Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat L. Capittel.

Den lof Simons des soons Onie.

A.1

SImon de sone Onie, de hooghe Priester, die te syner tijt rontom het huys ganghen bouwede, ⁺ ende pijlaren daeraen settede,

+ Simon. 2.Macha. 4. 3.Macha. d.38.

[fol. 45r]

2

Ende den gront noch eens so hooch opmuerde, ende den ommeganck bouen aenden Tempel weder opmaeckte.

3

Te syner tijdt was de fonteyne veruallen, die maeckte hy vaste met koper.

4

Hy sorchde voor de schade zijns volcks, ende maeckte de stadt vaste teghen de vyanden.

5

Hy dede een loffelick werck, dat hy het volck weder tot rechter ordeninghe brachte.

6

Wanneer hy wt den voorhanck voortghinck, so lichtede hy als de morgensterre, door de wolcken, als de volle mane.

7

Ghelijck als de Sonne schijnt op den Tempel des Allerhoochsten: als de reghenboge, met syner schooner verwen.

8

Als een schoone Roose in den Meye, als de Lelien aen het water.

9

Als de wieroockboom inden Meye, als aenghesteken wieroock inden wieroockuate:

B.10

Als een gulden schouwer, met allerley edele steenen verciert.

11

Als een vruchtbaer olyboom, ende als den allerhoochsten Cypressenboom.

12

Wanneer hy hem met den schoonen langhen rock bekleedde, ende de gheheele vercieringhe aentooch, ende tot den heylighen Altaer tradt, so vercierde hy het gantsche Heylichdom ouer al.

13

Ende als hy wt der Priesteren handen, de offerstucken nam, ende by den vyere stont, dat op den Altaer brandde: so stonden syne boeders ringswijse om hem, ghelijck als de Cederen op den Libano gheplantet, ende omringden hem, als palmtacken.

14

Ende alle kinderen Aarons in hare vercieringhe, ende hadden des Heeren offer in haren handen, voor der gantscher Ghemeynte Israels.

15

Ende hy rechtede zijn ampt wt, op den Altaer, ende dede also den Allerhoochsten den Almachtighen een fijn offer.

16

Hy streckte zijn hant wt met den dranckoffer, ende offerde den rooden wijn.

17

Ende goot aen den bodem des Altaers, tot eenen soeten reucke, den Allerhoochsten, die aller Koninck is.

18

So riepen de kinderen Aarons luyde, ende bliesen met trompetten, ende maeckten groot gheluyt, op dat harer ghedacht werde voor den Allerhoochsten.

19

So viel also haest alle dat volck met eenander ter Aerden, op haer aengesichte, ende baden den Heere, haren Almachtigen Allerhoochsten God aen.

C.20

Ende de Sanghers loefden hem met Psalmen, ende het gantsche huys klanck vanden soeten gheschalle.

21

Ende het volck badt den Heere den Allerhoochsten, dat hy ghenadich zijn woude, tot dat de Godsdienst wte was, ende sy haer ampt gheeyndicht hadden.

22

Wanneer hy dan weder af ghinck, so reckte hy syne hant wt, ouer de gantsche Ghemeynte der kinderen Israels, ende gaf hen den seghen des Heeren met synen monde, ende wunschte hen Heyl in synen Name.

23

So baden sy wederomme, ende namen den seghen aen vanden Allerhoochsten,

24

Ende spraken: Nu dancket alle God, die groote dinghen doet aen allen eynden: die ons van moeders lijue aen, leuendich behoudt, ende doet ons alle goet.

25

Hy gheue ons een ^b vrolick herte, ende verleene alomme vrede te onser tijt in Israel.

b Een goede consciencie.

26

Ende dat syne ghenade alletijdt by ons blijue, ende verlosse ons, so langhe als wy leuen.

27

Tweederley volcken ben ick van herten vyandt: ende den derden ben ick so gram, als eenighen.

28

^c Den Samariteren, den Philisteen, ende den dullen volcke te Sichem.

c Samariters, dat zijn valsche Heylighen ende gheesten, onder Gods kinderen. Philisters zijn boose nabuers ende tyrannen, die niet op en houden Gods woort te veruolgen. Sichem is het onghehoorsame oproerische gemeyn volck, dat Gods woort heeft, ende veracht het.

29

Dese leere ende wijsheyt, heeft Iesus de Sone Syrach van Ierusalem, in dit boeck geschreuen, ende wt syner herten sulcke leere voortghebracht.

D.30

^d Wel dien, die hem hierinne oeffent: ende wie het ter herten neemt, die sal wijs worden.

d

31

Ende so hy daer na doet, so sal hy tot allen dinghen gheschicket zijn: want des Heeren licht leydet hem.