Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlix. Capittel.

Uan den Godsanghen Koninck Iosia, ende syne heerlicke daden. Hoe door de boosheydt der anderer Godloosen Koninghen, de stadt Ierusalem ende alle het volck verdoruen zy. Uan Ieremia, Ezechiel, ende de Propheten daerna. Uan Sorobabel ende Iesu den sone Iosedech. Uan Nehemia, Enoch, Ioseph, Sem, Seth, Adam.

A.1

DE name ^a Iosia, ⁺ is ghelijck als een edel reuckwerck wt der Apoteken.

a 2.Reg. 22.a.2. ende 23.a.4. 2.Para. 34.a.1.

+ Iosia.

2

Hy is soete, ghelijck als honich in den monde, ende als een snarenspel by den wijn.

3

Hy hadde groote ghenade, het volck te bekeeren, ende de grouwelen der Afgoderijen af te doen.

4

Hy waghede het met gantscher herten op den Heere: hy richtede den rechten Godsdienst weder aen, doe het landt vol Afgoderije was.

5

Alle Koninghen, wtghenomen Dauid, Ezechias ende Iosias, hebben hen besondicht.

6

Want sy verlieten de Wet des Allerhoochsten, daerna was het met den Koningen Iuda wt.

7

Want sy moesten haer Koninckrijcke anderen laten, ende hare heerlicheyt eenen vreemden volcke.

8

^b Die verbrandden de wtuerkoren stadt des Heylichdoms, ende maeckten hare straten woest, ghelijck ^c Ieremias ghepropheteert hadde, ⁺ den welcken sy gantsch qualick handelden:

b 2.Reg. 25.a.9.

c Iere. 1.b.11.

+ Ieremias.

9

Die in des moeders lijf tot eenen Propheet wtuerkoren was, dat hy wtroeyen, breken, ende verstooren, ende wederom oock bouwen ende planten soude.

B.10

^d Hesekiel, ⁺ sach de heerlicheyt des Heeren in een ghesichte, dat hy hem wees wt den waghen Cherubim.

d Hesek. 1.a.4.

+ Hesekiel.

11

Hy heeft ghepropheteert tegen de vyanden, ende troost verkondicht dien, die daer recht doen.

12

^e Ende der twaelf Propheten ghebeenten ^* groenen noch, ⁺ daer sy liggen: want sy hebben Iacob ghetroostet, ende verlossinge toegheseyt, die sy ghewislick hopen souden.

e Syrac. 46.b.11.

* Zijn in eeren ende weerden. Syrac. 46.b.25.

+ 12. Propheten.

13

^f Hoe willen wy Sorobabel prijsen? ⁺ die gelijck als een rinck aen der rechteren handt was, ⁺

f Sacha. 3.a.2. Esr. 3.a.2.

+ Sorobabel.

+ Iesus.

14

Ende ^g Iesus den sone Iosedech: welcke tot harer tijdt den Tempel bouweden, ende het heylighe Huys den Heere weder oprichteden, dat daer blijuen soude, tot eener eewigher heerlicheydt.

g Hagg. 1.a.2.

15

^h Ende Nehemias is alle tijdt te louen, ⁺ die ons de verdoruen mueren weder opgherichtet, ende de poorten ghesettet heeft met sloten, ende onse huysen weder ghebouwet.

h Nehem. 1.a.1. ende 7.a.1.

+ Nehemias.

16

Niemandt en is op Aerden gheschapen, die ⁱ Henoch gelijck zy: ⁺ want hy is van der Aerden wech ghenomen.

i Gene. 5.c.22. Hebr. 11.a.5. Syrac. 44.b.16.

+ Henoch.

17

Den ^k Ioseph oock niemandt, ⁺ die daer was een heere ouer syne broederen, ende een behouder zijns volcks: zijn ghebeente werdt wederom na huys ghebracht.

k Gene. 42.e.44. ende 42.a.6. ende 45.a.5. ende 50.c.20.

+ Ioseph.

18

^l Seth ende Sem, zijn onder den lieden in grooten eeren gheweest: maer Adam is gheeert bouen alles wat daer leeft, ^{+ m} dat hy de eerste van Gode gheschapen is. ⁺

l Gene. 4.c.25. ende 5.a.6.d.32. ende 9.c.26.

+ Seth. Sem.

m Gene. 1.c.27.

+ Adam.