Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

Leert twist vlieden, niemant verachten noch versmaden: niet lichte burghe worden, boose, toornighe ende dwase menschen vlieden.

A.1

TWistet niet met eenen Gheweldighen, ⁺ dat du hem niet in syne handen vallest.

+ Rijcke ende Gheweldighe.

2

^a Twistet niet met den Rijcken, dat hy dy niet en ouerweghe.

a Matth. 5.c.25. Syrac. 28.b.14.

3

^b Want vele laten hen met ghelde steken, ende het beweecht oock veel der Koninghen herte.

b Syrac. 31.a.6.8

4

Twistet niet met eenen onnutten klappaert, dat du niet hout en draghest tot synen vyere.

5

Schimpet niet met eenen grouen mensche, dat hy dijn gheslachte niet en schende.

6

^c Werpt dien zijn sonden niet voor, die hem betert, ende denct, dat wy noch alle schuldt op ons hebben.

c Gala. 6.a.1. 2.Cor. 2.a.6.

7

^d Veracht de oudtheyt niet, want wy dencken oock oudt te worden.

d Leuit. 19.d.32. 1.Tim. 5.a.1.

[fol. 33r]

8

Verheucht dy niet, dat dijn vyandt steruet: ^e denckt dat wy alle steruen moeten.

e 1.Timo. 5.a.1. Hebr. 9.c.27.

9

^f Verachtet niet wat de Wijsen spreken, maer schickt dy na haren spreucken.

f Syrach. 6.d.35.

B.10

Want van hen kanstu wat leeren, ende hoe du dy houden salt, teghen groote lieden.

11

Laett dy niet kloecker duncken, als de Ouden, ^g want sy hebben oock van haren vaderen gheleert:

g Exod. 12.c.25. Deut. 4.a.9. ende 11.b.19. Psalm. 78.a.3.

12

Want van hen kanstu leeren, hoe du antwoorden salt, alst van nooden is.

13

^h Blaest den Godloosen zijn vyer niet op, ^* dat du oock niet mede verbrandest.

h Prouer. 26.c.21.

* Uerwecktse niet sonder oorsake te lasteren.

14

Stelt dy niet teghen eenen Lasteraer, dat hy dyne woorden niet en verkeere.

15

ⁱ Leenet niet eenen gheweldigheren dan du bist: ende leenstu hem, so acht het als verloren.

i Syrach. 29.a.4.

16

^k Wort gheen borghe bouen dijn vermogen: ende doetstu dat, so denckt het te betalen.

k Syrac. 29.c.23.

17

Rechtet niet met den Richter, want men spreect het oordeel als hy wil.

18

^l Wandelt niet met eenen Roeckeloosen, dat hy dy niet in ongeluck en brenghe: want hy richtet aen, wat hy wil, so moestu dan omme syner dwaesheyt wille, schade lijden.

l Gene. 4.a.8.

19

^m Twistet niet met eenen toornighen mensche, ende en gaet niet met hem alleen ouer velt: want hy achtet het bloedtuerghieten als niets: wanneer du dan gheen hulpe en hebst, ⁿ so verworghet hy dy.

m Prou. 22.c.24. Iesai. 3.a.5.

n Gene. 4.a.8.

C.20

Met den ^o Dwasen en houdt gheenen raedt, want het en gaet hen niet ter herten.

o Loose lieden, die niets en achten, Syrach. 9.c.21. ende 37.a.7.

21

Voor eenen Vreemden en doet niets verborgens, want du weetst niet, wat daer van komen mochte.

22

Openbaert dijn herte niet alleman, hy mochte dy qualick dancken.