Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlvj. Capittel.

Uan Iosue den Hooftman ende syne vrome daden. Item van synen medegheselle Chalep. Uan de Richters ende Ouerste in Israel tot Samuel, die een ghetrouwe Propheet ende Ouerste was in het volck Gods.

1

IEsus Naue, ⁺ was een Heldt in den strijdt, ^a ende een Propheet na Mose,

+ Iesus Naue, Iosu. 12.a.7.

a Num. 27.b.18. Deut. 34.a.9. Iosu. 1.a.1. Iesus, heet een Heylandt, oft Ouerwinner inden strijde, dienmen anders Seghemondt heet, doch onrechtelick.

2

Die daer groote ouerwinninghe hadde, voor de wtuerkorene Gods, (als zijn name mede brenghet) ende wreectese aen de vyanden, van de welcke sy aengegrepen werden: op dat Israel zijn erue kreghe.

3

^b Hy heeft eere verkreghen, doe hy de handt wtreyckte, ende het sweerdt tooch teghen de steden.

b Iosu. 8.b.10.

4

Wie heeft oyt so vrijmoedichlick ghestaen? hy vinck de vyanden des Heeren.

5

^c Om synent wille stondt de Sonne stille, ende een dach werdt so lanck als twee.

c Iosu. 10.b.12.

6

Hy riep den Allerhoochsten ende Machtighen aen, doe hy syne vyanden oueral benauwede.

7

Ende de Heere de Groote, verhoorde hem, liet gantsch ^d groote haghelsteenen op de vyanden vallen, ende sloech de teghenstrijders doodt, doe sy af toghen.

d Iosu. 10.b.11.

8

Ende de Heydenen werden ghewaer, wat dese voor geschutt hadden, ende dat de Heere selfs teghenwoordich in den strijdt ware, ende hy iaechde den Gheweldighen na.

9

^e Ende ter tijdt Mose, dede hy ende Caleb, ⁺ de sone Iephunne, een goedt werck: doe sy stonden tegen den hoop, ende beletteden den volcke de sonde, ende stilden den schadelicken oproer.

e Num. 13.d.30.

+ Caleb.

[fol. 44r]

B.10

^f Daerom zijn sy oock beyde alleen behouden, onder ses hondert duysent mannen, ende hebben het volck tot de erue gebracht int landt, daer melck ende honich inne vloeyt.

f Num. 14.d.38. ende 39.g.64. Deut. 1.d.39.

11

^g Ende de Heere behieldt Caleb by lijfs krachten, tot in zijn ouderdom, dat hy op tooch op het gheberchte, in het landt, ende zijn zaedt besat het erue.

g Iosu. 14.b.11.

12

Op dat alle kinderen Israels sagen, hoe goet dat het is, den Heere ghehoor gheuen.

13

Ende de Richters, ⁺ een yegelick na synen name,

+ Richter.

14

die gheene Afgoderije bedreuen, noch van den Heere afuielen, werden oock ghepresen.

15

^h Hare ghebeenten groenen noch altoos, daer sy ligghen: ende haren name wordt gepresen in haren kinderen, op de welcke hy gheeruet is.

h Syrac. 49.b.12.

16

ⁱ Ende Samuel de Propheet des Heeren, ⁺ van synen gode ghelieft, richtede een Koninckrijcke aen, ende saluede Vorsten ouer zijn volck.

i 1.Sam. 10.a.1. ende 16.b.13.

+ Samuel.

17

^k Hy richtede de Ghemeynte na de Wet des Heeren, ende de Heere sach Iacob weder aen.

k 1.Reg. 12.a.1.

18

Ende de Propheet werdt oprecht, ende ghetrouwe beuonden, ende men bekende, dat syne propheteringhen ghewislick waer werden.

19

^l Hy riep den Heere den Machtighen aen, doe hy syne vyanden oueral benaude, ende ionghe lammeren offerde.

l 1.Sam. 7.a.9.

C.20

Ende de Heere donderde van den Hemel af, ende liet hem hooren met eenen grooten onweder.

21

Ende sloech de Vorsten te Tyro, ende alle heeren der Philisteen.

22

^m Ende voor zijn eynde, eer hy sterf, betuychde hy voor den Heere, ende synen Ghesalfden, dat hy van gheenen mensche, gheldt, oock niet eenen schoe ghenomen en hadde: ende gheen mensche en konde hem van yet beschuldighen.

m 1.Sam. 12.a.3.

23

ⁿ Ende doe hy nu ontslagen was, ^o propheteerde hy, ende verkondichde den Koninck zijn eynde: ende liet hem hooren, wt der Aerde, ende prooheteerde, dat de Godloose lieden souden vergaen.

n 1.Sam. 28.b.15.

o Dat en dede Samuel niet, als hy wt Iodischen verstande, meynet, maer een Gheest in Samuels name.