Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

Met wat stantuasticheyt de Godsalighe sullen staen teghen die, diese hier verdruckt ende bespot hebben: ende wat angst ende verschrickinge den Godloosen ouerkomen sal, ende wat sy met spaden rouwe seggen sullen. Daerenteghen van de vruechde der geloouigen, wiens bescherminghe God is.

A.1

ALs dan sal de Rechtueerdighe ^a staen met grooter vrijmoedicheyt tegen die, die hem beangstet hebben, ende die synen ^b arbeydt verworpen hebben.

a Matth. 19.c.28. Maleac. 4.a.3.

b Dat is, syne leere en doen.

2

Wanneer deselue dan sulcks sien, sullen sy grouwelicken verschricken voor sulcker salicheyt, dier sy hen niet vorsien en hadden.

3

Ende sullen onder malcanderen spreken met rouwe, ende van angst des gheests suchten, Dat is die, dien wy voortijts voor eenen spot hielden, ^c ende voor een honische bysprake.

c Iesa. 13.a.8.

4

^d Wy sotten hielden zijn leuen voor onsinnich, ende zijn eynde voor een schande.

d Sapient. 3.a.3.

5

Hoe is hy nu gherekent onder de kinderen Gods, ende zijn ^e erue is onder den Heylighen?

e Act. 26.b.18.

6

Daeromme hebben wy des rechten weechs ghefeylt, ^{+ f} ende het licht der gherechticheyt, en heeft ons niet geschenen, ^g ende de Sonne en is ons niet opghegaen.

+ Angst ende weeklage der Godloosen.

f 2.Corint. 4.a.4.

g Maleac. 4.a.2.

7

Wy hebben enckel onrecht ende schadelicke weghen ghegaen, ende hebben bijster onwegen ghewandelt, doch den wech des Heeren en hebben wy niet gheweten.

8

^h Wat helpet ons nu onse prael? wat brenget ons den rijckdom in, met tsamen den hoochmoet?

h Prouer. 10.a.2. ende 11.a.7. Syrach. 5.b.10.

9

ⁱ Het is altemael henenwech gheuaren, ghelijck als een schaduwe, ende als een gheschrey, dat voorby gaet.

i 1.Paral. 29.b.15. Sap. 2.a.5.

B.10

Ghelijck als een ^k schip op de wallen des waters henenwech loopt, welcker men, so het voor by is, niet speuren en kan, noch desseluen wech in der vloet.

k Prouer. 30.b.19

11

^l Ofte ghelijck als een voghel, die door de locht vliecht, daermen synen wech niet na speuren en kan: want hy ruert ende slaet in de lichte locht, drijft ende deylt van malcanderen, met synen sweuenden vleughelen, ende daer na en vindtmen gheen teecken sulcks vlieghens daerinne.

l Prouer. 30.b.19.

12

Ofte ghelijck als wanneer eenen pijl afgheschoten wort, na den ^m merckteecken, ende de van malcanderen ghedeylde locht, in korten weder te samen gaet, datmen synen wech daer door niet speuren en kan.

m Of, witte

13

Also wy oock, na dat wy zijn gheboren gheweest, hebben wy een eynde ghenomen,

14

ende en hebben gheen teecken der deucht bewesen, doch in onser boosheyt zijn wy verteert.

15

ⁿ Want des Godloosen hope, is ghelijck als stof vanden winde verstroyt, ende als dunnen rijm van eenen storm verdreuen, ende als eenen roock vanden winde verwaeyt, ende gelijck als men eenes vergheet, die slechs eenen dach een gast gheweest is.

n Hiob. 8.b.13.14. Psalm. 1.a.4. Prouer. 10.c.28. ende 11.a.7. Iaco. 1.b.10.

16

^o Doch de Rechtueerdighe sullen eewichlick leuen, ^p ende de Heere is haren loon, ^q ende de Allerhoochste ^r sorghet voor haer.

o Psalm. 40.a.5. ende 125.a.1.

p Gene.15.a.1.

q Dat is, hare goet ende rijckdom.

r 2.Pet. 5.a.7.

17

Daeromme sullen sy ontfangen een heerlick Rijcke, ende een schone ^s kroone, van der handt des Heeren: want hy salse met syner rechter hant ^t† beschermen, ende met synen arme verdedighen.

s 4.Esdr. 2.e.43. Apocal. 2.b.10.

t† And. bedecken, ende etc. beschermen [als met een bolwerck]

18

^u Hy sal synen ijuer nemen voor een harnasch, ende sal de creatuere rusten, ter wrake ouer de vyanden.

u Psalm.18.a.8.

19

^x Hy sal de gherechticheyt aentrecken voor eenen kreeft, ende sal het ernstlike gherichte opsetten, voor eenen helm.

x Ephe. 6.b.17. 1.Thessal. 5.a.8. Iesa. 59.b.17. Iob 29.b.14.

C.20

Hy sal de heerlicheyt nemen tot eenen onuerwinnelicken schildt.

21

Hy sal den strengen toorne wetten ten sweerde: ende de werelt sal met hem wt trecken, ten strijde, teghen de onwijsen.

22

De gheschutten der blixemen, sullen ghelijck toe treffen, ende sullen wt den wolcken, recht als van eenen hardt ghespannen boghe, varen, na het ^y merckteecken.

y Of, wit

23

Ende daer sal dicken haghel vallen, wt den toorne der donderslaghen: so sal oock des Zees water teghen haer rasen, ende de stroomen sullen heftighen tesamen loopen.

24

Ende daer sal hem oock een sterck windt, teghen haer leggen, ende salse, als een draeywint verstroyen, ^* ongherechticheyt verwoestet alle landen, ende een boos leuen, ^z stortet omme de stoelen der gheweldighen.

* Cap. vi. Luth.

z Of, werpet. Prouer. 8.b.16.