Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlvij. Capittel.

Uan den Prophete Nathan, ende den Koninck Dauid: van synen sone Salomo den wijsen.

A.1

DAerna ter tijdt Dauids, ^a propheteerde Nathan.

a oeffende het Prophetische ampt.

2

Ende Dauid was onder den kinderen Israels wtuerkoren, ^{+ +} ghelijck als het vette aen den offer, ⁺ Gode toegheeyghent was.

+ Nathan.

+ 2.Sam. 11.a.11.

+ Dauid.

3

^b Hy ghinck met den Leeuwen omme, gelijck als oft hy met Bocxkens ghespeelt hadde, ende met Beyren, als met Lammeren.

b 1.Sam. 17.d.34. Heb. 11.d.33.

4

^c In syner ieughet sloech hy den Reuse doot, ende nam de versmaetheydt wech van synen volcke.

c Sam. 17.e.49.

5

Hy hief syne handt op, ende wierp met der slingher, ende sloech den stouten Goliath daerneder.

6

Want hy riep den Heere den Allerhoochsten aen, die sterckte hem syne hant, dat hy den stercken Krijger vermoordde, ende den hoorne zijns volcks verhoochde.

7

^d Hy liet hem prijsen, als tien duysendt mannen weerdt, ende eerde hem met Godlicken seghen, dat hy de Konincklicke kroone kreech.

d 1.Sam. 18.a.7. ende 21.b.11. ende 29.a.5.

8

^e Hy sloech de vyanden alomme, ende vernielde de Philisteen, ende syne teghenstrijders: ende brack haren hoorne, ghelijck hy noch hedens daechs ghebroken is.

e 1.Sam. 5.8.a.

9

Voor een yeghelick werck danckte hy den Heylighen den Allerhoochsten, met eenen schoonen liede.

B.10

Hy sanck van gantscher herten, ende hadde dien lief, die hem ghemaeckt heeft.

11

^f Hy stichtede Sanghers by den Altaer, ende lietse syne soete liederen singhen.

f 1.Para. 16.a.4.

12

Ende verordende de Vierdaghen eerlick te houden, ende datmen de Iaerfeesten, het gantsche Iaer ouer, eerlick begaen soude, met louen den Name des Heeren, ende met singhen des morghens in het Heylichdom.

13

^g De Heer vergaf hem syne sonden, ende verhoochde synen hoorne eewichlick: ende maeckte een Verbondt met hem: Dat dat Koninckrijcke ende de Konincklicke stoel in Israel, op hem blijuen soude.

g 2.Sam. 12.b.13.

14

^h Na hem werdt Koninck, ⁺ zijn kloecke sone Salomo, dien de Vader goede ruste ghemaeckt hadde, dat hy in vrede regeerde.

h 1.Reg. 1.d.38. ende 4.c.21.

+ Salomo.

15

Want God hadde het rondtomme, stille ghemaeckt, op dat hy synen Name een huys bouwede, ende een Heylichdom oprichtede, dat voort ende voort bleue.

16

O hoe wel leerdestu in dyner ieughet, ende warest vol verstandts, gelijck als een water het landt bedeckt.

17

Ende hebst het alomme met spreucken ende leeren veruullet.

18

ⁱ Ende dynen Name werdt vermaert, verre in de Eylanden, ende omme dijns vreedts wille, warestu lief ende weerdt.

i 1.Reg. 10.a.1.

19

^k Alle landen verwonderden haer dyner liederen, spreucken, ghelijkenissen ende wtlegginghen, ende loofden den Heere, die daer heet de God Israels.

k 1.Reg. 4.d.31.

C.20

^l Du brachtest so vele gouts voor ooghen, als tin, ende so veel siluers, als loodt.

l 1.Reg. 10.c.21.

21

^m Dijn herte hinck aen den vrouwen, ende lietest dy verdwasen.

m 3.Reg. 11.a.3.

22

Ende hinghest dyner eere een schandtulecke aen, ende maecktest, dat dyne kinderen moesten verworpen zijn, ende den toorne ouer dyne nakomelinghen ghinck, ter straffe dyner dwaesheyt.

23

ⁿ Doe het Koninckrijcke ghedeylt werdt, ende in Ephraim een Afgodisch Koninckrijcke opstondt.

n 1.Reg. 12.b.16.

24

^o Maer de Heere en wendde hem niet van syner barmherticheyt, ende en veranderde zijn beloefde werck niet,

o 2.Sam. 7.b.15.

25

Ende en vernielde niet gantschelick zijns wtuerkoren nakomelinghen, ende en nam niet wech, het zaedt zijns liefhebbers.

26

Maer behieldt noch wat ouer van den volcke Iacobs, ende eenen wortel van Dauid.

27

Ende Salomo ontsliep met synen vaderen.

28

Ende liet na van synen zade, ⁺ Roboam, eenen onwijsen man het volck te regeren, die gheen verstandt en hadde, die ^p het volck met synen eyghenen sin, afuallich maeckte.

+ Roboam.

p 1.Reg. 12.a.1.

29

^q Daertoe Ierobeam den sone Nebat, ⁺ die Israel ter Afgoderije brachte, ende leydde Ephraim in sonden.

q 1.Reg. 12.b.29.

+ Ierobeam.

30

Ende harer sonden werden gantsch veel, ^r dat sy ten laetsten wt haren lande verdreuen werden.

r 4.Reg. 17.a.6.

31

Want sy bedachten allerley Afgoderije, so langhe, dat de wrake ouer haer quam.