Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

Wat nut ende goet den menschen wt de wijsheydt koemt.

A.1

DEselue wijsheyt bewaerde dien, ⁺ die aen het allereerste ghemaeckt, ende alleene gheschapen wert, wt eenen vader der werelt, ende ^a brachte hem wt syner sonde.

+ Wat nut den menschen wt de wijsheyt gekomen zy. Adam. Gene. 1.c.27.

a Door dat woort Gene. 3.b.15. dat zaet sal dy den kop vertreden, etc.

2

^b Ende gaf hem kracht, ouer alle dinck te heerschen.

b Gene. 2.c.10.

3

^c Van de welcke, doe de onrechtueerdighe afuiel door synen toorne, verderf hy, van weghen der booslicker moort zijns broeders.

c Cain. Gene. 4.a.8.

4

^d Ende als de Aerde om desseluen wille, met der Sonduloet verdoruen was, halp de ^e wijsheyt weder omme, ende regeerde den rechtueerdighen, door een ^f slecht hout.

d Noe. Gene 6. 7. 8.

e Dat was Gods woort ende beuel, de Archa te bouwen.

f Of, verachtet

5

^g Deselue doe de Heydenen ^h te ghelijcke in dwalinghe booslick leefden, vandt sy den rechtueerdighen, ende onderhieldt hem onstraffelick voor God: ende liet hem vaste zijn, teghen het vaderlicke herte, teghen den sone.

g Abraham. Gene. 11.a.1.d.31. ende 12.a.1. 4.Esdr. 3.b.13.

h Dat is, waer hy henen quam, daer vant hi Afgodische boose lieden, gelijc als Abrahams leuen aentoocht.

6

ⁱ Deselue verlossede den Rechtueerdigen, doe de Godloose omquamen, doe hy vloot voor den vyere, dat op de vijf steden viel.

i Loth. Gene. 19.b.17. Luce. 17.d.32.

7

Welck verwoestede lant noch roocket, tot een ghetuyghenisse der boosheyt, met tsamen den boomen, die ^k onrijpe vruchten dragen, ende der Soutcalomne, die daer staet tot eener ghedachtenisse, der ongheloouighen zielen.

k Dat sullen zijn de appelen aen de roode zee, die wtwendich schoone, ende inwendich ijdel assche zijn, Sorba ghenoemt.

8

Want de ghene die de wijsheyt niet en achten, en hebben niet alleene de schade, dat sy het goede niet en kennen, maer laten oock den leuendigen een ghedachtenisse na, dat sy niet en konnen verborgen blijuen, in het ghene, daer sy in dwalende ghegaen hebben.

9

Maer de wijsheydt verlost de ghenen wt aller moeyte, die hen aen haer houden.

B.10

^l Deselue leydde den rechtueerdigen, die voor zijns broeders toorne vlieden moeste, op stracken weghe, ende wees hem het Rijcke Gods, ende gaf hem te bekennen wat heylich is: ende halp hem in synen arbeyde, dat hy wel toenam, ende vele goets van synen arbeyt kreech.

l Iacob. Gene. 28.a.5.b.12.

11

^m Ende was by hem, ⁿ doe hy bedroghen wert van dien, die hem ghewelt deden.

m Gen. 30.e.42.

n Gene. 31.a.6.

12

Ende maeckte hem seker voor dien, die hem ^o nastelden, ende gaf hem ouerwinninge in eenen stercken kamp: op dat hy onderuonde, dat de Godsalicheyt machtigher is dan alle dinck.

o Of, lagen leyden Godsalicheyt, is, het gelooue aen het woordt Gods, oft aen de wijsheyt.

13

^* Deselue verliet den verkochten Rechtueerdighen niet, maer bewaerde hem voor der sonde.

* Ioseph. Gene. 37.c.28. Act. 7.a.9.

14

^p Ghinck met hem henenaf in den kercker, ende inden banden, en verliet sy hem niet, tot dat sy hem toebrachte, den Scepter des Konincrijcx, ende de Ouericheyt ouer die, die hem gheweldt ghedaen hadden: ende maeckte die tot leugenaers, die hem boose daedt toegeleyt hadden, ende gaf hem een eewighe heerlicheyt.

p Gene. 39.c.21. ende 41.c.29. Psalm. 105.c.21. 1.Macha. 2.f.53.

15

^q Deselue verlossede het heylighe volck, ende onstraffelicke zaedt, vanden Heydenen diese plaechden.

q Israel. Exod.1.b.10.

16

^r Sy voer in de ziele des Dienaers des Heeren, ende wederstont den grousamen Koninghen, door wonderen ende teeckenen.

r Mose. Exod. 2. 3. 4. 5. 6. 7. 8. 9.

17

Sy beloonde den Heylighen haren arbeydt, ⁺ ende leyddese door wonderlicke weghen, ^s ende was hen des daechs eene beschuttinghe, ende des nachts een vlamme, ghelijck als de sterren.

+ Kinderen Israel. Exod. 14.c.29.

s Exod. 12.c.21. Psalm. 105.d.39. 2.Corinth. 10.a.1.

18

^t Sy voerdese door de roode Zee, ende leyddese door groote wateren.

t Exod. 14.c.21. Psalm. 78.b.13. ende 106.a.9.

19

Doch hare vyanden, versoop sy, ende tooch dese wt den gront der diepte.

C.20

^u Daeromme namen de Rechtueerdigen, roof vanden Godloosen, ^x ende presen dynen heylighen Name Heere, ende leefden eendrachtelicken dyne ouerwinnende handt.

u Exod. 12.d.35. Iudith 5.b.13.

x Exod. 15.a.1. Psalm. 106.b.12.

21

Want de wijsheyt opende der stommen mont, ende maeckte der onmondighen tonghen wel ^y beredet.

y Of, sprekende.