Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

Een leere hoemen met het wijf leuen sal. Den ouden Uriendt en salmen niet laten varen, ende andere schoone leeringhen.

A.1

SIit ^a niet ieloers ouer dijn vrome wijf: ⁺ want sulck een hardt opsien, en brenghet niet goedts.

a Syrach. 33.c.29.

+ Hoemen hem met den vrouwen houden sal.

2

Laet den wijue gheen macht ouer dy, dat sy niet dijn heere en worde.

3

Vermijdet de Boelersse, op dat du niet in hare stricken vallest.

4

^b Wennet dy niet tot de Sanghersche, ⁺ dat sy dy niet en vanghe met hare listicheyt.

b Prouer. 2.b.16. ende 5.a.3. ende 7.a.5.

+ Hoererije te vermijden.

5

^c Siet niet na de maechden, dat du niet ontsteken wordest teghen haer.

c Gene. 6.a.2. Iob. 31.a.1.

6

^d Hangt niet aen de Hoeren, dat du niet om het dyne en komest.

d Prouer. 5.a.3.8.

7

Gaept niet alomme in der stadt, ende en loopt niet door alle hoecken.

8

^e Wendt dijn aenghesichte van schoone vrouwen, ende en siet niet na de ghedaente van andere vrouwen.

e Matth. 5.c.28.

9

^f Want schoone vrouwen, hebben menighen verdwaest,

f Gene. 34.a.1. 2.Samue. 11.a.2. Iudith. 10.b.18. ende 12.b.16. ende 13.a.9.

B.10

ende boose lust ontsteeckt daer van,

11

ghelijck als vyer.

12

Sitt niet by eens anders wijf, ende omhelst dy niet met haer, ende en brast niet met haer:

13

Op dat dijn herte niet aen haer en hanghe, ende dyne sinnen niet verdwaest en worden.

14

^g En gheeft eenen ouden Vriendt niet ouer: ⁺ want du en weetst niet, of du aen den nieuwen so vele krijghest.

g Prouer. 27.b.10 Eccles. 6.b.14. ende 7.c.20.

+ Oude vrienden de beste.

15

Een nieu Vriendt, is een nieuwe wijn: laett hem oudt worden, so sal hy dy wel smaken.

16

^h Laet dy ooc den Godloosen niet bewegen, ⁺ in zijn groote eere: want du en weetst niet, hoe het een eynde nemen sal.

h Iudic. 9.a.3. 2.Samu. 15.b.11.

+ Godloosen.

17

ⁱ Laet dy niet behaghen der Godloosen voornemen, want sy en worden nemmermeer vroom, tot in der Hellen toe.

i Huychelt hem niet, ende en hanget hem niet aen.

18

Houdt dy van dien, die daer macht heeft te dooden, so doruestu dy niet besorghen, dat hy dy sal dooden.

19

Maer moetstu by hem zijn, so en vergrijpt dy niet, op dat hy dy niet het leuen neme, wanneer du dat allerminst vermoedest.

C.20

Ende weet, dat du onder de stricken wandelst, ende gaest op enckele hooghe ^* spitzen.

* Als op hooghe thorrens, daer het vaerlick is, ende eenen het swijmen aenkoemt.

21

Leert met aller neersticheydt dynen naesten kennen, ^k ende wanneer du raet behoefst, so soect hem by wijse lieden,

k Syrac. 37.b.19. Tob. 4.b.15.

22

Ende beraedt dy met den Verstandigen, ende richtet alle dyne saken na Gods woort.

23

^† Houdt geselschap met vrome lieden, ^l ende weest vrolick, doch in de vreese Gods.

† Dat is, Houdt collacien, eett ende drinckt, etc.

l 1.Thessa. 5.b.19. Philip. 4.a.4.

24

^* Het werck loeft den Meester, ^m ende eenen wijsen Vorst syne handelen.

* Cap. x. Luth.

m 1.Reg. 3.

25

Het is een vaerlick dinck in eenen Regimente, om eenen klapper: ^v ende een ⁿ onbeschaemt klapper koemt te schanden.

v an der Ouericheyt.

n Die vol raedts, kloeckheyts ende schreyens is, ende het woort alleen hebben wil.