Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel

Hier spreeckt de dichter selues, ende biddet gantsch in Salomonis persoone. Ten exempel allen Uorsten, oock also te doen: ende is wtermaten een schoon ghebedt.

A.1

O God myner vaderen, ⁺ ende Heere aller goedicheyt, ^a die du alle dinck door dijn woort ghemaeckt,

+ Een gebet tot God om wijsheyt te verkrijghen.

a Gene. 1.a.1.

2

Ende den mensche door dyne wijsheyt bereydet hebst, ^b dat hy heerschen soude ouer de creatuere, die van dy ghemaeckt is,

b Gene. 1.c.28. Psalm. 8.a.7.

3

Dat hy de werelt regeren soude, met heyligheyt ende gherechticheyt, ende met rechten herten richten.

4

^c Gheeft my de wijsheydt, die ^d doorgaens rondtomme dynen throon is, ende en verworpt my niet van dynen kinderen.

c 1.Reg. 3.a.9.

d Of, alweghe,

5

^e Want ick ben dijn knecht, ende dyner maghet sone, een swack mensche, ende van korten leuen, ende te ^f slecht in verstande des rechts ende Wets.

e Psalm. 86.b.16. ende 116.b.16.

f Of, kleyn

6

Ende wanneer daer alschoon een, ⁺ onder den menschen kinderen, volkomen ware, so gheldt hy doch niets, so hy sonder de wijsheyt is, die van dy koemt.

+ Siet, de wijsheyt koemt alleen van God, ende sonder haer, en doocht niemant niets.

7

^g Du hebst my verkoren ten Koninck ouer dijn volck, ende ten Richter ouer dyne sonen ende dochteren.

g 1.Parali. 28.a.5. 2.Paral. 1.a.9.

8

Ende heetest my eenen Tempel bouwen, op dynen heylighen berghe, ende eenen Altaer inder stadt dyner wooninghe, die daer ghelijck ware, der heylighen Hutten, welcke du in voortijden bereyden lietest.

9

Ende met dy dyne wijsheyt, die dyne wercken weet: ^h ende daerby was, doe du de wereldt makedest, ende bekennet, wat dy wel behaecht, ende wat recht is in dynen gheboden.

h Prouer. 8.c.22. Ioan. 1.a.1. Gene. 1. 1.Ioan. 1.a.1. Coloss. 1.b.15.

B.10

Sendtse nederwaert van dynen heylighen Hemel, ende wt den throon dyner heerlickheyt: sendtse herwaert, dat sy by my zy, ende met my zy, ende met my arbeyde: op dat ick bekenne, wat dy wel behaghet.

11

Want sy weet alle dinck, ende verstaet het: ende laetse my matichlick leyden in mynen wercken, ende my behoeden door hare heerlickheyt.

12

So sullen dy myne wercken aengename zijn, ende sal dijn volck recht richten, ende weerdich zijn des throons mijns vaders.

13

ⁱ Want welcker mensche weet Gods raedt? oft wie kan dencken wat God wil?

i Sonder Gods woort en kan de mensche niet weten, wat Gode behaecht, maer doet alle dinck henen, in twijffel, ende op het ongewisse. Iesaie. 40.b.13. Roma. 11.d.34. 1.Corint. 2.b.16. Syrach. 1.a.3. 4.Esdr. 4.c.21.

14

Want der sterffelicken menschen gedachten, zijn misselick, ende onse aenslaghen zijn vaerlick.

15

Want het sterffelicke lichaem beswaert de ziele, ende de aerdsche hutte, onderdrucket den ^k verstroyden sin.

k Sonder Gods woort, dichtet ende soect het vernuft vele wijsen ende wegen, verstroyt hemseluen also in vele moeyte, ende en treffet doch niet.

16

^l Wy en bekennen dat nauwelick, dat op Aerden is, ende beuinden swaerlicken, dat ons onder den handen is, wie wil dan ^m doorgronden dat inden Hemel is.

l 1.Corin. 2.b.14.

m doorpluysteren,

17

Wie wil dynen raet onderuinden? ten zy dan dat du wijsheyt gheuest, ende sendest dynen heylighen Gheest wt der hoochde.

[fol. 27v]

18

Ende also het doen op der Aerden recht werde, ende de menschen leeren, wat dy wel behaghet,

19

Ende door de wijsheyt salich worden.