Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

Hoe ende wienmen weldaedt doen sal.

A.1

VViltu wat goets doen, ⁺ so siet toe, wien du dat doest: so verdienestu danck daermede.

+ Den Godureesenden salmen goedt doen.

2

^a Doet den vromen goet, so sal het dy rijckelick

a Eccl. 7.d.35. Deute. 15.a.7. Galat. 6.b.12. 1.Timoth. 5.b.10.

[fol. 34r]

vergolden worden: ist niet van hem, ^b so gheschiet het ghewislick van den Heere.

b Matth. 25.c.24.

3

Maer den boosen schalcken, die niet en dancken voor de weldaedt, en salt niet wel gaen.

4

^c Gheeft den Goduruchtighen, ende ontfermt dy des Godloosen niet: doet goedt den ellendighen, ende gheeft den Godloosen niet.

c Tob. 1.b.15.

5

Behoudt dijn broot voor hem, ende en gheeft hem niets, op dat hy daer door niet ghestercket worde, ende dy ondertrede: du salst noch eens so vele boosheyt van hem ontfanghen, als du hem goets ghedaen hebst.

6

^d Want de Allerhoochste is den Godloosen vyandt,

d Psalm. 5.a.6. Sapient. 14.a.9. Prouer. 3.d.31.

7

^e ende sal de Godloosen straffen.

e Iud. b.14.

8

Als het eenen wel gaet, so en kanmen gheenen vriendt recht bekennen: maer als het eenen qualick gaet, so en kan hem de vyandt oock niet verberghen.

9

Want alst eenen wel gaet, dat verdriett synen vyandt: ende als het eenen qualick gaet, so wijcken oock de vrienden van hem.

B.10

Betrout dynen vyandt nemmermeer: ⁺ want ghelijck als het ijser altijts weder verroestet, also laet hy oock syne treken niet.

+ Vyanden en salmen niet vertrouwen.

11

Ende of hy hem alschoon neyghet ende bucket, so siet doch voor dy, ende hoedt dy voor hem: ende of du alschoon aen hem pollijsterst, gelijck als aen eenen spiegel, so blijft hy doch roesterich.

12

Treckt hem niet tot dy, dat hy dy niet wechstoote, ende trede in dijn stede: settet hem niet by dy, dat hy niet na dynen Stoel en pooghe, ende dat du ten laetsten op mijn woordt dencken moetst, ende dat het dy dan rouwe.

13

^f Ghelijck als wanneer een slangenbesweerder ghebeten wordt, dat en iammert niemandt, also weynich als dat, so een met wilden gedierten omgaet, ende van hen verscheurt wordt: also gaet het dien oock, die den Godloosen aenhanghet, ende hem in haer sonde vermenghet.

f An. lesen noch, bindet niet twee sonden tesamen, want de een en sal onghestraft niet blijuen.

14

Hy blijft wel een wijle by dy: maer wanneer du struyckelst, so en blijft hy niet.

15

^g De vyandt gheeft wel goede woorden, ende beklaecht dy seer, ende stelt hem vriendtlick, kan oock daer toe weenen.

g Ierem. 41.a.6. 2.Reg. 3.a.9.

16

Maer int herte denckt hy, hoe hy dy in den kuyle brenghe: ende krijcht hy ruym, so en kan hy dijns bloets niet satt worden.

17

Wil dy yemandt schade doen, so is hy de eerste,

18

ende stelt hem, gelijck als woude hy dy helpen, ende vellet dy bedrieghelick.

19

Synen kop sal hy schudden, ende in de vuyst laechen, dy bespotten, ende de neuse opwerpen.