Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxiiij. Capittel.

Een lof der Wijsheyt.

A.1

DE ^a Wijsheyt prijst haerseluen, ⁺ ende onder den volcke beroemt sy haer.

a Prouer. 1.c.20. ende 8.a.1.

+ Een lof der wijsheydt.

2

Sy predict in der Gemeynte Gods,

3

ende prijst haer in synen Rijcke,

4

ende spreeckt also:

5

^b Ick ben Gods woort,

b Ioan. 1.a.1. 1.Ioan. 1.a.1. ende 5.a.7. Apocal. 19.b.13.

6

ende sweue bouen de gantsche Aerde, ghelijck als de wolcken.

7

Mijn Tente is in der hoochte, ende mynen Stoel in de wolcken.

8

Ick alleen ben alomme, so wijdt als den Hemel is, ende so diep, als den afgrondt is.

9

Alomme in de Zee, alomme op Aerden,

B.10

onder allen lieden, onder allen Heydenen.

11

By allen desen, hebbe ick een wooninghe gesocht, dat ick erghens een stede vonde.

12

Doe gheboodt my de ^c Schepper aller dinghen, ende die my geschapen heeft, bestelde my een wooninghe,

c Gene. 1.a.1. Syrach. 1.a.6.

13

Ende sprack: In Iacob saltu woonen, ende Israel sal dijn erue zijn.

14

^d Voor der werelt van aenbeghin ben ick geschapen, ende sal eewichlick blijuen: ^e ende hebbe voor hem in der hutten ghedient, ende daer na te Zion een ghewisse stede ghekreghen.

d Prouer. 8.c.23.

e Exod. 31.a.3.

15

^f Ende hy heeft my in de heylighe stadt ghesettet, dat ick te Ierusalem regeren soude.

f Psalm. 132.a.8.

16

Ick ben ingewortelt by eenen gheeerden volcke, ^g dat Gods erfdeel is.

g Deut. 4.c.20. ende 10.b.15.

17

Ick ben hooch ghewassen, ghelijck als een Ceder op den Libano, ende als een Cypresse op den gheberchte Hermon.

18

Ick ben opghewassen, gelijck als een ^h Palmboom aen het water, ende als de Roosenboomen, die te Iericho wassen.

h Deut. 34.a.3.

19

Als een schoon Olyboom, op een vrij veldt: ick ben opghewassen, als Ahorne.

C.20

Ick gaf eenen lieflicken reucke van my, als Kaneel ende kostelicke kruyden, ende als de beste ^* Myrren.

* De beste Myrre is het eerste sap, dat van hemseluen wt den Myrrenboome vliet, ende heet Stacie druppen: het ander heet slicht Myrre, die wt den snede van den boom vliet.

21

Als Galban ende Onich, ende Myrre, ende als de Wieroock in den Tempel.

22

Ick breydde myne tacken wt, ghelijck als een Eycke, ende myne tacken waren schoone ende lustich.

23

Ick gaf eenen lieflicken reucke van my,

24

als ⁱ een Wijnstock,

i Ioan. 15.a.1.

25

ende myne bloemen brachten eerlicke ende rijcke vruchten.

26

Koemt herwaerts tot my, alle die ghy myner begheert, ende versadicht v van myne vruchten.

27

^k Mijn predicke is soeter dan honich,

k Psalm. 19.b.11.

28

ende mijn gaue soeter dan honichseem.

29

^l Wie van my eett, dien honghert altoos na my: ende wie van my drinct, dien dorstet altoos na my.

l Ioan. 6.d.35.

D.30

Wie my ghehoor gheeft, die en wordt niet te schanden,

31

ende wie my volcht, die sal onschuldich blijuen.

32

Dit alle, is euen het boeck des Verbonts, met den Allerhoochsten Gode ghemaeckt.

33

Namelicken, de Wet, ^m welcke Moses den huyse Iacobs,

m Exod. 20.a.1. ende 24.a.4. Deute. 4.a.1. ende 29.b.10.

34

tot eenen schat beuolen heeft.

35

Daer wt de Wijsheydt gheuloten is, ghelijck als ⁿ het water Physon, alst groot is, ende als het water Tigris, alst ouer vloeyet in den Mey.

n Gene. 2.b.11.

36

Daer wt het verstandt gheuloten is, ghelijck als de Ephrates, als sy groot is, ^o ende als de Iordaen in den Oogst.

o Iosue. 3.b.15.

37

Wt deselue is voortghekomen de onderwijsinghe, ghelijck als het licht, ende als het water Nihis in den Herfst.

38

Hy is noyt gheweest, die het wtgheleert hadde, ende en sal nemmermeer worden, die het wtgronderen konde.

39

Want haer sin is rijcker dan eenighe Zee, ende haer woort dieper dan eenich afgrondt.

E.40

Daer vlieten vele Beken van my in den hof,

41

ghelijck alsmen het water daer henen in leydet

[fol. 37v]

42

Daer watere ick mynen hof, ende beghiete myne kruydtbedden.

43

Daer worden myne Beken, tot groote wateren, ende myne wateren worden een groote Zee.

44

Want mijn leere lichtet so wijdt, als de lichte morghen,

45

ende schijnet verre.

46

Oock ghiet myne leere prophecie wt, die daer eewich blijuen moet,

47

^p Daer siet ghy, dat ick niet alleen voor my arbeyde, maer voor alle, die der Wijsheydt begheert.

p Syrach. 33.b.18