hebre. 4.b.13.

6

Ende nam twee maechden met haer, ende lenede haer ^* properlicken op de eene.

* teerlicken

7

Ende de andere volchde haer, ende droech haer den sleyp na van haren rocke.

8

Ende haer aenghesichte was seer schoone, lieffelick ende vrolick ghestalt: maer haer herte was vol angstes ende sorghe.

9

Ende doe sy door alle deuren heneninquam, tradt sy tegen den Koninck ouer, ^d daer hy sat

d Iudith 10.b.17.

[fol. 46v]

op synen Konincklicken stoel, in syne Koninclicke kleederen, die van goude ende edelen steenen waren, ende was verschrickelick aen te sien.

B.10

Doe hy nu de oogen ophief, ende sachse toornichlicken aen, doe wert de Koninghinne seer bleeck, ende sanck in eene onmacht, ende leyde het hoofd op de maghet.

11

^e Doe veranderde God den Koninck zijn herte ter goedicheyt, ende hem wert banghe voor haer, ende spranck van synen stoel, ende omuinckse met synen armen, tot dat sy weder tot haerseluen quam.

e Prouerb. 21.a.1. 3.Machab. q.152.

12

Ende sprackse vriendtlicken aen: Wat is dy Esther: ick ben dijn broeder, en vreest dy niet.

13

Du en salt niet steruen: ^f want dit gebot gaet alle andere aen, maer dy niet.

f 1.Hest. 3.b.12.

14

Tredet slechs herwaerts, ^g ende hy hief den gulden scepter op, ende leyde dien op hare schouderen, ende kussedese, ende sprack: Segget aen.

g 1.Hest. 5.a.2.

15

Ende sy antwoordde: ^h Doe ick dy aensach, dochte my, ick sach een Engel Gods: daerom verschrack ick voor dyner grooter Maiesteyt.

h Gene. 33.b.10. 2.Sam. 19.c.27.

16

Want du bist seer verschrickelick, ende dyne ghestalt is gantsch heerlick.

17

Ende als sy so sprack, sanck sy wederom in een onmacht, ende viel daer neder.

18

Ende de Koninck verschrack met alle synen dienaren, ende troostedense.