Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

Een onderwijsinghe ende leere der wijsheydt, van ghedult ende vreese Gods.

A.1

MIin ^a kindt, wiltu Gods dienaer zijn, so schickt dy ter aenuechtinghe.

a Matth. 4.a.1. 2.Tim. 3.b.12. 1.Pet. 4.b.12.

2

^b Houdt vaste ende lijdt dy, ende en wanckelet niet, ⁺ wanneermen dy daeruan socket.

b Syrac. 6.c.29.

+ Aenuechtinge ende droeffenisse met ghedult te lijden. Sapi. 3.a.6. Prouer. 17.a.3. Deut. 8.a.2. ende 13.a.2. 2.Para 32.d.31. Psalm. 66.b.10. 1.Pet. 1.a.6.

3

Houdt dy aen God, ende wijcket niet, op dat du altoos stercker wordest.

4

Alles wat dy ^* ouerkoemt, dat lijdet, ende weest gheduldich in allerley droeffenisse.

* of, wederuaert

5

Want ghelijck als het gout door het vyer, also worden de ghenen, die God behaghen, door het vyer der droeffenisse beproeft.

6

Vertrouwet God, so sal hy dy wthelpen: richtet dyne weghen, ^c ende hopet op hem.

c Psalm. 37.a.3.

7

Ghy die den Heere vreeset, ^d vertrouwet hem,

d 2.Para. 20.c.20

8

want het en sal v niet feylen.

9

Ghy die den Heere vreeset, hopet des besten van hem, so sal v alletijdt ghenade ende troost ^e ghebeuren.

e of, wederuaren.

B.10

Ghy die den Heere vreeset, verwachtet syner ghenade, ende en wijcket niet, op dat ghy niet te gronde en gaet.

11

Siet aen de exempelen der Ouden, ⁺ ende mercktse.

+ Exempel der vaderen.

12

^f Wie is oyt te schanden gheworden, die op hem gehopet heeft? ^g wie is oyt verlaten, die in der vreese Gods ghebleuen is? ofte wie is oyt van hem versmadet, die hem aengeroepen heeft?

f Psalm. 31.a.2. ende 71.a.1. Iesa 26.a.1. 1.Mach. 2.g.61.

g Psalm. 37.c125. 1.Reg. 17.a.4. Bel. d.33.

13

Want de Heere is ghenadich ende barmhertich, ende ^* vergeeft de sonde, ende helpt inder noot.

* Hy en siet niet aen, hoe boos ende onweerdich wy zijn.

14

Wee dien, die aen God vertzagen, ende niet vast en houden, ende den Godloosen, ^h die henen ende weder wanckelt.

h 1.Reg. 18.c.21.

15

Wee den ⁱ vertzaechden, want sy en gheloouen niet, daerom en worden sy ooc niet beschermt.

i Apoc. 21.a.8.

16

^k Wee dien, die niet volherdich en blijuen.

k Psalm. 125.a.5. Iesa. 1.c.28. Iere. 17.b.13.

17

Hoe wel het hen gaet, wanneerse de Heere te huys soecken sal?

18

Die den Heere vreesen, die gheloouen synen woorde, ^l ende die hem lief hebben, die houden syne gheboden.

l Ioan. 14.b.15. ende 21.c.23.

[fol. 31v]

19

Die den Heere vreesen, die doen wat hem wel behaecht, ^m ende die hem lief hebben, die houden de Wet recht.

m Kon. 12.b.10.

C.20

Die den Heere vreesen, die bereyden haer herte,

21

ⁿ ende verootmoedighen hen voor hem,

n 2.Reg. 19.b.15.

22

Ende spreken: ^o Wy willen lieuer in de handen des Heeren vallen, dan in de handen der menschen.

o 2.Sam. 24.b.14 Susan. c.23.

23

Want syne barmherticheydt is Ia so groot, als hy selues is.