Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

VOORREDE IEsu Syrach op zijn Boeck.

A.1

VEle ende groote lieden, hebben ons de Wijsheyt, wt der Wet, Propheten ende anderen, die den seluen nagheuolghet hebben, kondt ghedaen. Daer van moetmen Israel billicken louen, om harer wijsheydt ende leere wille.

2

Daerom sullen de ghenen, diese hebben ende lesen, niet alleene wijs daerwt worden, maer oock den anderen dienen, met leeren ende met schrijuen.

3

Mijn Grooteuader Iesus, na dien hy hem sonderlicken beulijtichde, te lesen de Wet, de Propheten, ende andere Boecken meer, die ons van onsen vaderen ghelaten zijn, ende hem wel daerin geoeffent hadde, nam hy voor, oock yets wat te schrhuen, van wijsheydt ende goeden zeden: op dat de ghenen, die gheerne leeren ende kloeck worden wouden, des te verstandigher ende gheschickeder worden, een goedt leuen te leyden.

4

Daerom bidde ick v, ghy willet vriendtlick aennemen, ende met vlijte lesen: ende ons te goede houden, oft wy so wel niet spreken en konnen, als de groote beroemede Oratoren.

5

Want wat in der Hebreischen sprake geschreuen is, dat en luydt so wel niet, wanneermen het in eene ander sprake brenghet.

6

Niet alleene dit mijn boeck, maer oock des Wets, der Propheten ende anderer boecken meer, luyden gantsch vele anders, wanneer sy in haer sprake ghesproken worden.

7

Als ick nu in Egypten quam, in den acht ende dertichsten Iare, ter tijdt des Konincks Ptolomei Euergetis, ende alle zijn leefdaghe daerin bleef, kreech ick tijdt, veel goedts dincks te lesen ende te schrijuen.

8

Daerom sach ick het voor goedt ende noodich aen, dat ick den vlijt ende moeyte daerop wendde, ende dit boeck ouersettede.

9

Ende dewijle dat ick den tijt hadde, arbeydde ick, ende wendde vlijt aen, dat ick dit boeck wtmaeckte, ende aen den dach brachte: op dat oock de vreemden, die leeren willen, hen tot dien zeden wennen, op dat sy na der Wet des Heeren leuen moghen.

Eynde der Voorrede Iesu Syrach.