Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxvj. Capittel.

Een hertelick ghebedt tot God om hulpe, ende temminghe der vyanden. Uan den lof eens godsalighen wijfs.

A.1

HEere Almachtighe God, ⁺ ontferme dy onser,

+ Een gebet, dat God moge bekent, ende den vyanden ghestuert worden.

2

ende siet daer in, ende verschrickt alle volcken.

3

Heft dijn hant op ^a ouer de vreemden, dat sy dyne macht sien.

a Ierem. 10.c.25.

4

Gelijck als du voor haren ooghen warest by ons: also vertoocht dy heerlicken aen hen, voor onsen ooghen.

5

Op dat sy bekennen, ghelijck als wy bekennen, ^b dat daer gheen ander God en zy, dan du Heere alleen.

b Deut. 32.d.39. Esai. 43.b.10. ende 45.a.5.

6

^c Doet nieuwe teeckenen, ende nieuwe wonderen.

c Actu. 4.d.30.

7

Bewijst dijn handt, ende dynen rechten arm heerlicken.

8

Verweckt de grimmicheydt, ende ghiet den toorne wt.

9

Ruckt den Teghenpartijder wech, ende vernielt den Vyandt.

B.10

Ende haest dy daermede, ^* ende denckt aen dynen Eedt, op datmen dyne wonderdaet prijse.

* Iudit. 9.b.18.

11

De toorne des vyers, moetse verteeren, die so seker leuen, ende die dynen volcke leedt doen, moeten ymmers vergaen.

12

Vermorselt dat hooft der Vorsten, die ons haten, ende segghen: Wy zijn het ^d alleen.

d God is niets. Esai. 47.a.8.

13

Versamelt alle stammen Iacobs, ende laetse dijn erue zijn, ^e ghelijck als van den beghinne.

e Deute. 4.c.20. ende 7.a.6. ende 10.b.15.

14

Ontferme dy dijns volcx, dat van dy den name heeft, ende Israels, ^f dien du noemest dynen eersten sone.

f Exod. 4.c.22. Hose. 11.a.1.

15

Ontfermt dy der stadt Ierusalem, daer dijn Heylichdom is, ^g ende daer du woonest.

g 2.Para. 6.d.38. 3.Reg. 9.a.3. Syrach. 24.b.14.

16

Richtet Zion weder op, dat aldaer dijn woort weder opgae, dat dijn eere in den volcke groot worde.

17

Verthoont dy teghen dien, die van den beghinne dijn ^h Eyghendom gheweest zijn, ende veruullet de prophecien, die in dynen Namen, verkondighet zijn.

h Exod. 19.a.5. Deute. 14.a.2.

18

Vergheldet dien, die op dy wachten, op dat dyne Propheten warachtich beuonden worden.

19

Verhoort Heere het gebet dier, die dy aenroepen, ⁱ na den seghen Aaron, ouer dijn volck: op dat alle, die op Aerden woonen, bekennen, dat du Heere, de eewighe God bist.

i Als Nume. 6.c.29. staet, dat sy het volck souden seghenen in Gods Name.

C.20

^* De buyck neemt allerley spijse tot hem: doch is een spijse beter, dan de ander.

* Cap. xxxvij. Luth.

21

Ghelijck als de tonge het wildtbraet smaect: ^k also merckt een verstandigh herte, de valsche woorden.

k 1.Corint. 2.b.15.

22

Een bedrieghelick mensche, kan eenen in een ongheluck brenghen: maer een die veruaren is, ^l weet hem daer voor te hoeden.

l Syrach. 6.a.7.

23

De moeders hebben alle sonen lief, ende een dochter gheraeckt doch somtijdts beter dan de sone.

24

Een schoon wijf verblijdt haren man, ⁺ ende een man en heeft niet lieuers:

+ Lof eener deuchsamer vrouwen.

25

Als sy daertoe vriendtlick ende vroom is, so en vindtmen des mans ghelijcken niet.

26

Wie een huysurouwe heeft, die brengt zijn goedt tot nut, ende heeft eenen trouwen Hulper, ende eenen pilaer, daer hy hem op troosten kan.

27

Waer gheenen thuyn en is, daer wordt het goet verwoestet: ende waer gheen huysurouwe en is, daer gaet het den huysweerdt, ghelijck of hy verdwaelt ghinghe.

28

Ghelijck alsmen eenen Stratenroouer niet en vertrout, die van eener stadt in de ander sluypt: also en betroutmen oock eenen manne niet, die gheenen nest en heeft, ende ter herberge trecken moet, waer hy te laet koemt.