Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlv. Capittel.

Uan den ghetrouwen ende vromen Prince Mose: van Aaron synen broeder, ende van den gheslachte Leui, wt welcken dat Priesterdom verkoren werdt. Uan de vercieringhe ende bekleedinge des hoochsten Priesters. Uan de straffe Datans, Abirams, ende Korah der oproerighen. Uan den vromen man Pinchas, ende zijn manlicke daedt.

27

HI heeft van hem komen laten, den heylighen man ^a Mosen, ⁺

a Exo. 11.a.3.b.10. Act. 7.c.20.

+ Moses.

A.1

die aller wereldt lief ende weerdt was, ende dien beyde God ende de menschen ^* gonstich waren, diens name hooch ghepresen wordt.

* Dat is, Met liefde ende gonst toebiedich, toegheneghen.

2

Hy heeft hem oock gheeert, als de heylighe Vaders, ende hooch verheuen, dat hem de vyanden vreesen moesten, ^b ende liet hem met woorden vele teeckenen doen.

b Exod. 6.a.8.

3

^c Hy maecte hem heerlic voor den Koningen, ende gaf hem beuel aen zijn volck, ende wees hem syne heerlicheyt.

c Exod. 11.a.3.

4

Hy heeft hem wtuerkoren tot eenen heyligen staet, ^d om syner trouwe ende saechtmoedicheyt wille, ende wt allen menschen verkoren.

d Dat hy Gods alleen plegen soude. Exod. 19. 20.

5

Hy liet hem hooren zijn stemme, ende voerde hem in de duystere wolcken.

6

^e Hy heeft hem teghenwoordich de gheboden ghegheuen, namelicken, de Wet des leuens ende der wijsheyt, dat hy Iacob soude het Verbont leeren, ende Israel syne rechten.

e Exod. 19. 20.

7

^f Hy heeft Aaron synen broeder, ⁺ wt denseluen gheslachte Leui, oock verhoocht, ende hem ghelijck wtuerkoren.

f Exod. 4.b.14.

+ Aaron.

8

^g Hy maeckte een eewich Verbont met hem, ende gaf hem het Priesterdom inden volcke: hy heeft hem eerlicken ende schoon ghekleedet, ende dede hem eenen eerlicken rock aen, ende tooch hem allerley vercieringhe aen.

g Exod. 28.a.1.

9

Hy vercierde hem met kostelicken gesmijde, ende tooch hem aen het nederkleedt, den langen rock, ende den lijfrock.

B.10

^h Ende hinck vele guldene klocxkens ende knoopen rondtom aen hem: dat hy kloncke, als hy wt ende in ghinghe,

h Exod. 28.d.33.

11

Ende de klanck ghehoort werde in het Heylichdom, op dat zijns volcx voor God gedacht werde.

12

Ia den heyligen rock met goude, geler sijden, ende scharlaken ghestickt: het Machtschildeken op der borst, met ⁱ den Lichte ende Rechte,

i Exod. 28.d.30.

13

Konstlick ghewracht, met den edelen steenen, daer de namen der twaelf stammen Israels in ghegrauen, ende in goudt vast ghemaeckt waren, door den Steensnijder: op dat harer gedacht werde voor Gode.

14

Het gulden Voorhooftbladt aen den hoedt, daer de Heylicheyt in ghegrauen was, welck alle, heerlick, kostlick, lieflick ende schoon was.

15

Men heeft desgelijcken voor hem noyt gesien.

16

Oock en moestese gheen ander aentrecken, sonder alleen syne kinderen, ende kindtskinderen, voort ende voort.

17

Syne offeren werden dagelicx tweemael volbracht.

18

^k Moses vulde hem de handen, ende salfde hem met der heyligher Olye.

k Exod. 30.d.30. Leuit. 8.b.12.

19

Met hem werdt het Verbondt ghemaeckt, dat hy ende syne sonen eewichlicken, so langhe als de daghen des Hemels dueren, hem dienen, Priester zijn, ende zijn volck in synen Name seghenen souden.

C.20

Hy heeft hem verkoren wt allen leuendigen, dat hy den Heere offeren soude, spijsoffer ende reuckoffer ten soeten reucke, ende ghedachtenisse, het volck te versoenen.

21

^l Hy beual hem het ampt zijns woordts, dat hy Iacob syne ghetuyghenissen leeren, ende Israel met syner Wet verlichten soude.

l Deut. 17.a.8. ende 21.a.5. Malea. 2.a.5.

22

^m Daer verhieuen hen wel andere tegen hem, ende benijdeden hem in der woestijne: Namelick, die met Dathan ende Abiram waren, ende de woedende rotte Korah. ⁺

m Num. 16.a.1. ende 26.a.9. Psalm. 106.b.16.

+ Dathan. Abiram.

23

Maer de Heere sach het, ende het en behaechde hem niet, ende sy werden verslonden in grimmighen toorne.

24

Hy bewees een schricklick wonder aen hen, ⁿ ende verslondese in synen vyere.

n Num. 16.d.35.

25

^o Hy eerde Aaron noch meer, ende gaf hem een erfdeel, namelicken, alle eerstelinghen deelde hy hem toe: ^p voor allen anderen verordende hy hem een eersten broodts ghenoech.

o Num. 17.a.7.

p Exod. 25.d.32. Leuit. 24.a.9.

26

Want sy souden eten des Heeren offer, die hy hem ende synen zade gaf.

27

^q Maer sy en moesten gheen deel aent landt hebben, noch met den volcke eruen, maer de Heere was haer deel ende erue.

q Deut. 12.b.12. ende 18.a.1.

28

^r Pinehas de sone Eleasar, was de derde in sulcker eere.

r Num. 25.a.7. 1.Macha. 2.f.54.

29

Die ijuerde in der vreese Gods: ende doe het volck afuiel, stondt hy trouwelick, vaste ende koene, ende versoenede Israel.

D.30

Daeromme werdt hem ghegheuen ^s het Verbondt des vredes, ⁺ dat hy den Heylichdom ende den volcke voorstaen, ende hy ende zijn zaedt, de Priesterlicke weerdicheydt, eewichlick hebben soude.

s Malea. 2.a.4.

+ Pinehas.

31

^t Ghelijck als met Dauid wt den stamme Iuda, het Verbondt ghemaeckt is, dat alleen van synen sonen, een Koninck zijn sal: also sullen ooc Aaron ende zijn zaedt, de eruen zijn, datmen ons wijsheyt leere, ende zijn volck recht regere: op dat haer zaedt ende heerlicheydt niet ondergae, maer voort ende voort by hen blijue.

t 2.Reg. 7.b.12.