Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xj. Capittel.

Hoe de wijsheyt de Godsalighe beweecht ende leydt: ende hoe de Godloose van de gheweldighe hant Gods ghestraft worden.

A.1

SY voerde derseluen wercken, ⁺ door de hant des heylighen Propheten.

+ De wijsheyt voeret ende leydet de vromen. Exod. 16.a.1. Psalm. 136.b.16.

2

Ende leyddese door een wilde woestijne, dat sy Tenten opsloeghen inder woestijne.

3

^a Ende haren vyanden wederstonden, ende hen wreeckten aen haren wederpartijders.

a Exod. 17.b.12.

4

^b Doe hen dorstede, riepen sy dy aen, ende hen wert water ghegheuen, wt den hooghen rotzsteen, ende lesscheden den dorst, wt eenen harden steen.

b Nume. 20.b.11. Psalm. 78.b.15. ende 105.e.41. 2.Esdr. 9.c.20. 4.Esdr. 1.c.20.

5

Ende euen daerdoor hare vyanden geplaecht

6

werden, daer door gheschiedde hen goet, doe sy noot leden.

7

Want ghelijck als ghene voor den ^* bloede verschrocken,

* Doe het water bloet wert in Egypten. Ex. 7.c.26.

8

dat in der stede des vlietenden waters quam, tot eener straffe des gebots, datmen de kinderen dooden moeste: also gauestu desen waters de volheyt onuersiendes,

9

Ende gauest daermede te verstaen, door ghener dorst, hoe du de wederpartijders plagedest.

B.10

^c Want doe dese versocht, ende met ghenade verlichtet werden, bekenden sy, hoe de Godloosen met toorne gherichtet ende ghequalet worden.

c Deute. 8.a.2.

11

Dese hebstu voorwaer, als een vader vermaent ende gheproeft, doch ghene als een strenghe Koninck, ghestraffet ende verdoemt.

12

Ende beyde die daer by waren, ende die niet daer by en waren, werden ghelijck gheplaecht.

13

Want daer quam dobbel leedt ouer haer, daer toe oock suchten, so sy des vorigen ghedachten.

14

Want doe sy hoorden, dat desen daer door goet gheschiedde, door welcker sy gequalet werden, voelden sy den Heere.

15

Want dien sy voortijden verachtelicken verstooten ende verworpen hadden, ende hem belacheden, des moesten sy hen ten laetsten, doe het daer henen quam, verwonderen, dat haren dorst so niet en was, als der rechtueerdighen.

16

Also oock voor de dulle gedachten, haers onrechtueerdighen wesens, ^d door welcke sy bedroghen, onuernuftighe wormen, ende verachtelicke dieren aenbaden,

d Sap. 12.c.24.

17

Sondestu onder haer de volheyt der onuernuftigher dieren ter wrake: op dat sy bekenden, dat, waermede yemandt sondighet, dat hy daer mede oock wort gheplaghet.

18

^e Want het en feylde dyner almachtiger hant niet (die de werelt geschapen heeft, wt eenen onghestalten wesen) ouer haer te schicken, hoopen der beyren ofte vrijmoedighe leeuwen.

e Leuit. 26.c.22. Sapien. 16.a.1. Ierem. 8.b.17.

19

Oft van nieuwe gheschapen grimmighe, onbekende dieren, ofte die daer vyer spouwen, ofte met grimmigen roocke bliesen, ofte dien grousame voncken wt den ooghen stouen.

C.20

De welcke hen niet alleen met verseeringe en konden te niete maken, maer oock wel met haren verschrickelicken ghesichte, ^f verworghen.

f haestich dooden.

21

Ia sy konden wel sonder dat, door eenen eenighen adem vallen, met wrake veruolghet, ende door den Gheest dyner kracht, verstroyt worden.

[fol. 28r]

22

Doch, du hebst alle dinck gheordineert, met mate, ghetale ende ghewichte: want groot vermoghen is alle tijdt by dy, ^g ende wie kan der macht dijns arms wederstaen?

g Iudith. 16.b.18. 2 Hester. 2.a.4.

23

Want de wereldt is voor dy, ghelijck als het ^h tongsken aen der waechschale, ende als een droppe des morghendauwes, die op de Aerde valt.

h Gelijck als het lichtlick gheschieden mach, dat dat tongesken wtslaet: sulck een slecht dinc, is de werelt tegen God. Iesa. 40.b.15.

24

Maer du ontfermest dy ouer alle dinck: want du hebst macht ouer alle dinck, ⁱ ende ^k siest met der menschen sonde ^l† door de vingheren, dat sy hen beteren souden.

i Roma. 2.a.4. Act. 17.d.30. 2.Pet. 3.b.15.

k Of, ghelaet dy, al saghestu de sonde der menschen niet, etc.

l† And. ouer

25

Want du hebst lief alles wat daer is, ende en hatest niet, wat du ghemaeckt hebst: want du hebst gewislicken niets bereydet, daer du eenen haet toe haddest.

26

Hoe konde yets wat blijuen, wanneer du niet en woudest? ofte hoe konde dat onderhouden worden, dat du niet gheroepen en haddest?

27

Maer du verschoonest aller: want sy zijn dyne, Heere, ^m du liefhebber des ⁿ

m Hesek. 18.d.32. ende 33.b.11.

n Luth leuens, ende dijn onuerganckelicke Geest, is in allen.} leuens.