Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxv. Capittel.

Een welbehaghende offerhande, is de onderhoudinghe der gheboden Gods, danckbaerheyt, barmherticheyd, het quaet laten. God is een Beschermer der weduwen ende weesen ende aller verdruckten, ende hoort haer ghebedt dat sy tot hem doen.

A.1

GOds ghebodt houden, dat is een rijck offer.

2

^a Gods ghebodt groot achten,

a 1.Samu. 15.c.22 Ierem. 7.a.3.

3

dat offer helpet wel.

4

Wie God danct, dat is een recht Semeloffer: ^b wie barmherticheydt doet, dat is het rechte Danckoffer.

b Philip. 4.b.18. Hebre. 13.b.16.

5

Aflaten van den sonden, dat is een Godsdienst, die den Heere behaecht: ende ophouden onrecht te doen, dat is een recht Soenoffer.

6

^c Maer du en salt daerom ^d niet ledich voor den Heere verschijnen,

c Exod. 23.b.15. ende 34.c.20 Deuter. 10.b.16.

d Ghelijck als sy segghen, Helpen de goede wercken niets, so willen wy niets doen: waertoe sullen ons dan de Papen?

7

Want sulcks moetmen oock doen, om Gods ghebodts wille.

8

^e Des Rechtueerdighen offer, maeckt den Altaer rijck, ende synen reuck is soete voor den Allerhoochsten.

e Gene. 4.a.4. ende 8.c.21.

9

Des Rechtueerdighen offer is aenghenaem, ende desseluen en wordt nemmermeer uergheten.

B.10

^f Gheeft God zijn eere met vrolicken ooghen, ende dyne eerstlinghen sonder alle ghebreck.

f Prouer. 3.a.9. Deute. 36.a.2.

11

^g Wat du ^h gheeft, dat gheeft gheerne, ende heylighet dyne Tienden vrolicken.

g 2.Corint. 9.a.7.

h Den Priesteren ende Leuiten.

12

ⁱ Gheeft den Allerhoochsten, daer na als hy dy verleent heeft, ende wat dijn hant vermach, dat gheeft met vrolicken ooghen.

i Tob. 4.a.8.

13

Want de Heere die een verghelder is, sal het dy seuenuoudich verghelden.

14

^k Maect gheen verkortinge van dyner gaue, want het en is niet aenghenaem.

k Leuit. 22.b.18. Deute. 15.c.21.

15

Soeckt gheen vordeel, wanneer du offeren salt: want de Heere is een wreker, ^l ende voor hem en is gheen aensien der persoonen.

l Deut. 10.b.17. 2.Para. 19.a.7. Actu. 10.d.34. Rom. 2.b.11.

16

^m Hy helpet den armen, ende en siet gheene persoonen aen, ende hy hoort het ghebet diens, die onrecht lijdt.

m Exod. 3.a.7. Iudith. 4.b.11.

17

Hy en verachtet des weesen gebet niet, ⁺ noch de weduwe, wanneer sy klaghet.

+ Het gebet der armen, ellendighen ende weduwen, verhoort God.

18

De tranen der weduwen vlieten wel van der wanghen nederwaerdts:

19

maer sy schreyen opwaerts, teghen dien, diese wt drenghet.

[fol. 40v]

C.20

Wie God Dienet met lust, die is aenghenaem, ende zijn ghebet reyckt tot in de wolcken.

21

ⁿ Het ghebet der ellendighen, ⁺ drenget door de wolcken, ende en laet niet af, tot dat het daer toe komet, ende en houdt niet op, tot dat de Allerhoochste daer in siet.

n Threno. 3.e.44. Actu. 10.a.2. Exod. 3.a.7. Tob. 3.b.18.

+ Het roepen der ellendigen komet voor God.

22

Ende de Heere sal recht oordeelen, ende straffen, ende het niet vertrecken, noch langhen tijdt lijden.

23

Tot dat hy den onbarmhertigen de lendenen ^o in stucken slae, ende hem aen sulcke lieden wreke, ende wtroeye alle die, die ghenen beleedighen, ende dat gheweldt der onrechtueerdighen neder storte,

o ontwee, te morsel slae,

24

^p Ende geue eenen yeghelicken na syne wercken, ende loone hen, als sy het verdient hebben.

p Ierem. 17.b.10. Psalm. 28.a.4. ende 62.b.13. Iob. 34.b.11. Rom. 2.a.6. Apocal. 2.c.23.

25

Ende wreke zijn volck, ende verheughese met syner barmherticheyt.

26

Ghelijck als de reghen te rechter tijt koemt, alst drooghe is: also koemt de barmherticheydt oock in der noodt ter rechter tijdt.