Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

Daer is niet bouen een goet wijf: daer en is niet schadelicker, dan een boos, toornich ende godloos wijf.

A.1

DRy schoone stucken zijn daer, ⁺ die beyde Gode ende den menschen wel behaghen.

+ Dry merckelicke stucken goeder eendracht.

2

^a Wanneer Broeders eens zijn, ^b ende de Nabuers malcanderen lief hebben, ^c ende de Man ende Wijf hen met malcanderen wel verdraghen.

a Gene. 13.a.8.

b Rom. 12.b.10.

c Genes. 2.c.24. Syrach. 40.c.23. 2.Corint. 6.b.16.

3

Dry stucken zijn daer, dien ick van herten vyant ben, ⁺ ende haer wesen verdriet my gantsch seer,

+ Dry eyslicke stucken.

4

Wanneer een Arme hooueerdich is, ende een Rijcke gheerne ^d liecht, ende een oudt Sot, een ouerspeelder is.

d Syrach. 2.c.26.

5

Wanneer du in der ieughet niet versamelst, wat wiltu in dijn ouderdom vinden?

6

O hoe fijn staet het, wanneer de ^e Grauwe hoofden wijs,

e Deute. 31.a.1. Iosue. 23.a.2.

7

ende de Ouden kloeck, ende de heeren vernuftich ende voorsichtich zijn.

8

Dat is der Ouden kroone, wanneer sy vele versocht hebben, ende hare eere is, wanneer sy God vreesen.

9

Negen stucken zijn daer, ⁺ die ick in mynen herte hooch te louen houde, ende het tiende, wil ick met mynen monde prijsen.

+ Thien loflicke stucken.

B.10

Een man, ⁺ die vreuchde aen syne kinderen heeft: wiet beleeft, ⁺ dat hy syne vyanden siet ondergaen.

+ I.

+ II.

11

^f Wel dien, ⁺ die een vernuftich wijf heeft: ^g wie met syne woorden, ⁺ gheen schade doet: die niet dienen en derf, ⁺ dien, die es niet weert en zijn.

f Syrach. 26.a.1.

+ III.

g Syrach. 14.a.1 ende 19.a.1. Iaco. 3.a.2.

+ IIII.

+ V.

12

Wel dien, ⁺ die eenen getrouwen vrient heeft: wel dien, ⁺ die daer kloeck is, ende die daer leert, daermen het gheerne hooret.

+ VI.

+ VII.

13

O hoe groot is die, ⁺ die daer wijs is: maer wie God vreest, bouen dien en is niemandt.

+ VIII.

14

Want de vreese Gods, ⁺gaet bouen alle dinck.

+ IX.

15

Wie deselue vast houdt, ⁺

+ X.

16

wien kanmen dien verghelijcken?

17

Daer en is gheen wee so groot,

18

als het hertenleedt:

19

daer en is gheen list bouen vrouwen list. ⁺

+ Vrouwen list, toorne etce.

C.20

Daer en is gheen loeren, bouen loeren des afgonstighen:

21

daer en is gheen wraeckghiericheyt, bouen der vyanden wraeckghiericheyt.

22

Daer en is gheen hooft so listich, als der slanghen hooft, ⁺ ende en is gheen toorne so bitter, als der vrouwen toorne.

+ Een boos wijf.

23

^h Ick woude lieuer by Leeuwen ende Draken woonen, dan by eener booser vrouwe.

h Prouer. 21.b.19.

24

Wanneer sy boos wordt, so verandert sy haer ghelaet, ende wort so mismaeckt, als een sack.

25

Haer man moet hem harer schamen, ende wanneermen het hem voorwerpt, so doet het hem int herte wee.

26

Alle boosheyt is kleyne, teghen der vrouwen boosheyt: haer gheschie, wat den Godloosen geschiet.

27

Een klapperighe vrouwe, is eenen stillen manne, ghelijck als een opgaende zandtwech, eenen ouden manne.

28

ⁱ Laet dy niet bedrieghen, dat sy schoon is, ende en begheertse daerom niet.

i Genes. 43.a.2. Syrach. 42.b.12. 2.Sam. 11.a.2. ende 13.a.1.

29.D.30

Wanneer de vrouwe den man rijck maeckt, so is daer enckel twist, verachtinghe ende versmaedtheydt.

31

Een boose vrouwe, maeckt een bedroeft herte, een treurich aenghesichte, ende hertenleedt.

32

Een vrouwe, daer de man gheen vreuchde aen en heeft, die maeckt hem verdrietich tot allen dinghen.

33

^k De sonde koemt van eender vrouwen, ende om harent wille, moeten wy alle steruen.

k Gene. 3.a.6. 1.Timo. 2.b.14.

34

Ghelijck alsmen den water gheen ruymte laten en sal, also salmen den wijue haren wille niet laten.

35

Wil sy dy niet na der handt gaen, ^l so scheydt dy van haer.

l Dat is, Na de Wet Mosi ghesproken: daer van leest Mat. 19.a.7.