Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxx. Capittel.

Wie syne kinderen lief heeft, die straft, onderwijst ende castijdtse. Wat groote gaue ghesontheyt zy.

A.1

VVie ^a zijn kindt lief heeft, ⁺ die houdt het ^b altijts onder de roede, op dat hy hiernamaels vreuchde aen hem beleue.

a Prouer. 13.c.24 ende 23.d.13.

+ Kindertucht.

b allewech

2

Wie zijn kindt castijdt, die sal hem daer ouer verblijden, ende en derf hem daerom by den bekenden niet schamen.

3

^c Wanneer een zijn kindt onderwijst, ⁺ dat verdriet synen vyandt, ende verblijdt synen vrienden.

c Deute. 6.a.7.

+ Kinderen salmen straffen, ende wat leeren laten.

4

Want of zijn vader sterft, so isset doch, als en ware hy niet ghestoruen: want hy heeft zijns gelijcken achterghelaten.

5

Doe hy leefde, sach hy synen lust, ende hadde vreuchde aen hem: doe hy sterf, en dorste hy niet sorghen.

[fol. 39r]

6

Want hy heeft eenen Beschutter nagelaten, teghen syne vyanden, ende die den vrienden weder dienen kan.

7

Maer wie synen kinde te saechte is, die beklaget syne striemen, ende verschricket so dickmael als het weenet.

8

Een verweent kindt, wort moetwillich, ghelijck als een wildt peert.

9

Vleyet met dynen kinde, so moestu dy hiernamaels voor hem vreesen: spelet met hem, so sal het dy hiernamaels bedroeuen.

B.10

Schimpet niet met hem, op dat du niet met hem hiernamaels treuren moetest, ende dyne tanden ten laetsten knirschen moeten.

11

^d Laet hem synen wille niet in der ieughet, ende ontschuldighet zijn dwaesheyt niet.

d Syrach. 7.c.25.

12

Buyghet hem den hals, dewijle dat het noch ionck is, blouwet hem den rugghe, dewijle dat het noch kleyn is: op dat het niet hardtneckich, ende dy onghehoorsaem worde.

13

Onderwijset dijn kindt, ende laett het niet ledich gaen, op dat du niet ouer hem tot schanden wordest.

14

Het is beter, ⁺ dat eener arm zy, ende wel te passe, ende ghesont daer by, dan rijck ende onghesont.

+ Ghesontheydt is beter dan rijckdom.

15

Ghesont ende wel ghestelt zijn, is beter dan gout, ende een ghesondt lijf, is beter dan groot goedt.

16

Gheen rijckdom is eenen ghesonden lijue te verghelijcken, ende gheen vreuchde des herten vreuchde ghelijck.

17

De doot is beter, ⁺ dan een sieck leuen, ofte altijts kranckheyt.

+ Kranckheyt.

18

Het is euen als een goet gerechte voor eenen monde, die niet eten kan, ende als de spijse, die men by eens dooden graf settet.

19

^e Want wat is den Afgoden het offer nut? hy kan doch eten noch ruecken, so isset met den rijcken oock, dien God sieck maeckt.

e Bel. a.6.

C.20

Hy siet het wel met den ooghen, ende suchtet daerna: ende is gelijck als een ghesneden, die by een maghet leyt, ende suchtet.

21

^f Maeckt deseluen niet treurich, ende plaget dyseluen niet, met dyne eyghen ghedachten.

f Prouer. 12.c.25. ende 14.d.30. ende 15.b.13. ende 17.c.22.

22

^g Want een vrolick herte, is des menschen leuen, ende zijn vreuchde, is zijn langhe leuen.

g Prouer. 14.d.30

23

Doet dy wat goedts, ende troostet dijn herte, ende drijft de treuricheyt verre van dy.

24

^h Want treuricheyt doodet vele lieden, ende en dienet ⁱ doch nerghens toe.

h Eccl. 3.c.22. 1.Mach. 6.a.8. 2.Corin. 7.b.10

i Sy helpt niets, ende maect geen sake beter: wat sal sy dan?

25

Nijdt ende toorne verkorten het leuen, ende sorghe maeckt oudt voor der tijt.

26

Eenen vrolicken herten smaect alles dat wel, wat hy eet.