Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE OVERGHEbleuen stucken des Boecx Esther, wt den Grieckschen.

Wat Mardocheus ghedroomt heeft.

A.1

INden derden Iare des grooten Konincks Artaxerxes, ⁺ inden eersten dage, der maendt Nisan, hadde ^a Mardocheus, die een Iode was, een sone Iairi, des soons Semei, des soons Kis, vanden stamme BenIamin, eenen droom,

+ ☞Dit stuck machmen eerst oft laetst lesen, want den droom is voor de gheschiedenisse geweest, ende de beduydinghe na de gheschiedenisse.

a Esth. 2.a.5.

3

Ende woonde inder stadt Susan: een eerlick man, ende inden Konincklicken houe wel onthouden.

4

Hy was nu der gheuanghenen een, ^b die NebucadNezar de Koninck te Babel wech gheuoert hadde van Ierusalem, met den Koninck Iechania, den Koninck Iuda.

b 2.Reg. 24.b.15. Ierem. 24.a.1.

5

Ende dat was synen droom: ⁺ Daer verhief hem een gheschrey, ende huylen, donderen ende Aertbeuinghe op Aerden.

+ Mardochei droom.

6

Ende siet, daer waren twee groote Draken, die ghinghen teghen malcanderen te strijden.

7

Ende het gheschrey was groot, dat alle landen haer opmaeckten, te strijden teghen een heylich volck.

8

Ende het was een dach grooter duysternisse, droeffenisse, iammers ende angsts, ende daer was een groot iammer ende verschricken op Aerden.

9

Ende dat heylige volck, was hooch bedroeft, ende vreesden hen voor haer ongheluck, ende hadden hen haers leuens afgheschattet.

B.10

Ende sy schreydden tot God: ende na sulcken gheschrey, spranck eenen grooten waterstroom wt een kleyn fonteyne.

11

Ende de Sonne ginck op, ende wert klaer, ende de ellendighe wonnen, ende brachten de stouten tonder.

12

Als nu Mardocheus opwaeckte, na den droom, dachte hy, wat God daermede meynde: ende behieldt den droom in syner herten, ende dachte daerop, tot inden nacht, ende hadde geerne gheweten, wat hy beduydde.

4

ENde Mardocheus sprack: ⁺ God heeft dat altemael gheschicket.

+ ☞Hier maken andere een scheydinge des vorigen stucx, ende lesen dat hier volcht, na het x. Cap. Esther.

5

Ick dencke op mijnen droom, ende het is euen also gheschiedt: als my ghedroomt heeft.

6

De kleyne fonteyne, die een groot waterstroom wert, doe de Sonne scheen ende klaer wert, dat is Esther, ^c die de Koninck tot eener echter vrouwen ghenomen, ende tot eener Koninghinne ghemaeckt heeft.

c 1.Ester. 2.b.17.

7

De twee Draken, zijn, Haman ende Ick.

8

De eene beduydet de Heydenen, die te samen quamen, ende den name der Ioden verdelghen wouden.

9

De ander beduydet mijn volck Israel, dat tot den Heere riep: ende de Heere halp synen volcke, ende verlossede ons van desen onghelucke: ^d hy doet groote teeckenen ende wonderen onder den Heydenen.

d Dan. 6.c.27.

B.10

Want hy heeft alletijt een onderscheydt ghehouden tusschen synen volcke ende de Heydenen.

11

Ende wanneer de stonde gekomen is, dat de Heydenen ten allerstoutsten, ende wy ten allerswacksten gheweest zijn, ende dat God heeft willen richten,

12

So heeft hy aen zijn volck ghedacht, ende syner erue ^e de ouerwinninghe ghegheuen.

e 1.Mach. 2.e.44.

13

Ende dese daghen salmen houden inder maent Adar, op den veertienden ende vijftienden dach derseluer maent, in aller vreuchden, ende met grooten vlijte, wanneer het volck te samen koemt, ende sullen eewichlick also ghehouden worden, inden volcke Israels.