Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

De gheloouighe ende Godsalighe hebben acht op God, ende en laten hen met de beelden niet verleyden: maer diese maken, lief hebben, daerop hopen, ende die eeren, zijn alle des doodts schuldigh.

A.1

DOch du onse God, ^a bist vriendtlick ende ^b trouwe, ende lanckmoedich, ende regerest alle dinck met barmherticheydt.

a Psalm. 106.a.1. ende 107. a.1. ende 118. a.1

b 1.Corint. 1.a.8. ende 10.b.13. 2.Thess. 5.c.24. Exod. 34.a.6.

2

Ende wanneer wy alschoon sondigen, so zijn wy doch dyne, ende kennen dyne macht, dewijle wy dan sulcks weten, so en sondighen wy niet, ⁺ want wy zijn voor de dyne gherekent.

+ God bekennen, is gherechticheyt ende leuen.

3

^c Dy dan kennen, is een volkomen gherechticheydt, ende dyne macht weten, is een wortel des eewighen leuens.

c Psalm. 103.a.8. Ione. 4.a.2. Ioan. 17.a.3.

4

Want ons en verleyden also niet der menschen boose vonden, noch der Schilders onnutten arbeydt, namelicken, een bondt beeldt met menigherley verwen,

5

Welckers ghestaldt de onuerstandighen erghert: ende die gheerne quaedt doen, die hebben oock haren lust, aen dat leuendtloose ende doode beeldt.

5[6]

Sy zijn oock sulcker vrucht weerdich, beyde diese maken, begheeren ende eeren.

7

^d Ende een Potbacker, die den weecken leem met moeyte arbeydet, maeckt allerley vaten, tot onsen ghebruycke: ende hy maect van eenerley leem, beyde vaten, die tot reyne, ende oock die tot onreyne wercken dienen: ende waer een yeghelick van den seluen sal toe ghebruyct worden, dat staet by den Potbacker.

d Rom. 9.c.20. Iesa. 45.a.9. Iere. 18.a.3.

8

Doch dat is een ellendich arbeydt, ⁺ wanneer hy van den seluen leem, eenen nietighen God maeckt, so doch hy selfs niet langhe te voren, ^e van Aerde ghemaeckt is, ende ouer eenen kleynen tijdt, daer weder toe koemt, daer hy van genomen is, ^f wanneer de ziele, die hy ghebruyckt heeft, van hem ghenomen wordt.

+ De makers ende dienaers der Afgoden, zijn voor God eenen grouwel.

e Gene. 2.a.7. ende 3.b.19.

f Luc. 2.c.20.

9

Doch syne sorghe en staet daerop niet, dat hy arbeyde, noch dat hy sulck een kort leuen heeft: maer dat hy met den ^g Goudtsmeden ende Siluersmeden, in de weddinghe arbeyde, ende dat hy het den Roodtgieters na doen moghe: ende hy houdt het voor eenen roem, dat hy valschen arbeydt maeckt.

g Iesa. 44.b.12. ende 46.a.5.

B.10

Want zijns herten ghedachten, zijn ghelijck als assche, ende zijn hope ^* snooder dan Aerde, ende zijn leuen verachtlicker dan leem.

* slechter

11

Dewijle dat hy dien niet en kent, die hem gemaect heeft, ende hem de ziele, die in hem wercket, ingegoten, ^h ende die den leuendigen adem, ingheblasen heeft.

h Gene. 2.

12

Sy houden oock het menschlicke leuen voor eenen schimp, ende het menschlicke wesen, voor een Iaermerckt: gheuen voor, men moet ⁱ allenthaluen ghewinst soecken, oock door boose stucken.

i allomme, oueral

13

Dese weten voor allen, dat sy sondigen, wanneer sy sulcke ^k ijdele dinghen ende beelden, van Aerdtschen leeme maken.

k Of, loose

14

Sy zijn doch dulder ende ellendigher dan een kindt, namelicken, de vyanden dijns volcx, welcke sy onderdrucken:

15

Dat sy allerley Afgoden der Heydenen, voor Goden houden, ^l welcker ooghen niet en sien, noch hare neusen windt halen, noch hare ooren hooren, noch de vingeren aen haren handen voelen konnen, ^m ende hare voeten gantsch luye zijn te wandelen.

l Psalm. 115.a.8. ende 135. b.16. Apoc. 19.c.20.

m Sapi. 13.b.19. Iere. 20.a.5.

16

Want een mensche heeftse ghemaeckt, ende die den adem van eenen anderen heeft, die heeftse gebeeldet: maer een mensche en kan Ia niet maken, dat hem ghelijck zy, ende dannoch ghelijckewel een God zy.

17

Want dewijle dat hy sterflick is, so maeckt hy vrijlicken eenen dooden, met synen Godloosen handen, hy is Ia beter dan dat, dien hy Godsdienst doet: want hy leuet doch, maer het ghene nemmermeer.

18

ⁿ Daertoe eeren sy oock, de allerschandelickste dieren, welcke, somense teghen andere onuernuftighe dieren houdt, so zijn sy veel slimmer.

n Histo. vanden draeck. Rom. 1.c.23.

19

Want sy en zijn niet lieflick, ghelijck als andere dieren, die fijn aen te sien zijn: ende zijn van God noch gheloeft noch ^o gheseghent.

o Dat zijn slanghen, de welcke Gene. 3. ooc veruloeckt zijn.