Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vj. Capittel.

Uermaninghe tot de Regeerders ende Ouerste, dat sy op de wijsheyt acht hebben. Oock van lof ende nut der wijsheyt.

A.1

SO hoort nu, ⁺ ghy Koninghen, ende mercket,

+ Een vermaninghe aen de Regenten, dat sy de rechtueerdicheyt ende wijsheyt, voor oogen hebben. Eccles. 9.b.13.

2

leert ghy Richters op Aerden.

3

Neemt te ooren, die ghy ouer vele heerschet, die ghy v verheft ouer den volcken.

4

^a Want v is de ouericheyt, ghegeuen vanden Heere, ende het ghewelt vanden Allerhoochsten, welcke vraghen sal, hoe ghy handelt, ende doorgrondet, wat ghy oordeelt.

a Roma. 13.a.1.

5

Want ghy zijt zijns Rijcks Amptlieden: doch ghy en voert uwe ampt niet fijn, ende en houdet gheen recht, ende en doet niet na dien, dat de Heere gheordineert heeft.

6

Hy sal gantsch grouwelicken, ende in korten ouer v komen, ende daer sal een gantsch scherp gherichte, ouer de Ouerheeren gaen.

7

^b Want den ^c slechten ^d geschiet genade, doch de Gheweldighe, sullen gheweldichlicken ghestraffet worden.

b Syra. 10.b.13.

c Of, verachteden etc. 1.Pet. 1.a.5.

d wederuaret, beieghenet, ontmoetet,

8

^e Want die, die daer aller Heere is, en sal gheenen persoone vreesen, noch de macht schuwen: hy heeft beyde de kleyne ende groote ghemaeckt, ende sorghet voor alle ghelijck.

e Deuter. 10.b.17. 2.Corin. 19.a.7. Iob 34.b.19. Roma. 2.b.11. Syrac. 35.c.22. Act. 10.d.34. Gala. 3.a.6. Ephe. 6.a.9. Coloss. 3.c.25. 1.Pet. 5.b.17.

9

Ouer de Machtighen nu, sal een sterck gherichte ghehouden worden.

B.10

Met v tyrannen, spreke ick, op dat ghy wijs-

[fol. 26v]

heyt leeret, ende dat het v niet en feyle.

11

Want wie heylighe leere, heylichlicken behoudt, die wort heylich ghehouden, ende wie de selue wel leert, die sal wel bestaen.

12

So latet v nu myne reden wel gheuallen, begheertse, ende latet v leeren.

13

Want de wijsheyt is schoone, ⁺ ende onuerganckelick, ende laet haer gheerne sien van dien, diese lief hebben, ende ^f laet haer vinden van dien, diese soecken.

+ Lof der wijsheyt.

f Prouer. 8.b.17. Matth. 7.a.7.

14

Ia sy beieghent, ende gheeft haer selues te bekennen, dien, diese gheerne hebben.

15

Wiese gheerne ^g gheringhe hadde, die en behoeft niet vele moeyte, hy vindtse voor zijn deure op hem ^h waernemende.

g drade, haest

h Of, wachtende

16

Want na haer ^i† pooghen, dat is de rechte kloeckheyt, ende wie na haer wacker is, die en derf niet langhe sorghen.

i† And. trachten

17

Want sy gaet rondtomme, ende soeckt wie harer weerdt zy, ende verschijnt hem gewillichlicken onderweghen, ende heeft achtinghe op hem, dat sy hem beieghene.

18

Want wie hem geerne laet onderwijsen, daer is ghewislicken der wijsheyt beghinsel.

19

^k Ende wiese achtet, die laet hem gheerne onderwijsen: wie hem gheerne onderwijsen laet, die houdt hare gheboden.

k Prouer. 9.a.9.

C.20

Waermen nu de geboden houdt, daer is ghewislick een heylich leuen: ende wie een heylich leuen voert, die is Gode gantsch na by.

21

Wie nu lust heeft ter wijsheyt, dien maect sy tot eenen heere.

22

^l Willet ghy nu, ghy Tyrannen inden volcke, gheerne Koninghen ende Vorsten zijn,

l Nume. 27.b.18. 2.Sam. 14. b.17. 1.Reg. 3.a.9.

23

so houdet de wijsheyt in eeren, op dat ghy eewichlick heerschet.

24

Wat nu de wijsheydt is, ende van waer sy koemt, dat wil ick v verkondighen, ende en wil v de heymelickheyt niet verbergen, maer doorgronden van aenbeghinne der creatueren, ende wilse openbaer te bekennen gheuen, ende wil der waerheyt niet sparen.

25

Want ick en wil met den verghiftighen nijde niet te doen hebben: want deselue en heeft niets aen der wijsheyt.

26

Wanneer nu der Wijsen vele is, ⁺ dat is der werelt heyl, ende een kloeck Koninck, is des volcks gheluck.

+ Wijse regenten, is der onderdanen gheluck,

27

Daeromme latet v onderwijsen door myne woorden, dat sal v nutte zijn.