Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Een copije des mandaets dat de Koninck Artaxerxes door het aengheuen Amans des Hofmeesters, heeft in alle syne landen ghesonden, om de Ioden alomme wt te roeyen.

A.1

DE brief luydde aldus: ⁺ De groote Koninck Artaxerxes ^a van India tot aen Moorenlandt, ⁺ Ontbiedt den hondert ende seuenentwintich Vorsten, met tsamen den onderdanen, synen groet.

+ Ioseph. Antiqu. lib. ii, cap. 6.

a 1.Hester. 1.a.1. 2.Hester. 5.a.2.

+ ☞Dit stuck mochte ghelesen worden na het derde Cap. in den boeck Esther.

2

^b Hoewel ick een machtich Koninc ben, ende de grootste heere op Aerden: so ^c hebbe ick my doch in myner gheweldt niet willen verheffen, maer my beulijtighet, ghenadichlicken ende saechtmoedichlicken te regeren, ende den lieuen vrede, dies hem alleman verblijdt, te behouden: op dat een yegelick gherustelick leuen, ende synen handel drijuen mochte.

b Hester. 1.a.1. ende 3.b.14.

c Iudith 1.a.5. 1.Machab. 1.a.6.

3

Hiertoe hieldt ick met mynen Vorsten eenen raet, hoe sulcks gheschieden mochte.

4

Doe dede my Haman, ⁺ mijn allerkloeckste, liefste ende trouste raedt, die naest den Koninck de hoochste is, kondt, hoe dat ^d daer een volck zy, dat in alle landen verstroyt, sonderlicke wetten hielde, tegen aller landen ende lieden wijse,

+ Haman.

d 1.Hester 3.a.1.

[fol. 46r]

ende altijts der Koninghen gheboden verachte, daer door sy vrede ende eenicheyt in het Rijcke, verhinderen.

5

Als wy nu sulcks vernomen hebben, dat hen een eenich volck, teghen de gantsche werelt settet, ende zijn eyghen wijse houdt, ende onsen gheboden onghehoorsaem is: daerdoor sy groote schade doen, ende vrede ende eenicheyt in onsen Rijcke verhinderen:

6

So beuelen wy, dat alle de ghene, die Haman de ouerste Vorst, ende de hoochste naest den Koninck, onse vader, vermelden sal, met vrouwen ende kinderen, door harer vyanden sweert, sonder alle barmherticheyt ommeghebracht ende niemandt verschoont en worde: ende dat op den veerthienden dach Adar, der twaelfster maent, in desen Iare.

7

Op dat de onghehoorsamen alle, op eenen dach verslaghen worden, ende een bestandighe vrede in onsen rijcke blijuen moghe.