Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xlij. Capittel.

Hoemen hem niet schamen en sal. Wat sorghe ende angst de kinderen den ouderen aendoen. Hoemen de dochteren houden sal. Uan de macht ende wijsheydt Gods.

A.1

MAer deser stucken en schaemt dy niet, ^{+ a} ende en doet om niemandts wille onrecht.

+ In desen stucken en sal hem niemandt schamen.

a Leuit. 19.b.15. Deut. 1.b.17. ende 16.b.19. Prouer. 24.c.23. Iaco. 2.a.1.

2

Namelicken des Wets ende Verbondts des Allerhoochsten, ^b den Godureesenden by recht te behouden.

b Psal. 119.e.46. Rom. 1.b.16. 2.Tim. 1.a.8.

3

Trouwelijck te handelen teghen den naesten ende ghesellen: den vrienden het erfdeel toe te wenden:

4

^c Vlijtich zijn rechte mate ende ghewichte te houden: ^d te vreden zijn, als du veel ofte weynich winnest.

c Leuit. 19.d.36. Deut. 25.b.15. Prouer. 20.b.10.

d Syrac. 29.d.30. ende 41.a.8. 1.Tim. 6.a.8.

5

Recht handelen, met den tijdtlicken goede, in koopen ende verkoopen: ^e de kinderen met vlijte te onderwijsen: ^f den boosen knecht wel te geesselen.

e Deut. 6.a.7. Prouerb. 13.c.24. ende 23.b.13. Syrac. 7.c.25. ende 30.a.1.

f Syrac. 33.d.34.

6

Voor eenen boosen wijue het dyne wel bewaren: waer veel toegrijpens is, alle dinck wel besluyten.

7

Watmen hen moet onder de handen geuen, alle tellen ende afweghen: alle wtgheuen ende ontfanghen aenschrijuen.

8

De onuerstandighen ende dwasen onderwijsen, oock de gantsch oude lieden, dat sy niet met den Ionghen en twisten, also worstu een recht wel gheschicket mensche, ende by allen lieden gheloeft.

9

Een dochter die noch onberaden is, ⁺ die maect den vader veel wakens, ende het sorghen voor haer, beneemt hem veel slaeps, dewijle dat sy ionc is, dat sy mochte verouden: oft wanneer sy eenen man krijcht, dat hy haer mochte ^g gram worden:

+ Sorge voor de dochteren.

g Of, hatisch, vyandisch

B.10

Ofte dewijle dat sy noch maghet is, ^h dat sy mochte gheschendet, ende in des vaders huyse swanger worden: ofte wanneer sy by den manne is, dat sy haer niet recht houden en mochte, ofte hy gheene kinderen met haer hebben en konde.

h Gene. 34.a.1. 2.Reg. 13.b.14.

11

ⁱ Wanneer dijn dochter niet schaemachtich en is, so houdtse hardt: dat sy dy niet dynen vyanden tot eenen spott make, ende de gantsche stadt van dy segghe: ende du van eenen yegelicken schande hooren, ende dy voor alle lieden schamen moetest.

i Syrac. 26.b.13.

12

^k Siet niet om na schoone menschen, ende en weest niet so gheerne by den vrouwen.

k Syrac. 9.a.5. ende 25.c.28.

13

Want ghelijck als wt den kleederen motten komen, ^l also koemt van den vrouwen veel booses.

l Gene. 3.a.6. 3.Reg. 21.a.7.

14

Het is sekerder by eenen boosen man te zijn, dan by een vrientlick wijf, ^m die eenen tot smaet ende tot spott maeckt.

m Iudic. 16.b.16.

15

^* Ick wil prijsen des Heeren ⁿ wercken, ende wt der heyligher Schrift, syne wercken verkondighen, als ickse ghelesen hebbe.

* Cap. xliij. Lu. Gods wercken zijn onbegrijplick.

n Gene. 1. 2.

16

^o De Sonne gheeft aller wereldt het licht, ende haer licht is het allerklaerste licht. ⁺

o Gene. 1.b.16. 4.Esd. 6.e.45. Psalm. 19.a.5. ende 136.a.8.

+ Sonne.

17

Het en is oock den Heylighen van den Heere noch noyt ghegheuen, dat sy alle syne wonderen wtspreken konden, want de Almachtighe Heere heeftse te groot ghemaeckt, ende alle dinghen zijn te groot, na harer weerde te louen.

18

Hy alleene ^p ondersoeckt den afgrondt ende ^q der menschen herte, ^r ende weet, wat sy dencken: ^s want de Heere weet alle dinck, ende siet, tot welcker tijdt een yeghelick gheschieden sal.

p of, doorgrondet

q 1.Reg. 16.a.7. Ierem. 17.b.10. Psalm. 7.b.10.

r Hiob. 41.a.2. Hebr. 4.b.12.

s Ioan. 16.d.30. ende 21.b.17.

19

^t Hy verkondighet, wat verganghen ende wat toekoemstich is, ende openbaert wat verborghen is.

t Iesa. 46.a.9.

C.20

^u Hy verstaet alle heymelicheyt, ende hem en is gheene sake verborghen.

u Hiob. 42.a.2. Iesa. 29.c.20.

21

Hy bewijset syne groote wijsheydt heerlick, ^x ende hy is van eewicheyt tot eewicheyt.

x Hebr. 1.a.8.

22

Men kan hem noch grooter noch minder maken, ^y ende hy en behoeft gheens raedts.

y Iesa. 4.b.13. Sapi. 9.b.17. Rom. 11.d.34. 1.Corint. 2.b.16.

23

Hoe lieflick zijn alle syne wercken, hoewel men nauwe een voncxken daer van bekennen kan.

24

Sy leuen alle, ende blijuen voort ende voort, ende waer toe hy harer behoeft, daer zijn sy alle ghehoorsaem.

25

Daer zijn altijdts twee teghen twee, ende een teghen een, ^z ende wat hy maeckt, daer en is gheen ghebreck aen.

z Deut. 32.a.4.

26

Ende heeft een yeghelick gheordineert, waer toe het sonderlick nutt zijn sal.