Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

Uanden goeden staet ende gherusticheyt der Godsalighen, al ist dat sy hier verdruckt ende bekommert worden. Daerenteghen wat ongheluck de Godloose ende hare kinderen hebben sullen.

A.1

MAer ^a de rechtueerdighe zielen, zijn in Gods hant, ende gheen quale en roertse aen.

a Deut. 33.a.3.

2

^b Voor den onuerstandighen worden sy aenghesien, als storuen sy, ende haer afscheyden wort voor een pijne gherekent, ⁺

b Sapi. 5.a.4. 1.Cor. 6.a.9. Hebr. 11.d.36.

+ Der rechtueerdighen ende vromen standt.

3

Ende hare henenuaerdt voor een verderf: ^c doch sy zijn in vrede.

c Sapi. 4.a.1. Iesa. 56.b.14.

4

Hoewel sy voor den menschen, vele lijdens hebben, ^d so zijn sy ghewisses hopens, dat sy nemmermeer steruen.

d 1.Pet. 1.b.13. Rom. 8.b.15.18. 2.Cor. 5.a.1.

5

Sy worden een weynich ghegheesselt, doch vele goets sal haer gheschieden: ^e want God versoecktse, ende beuindtse, dat sy syner weerdt zijn.

e Exod. 16.a.2. Deut. 8.a.2.

6

Hy ^f proeftse, ghelijck als gout inden ouen, ende neemtse aen, als eenen vetten offer.

f Sacha. 13.a.9.

7

Ende ter tijdt, wanneer God daerin sien sal, ^g sullen sy heel klaer schijnen, ende daerhenen varen, ghelijck als vlammen door de ^h stoppelen.

g Matth. 13.e.43. 1.Corint. 15.e.41.

h Dat zijn de Heydenen ende Godloosen. Malea. 4.a.1.

8

ⁱ Sy sullen de Heydenen richten, ende heerschen ouer alle volcken, ende de Heere sal eewichlick ouer haer heerschen.

i Matth. 19.c.28. 1.Corinth. 6.a.2.

9

Want die hem vertrouwen, die onderuinden dat hy trouwelick houdt, ende die daer trouwe zijn in der liefde, die en laet hy hem niet nemen: want syne Heyligen zijn in ghenaden ende barmherticheyt, ende heeft een opsien op syne wtuerkoren.

B.10

^k Doch de Godloosen sullen ghestraft worden, ⁺ ghelijck als sy vreesen: want sy en achten des Rechtueerdighen niet, ende wijcken vanden Heere.

k Matth. 25.e.41.46.

+ Der Godloosen standt ende wesen.

11

^l Want wie de wijsheyt ende roede verachtet, die is onsalich, ende haer hope en is niets, ende haer arbeyt is te vergheefs, ende haer doen en is gheen nutte.

l Prouer. 5.c.23. ende 29.a.1.

12

Hare ^m vrouwen zijn dwasen, ende hare kinderen boosachtich: veruloect is, wat van hen gheboren is.

m Lut. Alles wat hier tot den eynde des Cap. toe, van den vrouwen ende kinderen ghesproken wordt, dat salmen verstaen Prophetisch, dat is, van landen ende lieden. Gelijck als de Propheten Babylon, Ierusalem, Israel, een dochter ofte wijf noemen: ende hoererije, Afgoderije, bedde, Kercken, ende Altaren.

13

ⁿ Want salich is de onuruchtbare, die daer onbeuleckt is, die daer onschuldich is, des sondtlicken beddes: deselue salts ghenieten ter tijt, wanneermen de zielen richten sal.

n Iesa. 54.a.1. Luc. 23.c.29. Gala. 4.c.27.

14

^o Desseluen gelijcken een onuruchtbaer man, die niet onrechts met syner hant en doet, noch booses teghen den Heere en dencket, die moet ghegheuen voor synen ghelooue, een sonderlicke gaue, ende een beter deel in den Tempel des Heeren.

o Iesa. 56.a.6.

15

^p Want goeden arbeydt, gheeft heerlicken loon, ^q ende de wortel des verstandes, en veruuylt niet.

p Gala. 6.b.10.

q Wie in Gods woordt wel versocht is, ende veel gheleden heeft, die sal bloeyen ende groenen eewichlick. Psalm. 1.

16

^r Doch de kinderen der Ouerspeelders en gedijen niet, ende het zaet wt eenen onrechtueerdighen bedde, sal verdelcht worden.

r Syrac. 23.d.35.

17

Ende oft sy alschoon langhe leefden, so moeten sy doch eyndtlicken te schanden worden, ende haer ouderdom sal doch ten laetsten, sonder eere zijn.

18

Steruen sy nu ^s haestelick, ^t so en hebben sy doch niets te hopen, noch troost, ter tijdt des gherichts.

s Of, onuersiens

t Prouer. 11.a.7.

19

^u Want de onrechtueerdigen nemen een boos eynde.

u Psalm. 37.b.10.