Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

Men sal hemseluen onthouden voor wrake, den naesten vergeuen, niet twisten noch kijuen. Wat schade van valsche tonghen ende oorblasers koemt. Wat schadelicker dinck een valsche tonghe zy.

A.1

VVie ^a hemseluen wreeckt, ⁺ aen dien sal hem de Heere weder wreken, ende sal hem syne sonden oock behouden.

a Deute. 32.d.35. Rom. 12.b.19.

+ Wrake.

2

^b Vergheeft dynen naesten, ⁺ wat leet hy dy gedaen heeft, ende biddet dan, so worden dy dyne sonden oock vergheuen.

b Matth. 5.c.25. ende 6.b.14. ende 18.c.21.d.35. Marc. 11.c.25.

+ Vergheeft, so wort v vergheuen.

3

Een mensche behoudt tegen den anderen den toorne, ende wil by den Heere genade soecken.

4

Hy is onbarmhertich teghen zijns ghelijcken, ende wil voor syne sonden bidden.

5

Hy is slechs vleesch ende bloet, ende behoudt den toorne: wie wil hem dan syne sonden vergeuen?

6

^c Denckt aen het eynde, ende laett de vyandtschap varen, dien den doodt ende het verderf soect,

c Syrach. 7.d.39.

7

ende blijft in den gheboden.

8

Denckt aen het ghebodt, ende laett dijn dreyghen na, teghen dynen naesten.

9

Denckt aen het Verbondt des Allerhoochsten, ende vergheeft de onwetentheydt.

B.10

^d Laet af van twist, ⁺ so blijuen vele sonden na.

d Syrach. 8.a.1.

+ Dreyghen.

11

Want een toornich mensche richtet twist aen, ⁺ ende de Godloose ^* verwerret goede vrienden, ende hist teghen malcander die, die goeden vrede hebben.

+ Hader of twist.

* Of, verbijstert

12

^c Wanneer daer vele houts is, ⁺ so wordt des vyers dies te meer: ende wanneer de lieden gheweldich zijn, so wordt den toorne dies te grooter: ende wanneer de lieden rijcke zijn, so wordt den toorne dies te heftiger: ende wanneer den twist langhe duert, so brandt het dies te heftigher.

c Prouer. 26.c.20.

+ Toorne.

13

Bereydt zijn tot twist, steeckt vyer aen, ende bereydt zijn tot kijuen, verghiett bloedt.

14

Blasestu in het voncxken, so wordt daer een groot vyer van: maer spouwestu op het voncxken, so blusschet het wt, ende beyderley kan wt dynen monde komen.

15

^f De Oorenblasers, ende ^g valsche boose monden, zijn veruloeckt: want sy verwerren vele, die goeden vrede hebben.

f Leuit. 19.b.16. Syrach. 21.d.31.

g Psalm. 120.a.3.

16

^h Een boose mondt, ⁺ maeckt vele lieden oneens, ende drijftse wt eenen lande int ander.

h Iac. 3.a.5.

+ Boosen mont.

[fol. 38v]

17

Sy verderft vaste steden,

18

ende verstooret Vorstendommen.

19

Een boose mondt verstoot redelicke ⁱ vrouwen, ende berooftse alles dies, dat haer suer geworden is.

i Na Moses Wet, als de scheytbrief galdt, soude menich wijf sonder schult verstooten zijn, door sulcke boose monden.

C.20

Wie hem ghehoor gheeft die heeft nemmermeer ruste, ende en kan nerghens met vreden blijuen.

21

De gheessel maeckt striemen, doch een boose mont verderft beenen ende alle dinck.

22

Vele zijn gheuallen, door de scherpte des sweerts, doch nerghens na so vele als door boose monden.

23

Wel dien, die voor de boose monden bewaert is, ende van hen ongheplaecht blijft, ende haer iock niet draghen en derf, ende in haren stricken niet ghebonden en is.

24

Want haer iock is ijseren, ende hare stricken coperen.

25

Hare plaghe is bitterer dan de doodt, ende ergher dan de Helle.

26

Doch sy sal den Goduruchtighen niet onderdrucken, ende hy sal in haren vyere niet branden.

27

Wie den Heere verlaett, die sal daerin vallen, ende daerin branden, ende het en sal niet wtgheblusschet worden: het sal hem oueruallen, ghelijck als een Leeuwe, ende te niete maken, als een Pardel.

28

Du bethuynest dyne goeden met doornen, waeromme makestu niet vele meer dynen monde, deuren ende grendelen.

29

Du weghest dijn gout ende siluer, ^k waerom en wegestu oock niet dyne woorden op de goutwichte.

k Eccl. 11.b.18.

30

Hoedt dy, dat du niet daer door ^l glijdest, ende vallest voor dyne vyanden, die op dy loeren.

l slibberest.