Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xliiij. Capittel.

Een lof ende prijs der Godsalighen ouden vaderen, ende stercken Princen, door de welcke God zijn macht ende wijsheyt op Aerden bewesen heeft, hare heerlicke daden etc. Namelick, Enoch, Noe, Abraham, Isaac, Iacob.

A.1

LAtet ons de vermaerde lieden louen, ⁺ ende onse vaders, na eenander.

+ Lof der beroemden lieden, van aenbeghinne der wereldt.

2

Veel heerlicks dings heeft de Heere by hen ghedaen, van den beghinne, door syne groote macht.

3

Sy hebben hare Koninckrijcken wel gheregeert, ende loflicke daden ghedaen: sy hebben wijslick gheraden ende ghepropheteert.

4

^a Sy hebben landen ende lieden gheregeert, met raedt ende verstandt der Schrift.

a Exod. 18.c.21.

5

Sy hebben Musicam geleert, ende Gheestelicke liederen ghedichtet.

6

^b Sy zijn oock rijck gheweest, ende hebben groote goeden ghehadt, ende in vrede gheregeert, dewijle sy hier gheweest zijn.

b Gene. 13.a.6. ende 26.b.12. ende 36.a.7.

7

Also zijn sy alle te haren tijde loflick geweest, ende by haren leuen ghepresen.

8

Ende hebben eenen eerlicken name ghelaten.

9

Maer de andere en hebben gheenen roem, ^c ende zijn vergaen, ghelijck oft sy noyt en waren gheweest:

c Gene. 7.b.11.

B.10

Ende doe sy noch leefden, waren sy euen, als en leefden sy niet, ende hare kinderen na hen oock also.

11

Maer ghenen heylighen lieden, welcker gherechticheydt niet vergheten en wordt, is een goede erue ghebleuen, met tsamen haren kinderen.

12

Hare nakomelinghen zijn in den verbonde ghebleuen,

13

Ende om harent wille, zijn hare kindtskinderen, oock voort ende voort ghebleuen, ende haer lof en sal niet ondergaen.

14

Sy zijn in vrede begrauen, maer haer name leeft eewichlick.

15

^d De lieden spreken van harer wijsheyt, ende de Ghemeynte verkondicht haren lof.

d Syrac. 39.b.14.

16

^e Enoch behaechde den Heere wel, ⁺ ende is wech ghenomen: op dat hy der wereldt een vermaninghe ter boete ware.

e Gene. 5.c.22. Hebr. 11.a.5. Syrac. 49.b.10. Sapi. 4.a.4.

+ Enoch.

17

^f Noe werdt onstraflick beuonden, ende ter tijdt des toorns, heeft hy ghenade gheuonden, ⁺

f Gene. 6.a.9. ende 7.a.1. Hebr. 11.a.7.

+ Noe.

18

Ende is ouerbehouden op der Aerden, doe de Sondtuloedt quam.

19

^g Hy ontfinck het verbondt voor de wereldt, dat niet meer, alle het vleesch, door de Sondtuloedt wtgheroeyet worden en soude.

g Gene. 9.a.8.

C.20

^h Abraham de hoochberoemde vader veler volcken, ⁺ en heeft zijns gelijcken niet in der eere.

h Gene. 17.a.2. ende 22.a.1. Hebr. 11.b.17.

+ Abraham.

21

Hy hieldt de Wet des Allerhoochsten, ende God maeckte met hem een Verbondt, ⁱ ende stichtede dat selue Verbondt in zijn vleesch: ^k ende hy werdt ghetrouwe beuonden, doe hy versocht werdt.

i Gen. 17.b.10.

k Gene. 22.a.1.

22

^l Daeromme beloefde hem God met eenen eede: Dat door zijn Zaedt, de Heydenen souden gheseghent worden, ende hy, ghelijck als de stof der Aerden, vermeert worden.

l Gene. 22.b.18. Hebr. 11.b.17.

23

^m Ende zijn zaedt verhooghet ghelijck de sterren, ende eruen worden, van de eene Zee tot de ander, ende van den Water aen, tot aen der werelts eynde.

m Psalm. 72.a.8.

24

ⁿ Ende hy heeft den seluen seghen ouer alle menschen, ^o ende dat Verbondt oock also beuesticht, ⁺ met Isaac, om zijns vaders Abrahams

n Gene. 26.a.2.

o Gene. 26.a.4.

+ Isaac.

[fol. 43v]

wille:

25

ende heeft het op ^p Iacob komen ende blijuen laten. ⁺

p Gene. 28.b.14.

+ Iacob.

26

^q Hy heeft hem ghenadichlick gheseghent, ende de erue ghegheuen, ^r ende zijn deel afghesondert, ende in de twaelf stammen ghedeylet.

q Gene. 28.b.13. ende 29. 30.

r Iosu. 18. 19.