Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 39v]

Dat xxxij. Capittel.

De verkiesinghe tot het ampt der Ouericheydt, sal den mensche niet hoochmoedich ende stout maken, maer sorchfuldich, neerstich ende ghetrouwe ouer die, die hem beuolen zijn: ende andere schoone leeringhen.

A.1

MAer houdt dy, ghelijck als sy, ende richt dy na hen, so sitstu recht.

2

Ende gheeft daertoe, wat dy behoort, wiltu mede sitten.

3

Op dat sy met dy vrolick zijn moghen, ende du de eere daer van krijghest, datmen dy eenen zedighen vriendtlicken man heete.

4

De Oudtste sal spreken: want het behoort hem, als die veruaren is:

5

ende verhindert de speellieden niet.

6

Ende wanneermen liederen singhet, so klapt daer niet in, ^a ende spaert dyne wijsheydt, tot eenen anderen tijdt.

a Eccle. 3.a.7. Syrach. 20.a.7.

7

Ghelijck als een Robijn in fijnen goude lichtet, also verciert een ghesanck de collacie.

8

Ghelijck als een Smaragde in schoonen goude staet,

9

also vercieren de liederen by den goeden wijn.

B.10

^b Een Ionghelinck mach oock wel eenmael ofte twee spreken, alst hem van nooden is.

b Hiob. 32.a.6.

11

Ende alsmen hem vraghet, so sal hy het kort maken, ende hem houden, als die niet vele weet, ende lieuer swijghe.

12

Ende sal hem den heeren niet ghelijck achten, ende als een oudt man spreeckt, daer niet in klappen.

13

Donderen brengt grooten ^* blixem,

* De blixem maect voor het donderen, alle dinck haestelick vol lichts: also maeckt schaemachtigcheydt haest gonst by alleman, want alle de wereldt heeft eenen tongen menschen lief, wanneer hy schaemachtich is, ende wederom is alle de wereldt vyandt der onbeschaemder ieughet.

14

schaemte maeckt groot gonste.

15

Staet oock by tijden op, ende en weest niet de laetste, maer gaet haest te huys.

16

Ende spelet aldaer, ende doet wat du wilt: doch dat du niet quaets en doest, ende niemandt ^c pocchest.

c Het huysgesin ofte de vrouwe slaeft: maer spelet, dat is, weest vrolick met hen.

17

Maer danckt voor dat alle, dien, die dy gheschapen, ende met synen goederen versadighet heeft.

18

^* Wie den Heere vreeset, die laet hem gheerne onderwijsen: ende wie hem vroech daer toe schicket, die sal ghenade vinden.

* Cap. xxxiij. Luth. Gods vreese.

19

Wie na Gods woort vraghet, die sal het rijckelick verkrijghen: wie het nu niet met ernste meynt, die wort daer door slechs ergher.

C.20

Wie den Heere vreeset, die treft de rechte leere, ende maeckt de gherechticheydt te lichten, als een licht.

21

Een Godloose en laet hem niet straffen: ende weet hem te behelpen met andere lieden ^d exempel in zijn voornemen.

d Ick en sie niet, dat het genen qualick gaet, die doch oock Gods woort niet en achtet, etc. Ia hoe booser schalck, hoe beter gheluck.

22

Een vernuftich man, en verachtet goeden raet niet:

23

maer een wilt ende hooueerdich mensche, vreeset hem niet, hy hebbe oock ghedaen, wat hy wil.

24

Doet niet sonder raedt: so en berouwet dy niet na der daedt.

25

Gaet niet den wech, daer du vallen mochtest, noch daer du dy aen de steenen stooten mochtest: verlaet dy daer niet op, dat den wech ^e slicht zy.

e Het schijnet, gelijck of de boosen op ijdel gheluck, gingen maer ten laetsten stort hen de wech in den afgrondt.

26

Ia, hoedt dy oock voor dyne eygen kinderen.

27

^f Wat du voorneemst, so betrouwet God van gantscher herten: want dat is Gods ghebodt houden.

f Op God vertrouwen.

28

Ende wie den Heere betrouwet, dien en sal niets ghebreken.