Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvi. Capittel.

Van den lof eens goeden wijfs, ende wat schadelicker dinck een boos wijf zy.

A.1

VVel ^a dien, ⁺ die een deuchtsaem wijf heeft, dies leeft hy noch eens so langhe.

a Prouer. 18.c.22. ende 19.b.14. ende 21.b.10. Syrach. 25.b.11. ende 26.b.16.

+ Een deuchtsame vrouwe, is alles lofs ende eeren weert.

2

Een huyslick wijf, is haren manne een vreuchde, ende maeckt hem een fijn gherust leuen.

3

Een deuchtlick wijf is een edel gaue, ende wordt dien ghegheuen, die God vreest.

4

Hy zy rijck ofte arm, so isset hem een troost, ende maeckt hem alle tijt vrolick.

5

Dry dinghen zijn verschricklick, ⁺ ende het vierde is grouwelick.

+ Dry verschricklicke dingen.

6

Verraderije, Oproer, ^b onschuldich bloet verghieten.

b 4.Reg. 21.b.16. Prouer. 6.b.17.

7

Welcke alle ergher zijn, dan de doot.

8

Maer dat is het hertenleedt, als een vrouwe ouer de ander yeloers is,

9

ende lastertse by alleman.

B.10

Wanneer eener een boos wijf heeft, ⁺ so isset euen, als een onghelijck paer ossen, die neffens eenander trecken sullen: ^c wiese krijcht, die krijcht een Scorpioen.

+ Boose wijf.

c Iudic. 16.b.16.

11

Een droncken wijf is een groote plage: want sy en kan haer schande niet bedecken.

12

Een hoerachtich wijf, kentmen by haer onschamel ghesichte, ende aen hare ooghen.

13

^d Is dijn dochter niet schaemachtich, so houdtse hardt, op dat sy haren moedtwille niet en drijue, wanneer sy so vrij is.

d Syrach. 42.b.11.

14

Wanneer du merckest, dat sy stoutelick omme haer siet, so siet daer wel op: waer dat niet, ende sy doet daer ouer teghen dy, so laet het dy oock niet verwonderen.

15

Ghelijck als een Voedtgangher die dorstich is, hanget sy hare tonghe, ende drinckt het naeste water, dat sy krijcht: ende settet haer, waer sy eenen stock vindet, ende neemt aen, wat haer geworden kan.

16

^e Een vriendelick wijf verblijdt haren man, ⁺ ende wanneer sy vernuftichlick met hem omme gaet, veruerschet sy hem zijn herte.

e Syrach. 26.a.2.

+ Een tuchtighe vrouwe.

17

Een vrouwe die daer swijgen kan, dat is een gaue Gods:

18

een wel gemanierde vrouwe, en is niet te betalen.

19

Daer en is niet lieuers op Aerden, dan een ghemaniert wijf:

C.20

Ende en is niet kostelickers, dan een kuysch wijf.

21

Ghelijck als de Sonne, als sy opgaet in den hooghen Hemel des Heeren, een verciersel is: also is een deuchtsaem wijf, een verciersel in haren huyse.

22

Een schoone vrouwe, die daer vroom blijft, die is als de klare lampe ^f op den heylighen candelaer.

f Hy spreeckt van den candelaer ende pilaren, in der hutten Mosi.

[fol. 38r]

23

Een vrouwe, die een standtachtich ghemoet heeft,

24

die is als de gulden ^g pilaren, op de silueren stoelen.

g Cant. 5.b.15.

25

^* Twee stucken zijn daer, ⁺ die my verdrieten, ende het derde maeckt my toornich.

* Ca. xxvij. Lu.

+ Dry verdrietelicke stucken.

26

Wanneermen eenen strijdtbaren man, ten laetsten armoede lijden laet: ende de wijse Raetsheeren, ten laetsten verachtet: ^h ende wie van den ghelooue afualt, tot den onrechten gelooue: desen heeft God ten sweerde verdoemt.

h Eccl. 2.b.16. Ierem. 17.b.13.

27

Een koopman kan hem swaerlick hoeden voor onrecht, ende een kremer voor sonden.