Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

Het is beter onuruchtbaer te zijn van kinderen, dan van deuchden. Uanden lof ende nutticheyt der deucht: van schande der Godloosen. Wat eere een eerlick Godsalich ouderdom zy, ende van schandelicke doodt der Godloosen.

A.1

BEter is het, gheene kinderen hebben, so men vroom is: want dat selue brengt eewigen lof: want het wort beyde, by Gode ende den menschen gheroemet.

2

Waer het is, daer neemtmen het aen ten exempel: wiet nu niet en heeft, die wenschet het doch, ende pralet in eewighen kransse, ende behoudt de ouerwinnighe des kuyschen kamps.

3

Doch den vruchtbaren hoop der Godloosen, en is gheen nutte, ende wat wt de hoererije gheplantet wort, dat en sal niet diepe wortelen, noch eenen ghewissen grondt setten.

4

^a Ende oft sy een tijt lanck, aen den scheuten groenen, dewijle sy gantsch los staen, ^b worden sy vanden winde bewoghen, ende van stercken winde wtgheroeyt.

a Iere. 17.a.6. Matth. 7.b. 19.

b Matth. 7.c.27.

5

Ende de ontijdighe tacken worden ghebroken, ende hare vrucht en is gheen nutte, onrijpe te eten, ende nerghens toe deughende:

6

Want de kinderen, die wt oneerlicken byslapen gheboren worden, moeten ghetuyghen van der boosheyt, teghen de Ouderen, wanneermen haer vraecht.

7

^* Maer de Rechtueerdighe, oft hy alschoon al te tijtlick sterft, ^{+ c} so is hy doch inder ruste.

* Cap. iiij. Lut.

+ Een loflick ouderdom is eerlick.

c Sapi. 3.a.3. Iesa. 56. b.14. Apoc. 14.b.13.

8

(Want dat ouderdom is eerlick, niet dat langhe leeft, oft veel Iaren heeft:

9

Kloeckheyt onder den menschen, is het rechte grauwe hayr, ende een onbeuleckt leuen, is het rechte ouderdom.)

B.10

^d Want hy behaecht Gode wel, ende is hem lief, ende wordt wech ghenomen wt den leuen, onder den sondaers.

d Gene. 5.b.14. 2.Reg. 2.b.11. Hebr. 11.a.5. Syr. 44.b.16.

11

Ende wort wech gherucket, op dat de boosheyt zijn verstant niet om en wende, noch de valsche leere syne ziele bedrieghe.

12

Want de boose exempelen verleyden, ende verderuen eenen het goede, ^e ende de toeuerweckende lust, verkeert onschuldighe herten.

e 2.Pet. 2.b.18.

13

Hy is in korten vollenkomen gheworden, ende heeft vele Iaren veruullet.

[fol. 26r]

14

Want zijn ziele behaecht Gode, daeromme snelt hy hem met hem, wt den boosen leuen.

15

Doch de lieden die het sien, en achtens niet, ende en nemens niet ter herten: namelicken, dat de Heylighen Gods, in ghenade ende barmherticheyt zijn, ende dat hy een opsien op syne wtuerkoren heeft.

16

Want de verstoruen Rechtueerdighe, verdoemt den leuendighen Godloosen, ende een die daer ionck is, ende in korten volkomen wort, het langhe leuen des onrechtueerdighen.

17

Sy sien wel des wijsen eynde, maer sy en mercken niet, wat de Heere ouer hem bedencket, ende waeromme hy hem bewaert.

18

Sy sient wel, ende en achtens niet: ^f want de Heere belachtse.

f Psalm. 2.a.4. ende 37.b.15. ende 59.a.9. Prouer. 2.c.26.

19

Ende sullen daer na schendtlicken vallen, ende een smaetheyt zijn onder den dooden eewichlick: ende hy salse onuersiens daerneder stooten, ende salse wt den gronde worpen, dat sy gantschelicken daerneder ligghen: ende sy sullen in angsten zijn, ende hare ghedachtenisse sal verloren zijn.

20

Sy sullen nu komen vertzaecht, met der consciencien harer sonde, ^g ende hare sonden sullen hen onder de ooghen schelden.

g 4.Esd. 16.g.66.