Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

Iudith singhet den Heere eenen lofsanck. Daerna vergadert dat volck te Ierusalem om den Heere lof ende danck te segghen. Hoe Iudith haer eynde besloot.

A.1

DOe ^a sangk Iudith den Heere dit liedt, ⁺ ende sprack:

a Exod. 15.a.1 Iudic. 5.a.1.

+ Een lofsanc Iudith tot God.

2

Spelet den Heere met Tamborinen, ende klinghet hem met ^b Cimbalen: ^c singhet hem een nieuwe liedt, weest vrolick, ende roepet synen Name aen.

b Psalm. 150.a.5.

c Psalm. 149.a.1. Iesa. 42.b.10.

3

De Heere is het, die de krijghen stueren kan, Heere heet synen Name.

4

Hy strijdet voor zijn volck, dat hy ons ^d wthelpe van alle onse vyanden.

d Of, verlosse.

5

Assur quam vanden geberchte wt den Noorden, met eener grooter macht: ^e syne veelheydt bedeckte de wateren, ende syne peerden bedeckten het landt.

e Iudith 2.b.11. ende 7.b.10.

6

Hy dreychde mijn landt te verbranden, ende myne manschap te verworghen, de kinderen ende maechden wech te voeren.

7

Maer de Heere de Almachtighe God, heeften ghestraffet, ende heeften in eener vrouwen handt ghegheuen.

8

Want gheen man noch eenich krijgheer, heeften ommeghebracht, ende gheen Reuse en heeften aengegrepen: ^f maer Iudith de dochter Merari, heeften nedergeleyt met harer schoonheyt.

f Iudith 8.a.1. ende 10.b.17.

9

^g Want sy leyde hare weduwen kleederen af, ende tooch hare schoone kleederen aen, ter vreuchde den kinderen Israels.

g Iudith 10.a.2.

B.10

Sy bestreeck haer met kostelicken water, ende vlechtede hare hayren, hem te bedrieghen.

11

Hare schoone schoenen verblindeten hem, hare schoonheyt vinck zijn herte, ^h doch sy hieu hem den kop af.

h Iudith. 13.b.10.

12

Dat hen de Perssen ende Meden ontsetteden, voor sulcker koener daedt.

13

Ende der Assyriers heyr ⁱ huylede, doe myne ellendighen voorts quamen, die van dorste versmachtet waren.

i Iudith 14.b.11.

14

De ionghen doorstaken de Assyriers ende sloeghense inder vlucht, als kinderen: sy zijn verdelghet vanden heyre des Heeren mijns Gods.

15

^k Latet ons singen een nieuwe liedt den Heere onsen God.

k Psalm. 149.a.1. Iesa. 42.b.10.

16

Heere God, du bist de machtighe God, die groote daedt doet, ^l ende niemant en kan dy weder staen.

l 2.Hest. 2.a.4.

17

Dy moet alle dinck dienen: ^m want wat du sprekest, dat moet geschieden: wanneer du eenen eenen moet gheefst, dat moet voort gaen, ende dynen woorde en kan niemant wederstant doen.

m Gene. 1.a.3. Psalm. 33.a.9.

18

ⁿ De berghen moeten beuen, ^o ende de rotzsteenen versmelten als was, voor dy.

n Psalm. 18.a.8.

o Iudic. 5.a.4.

19

^p Doch die dy vreesen, dien bewijsestu groote ghenade: want alle het offer ende vette, is vele te ^q slecht voor dy, dan den Heere vreesen, dat is seer groot.

p Malach. 4.a.2.

q Of, verachtet, etc.

C.20

Wee den Heydenen die mijn volck veruolghen: ^r want de Almachtighe Heere richtetse, ende soecktse te huys, ter tijt der wrake.

r Deute. 32.d.35.

21

^s Hy sal haer lijf plaghen, met vyere ende wormen, ende sy sullen bernen ^t ende huylen in eeuwicheyt.

s Iesa. 66.c.24. Marc. 9.e.47.

t Matth. 13.f.50. ende 22.b.13. ende 24.f.51. ende 25.d.30.

22

Na sulcker ouerwinninghe, tooch alle dat volck van Bethulia na Ierusalem, den Heere aen te bidden, ende reynichden hen, ende offerden brandtoffer, ende wat sy gheloeft hadden.

23

Ende Iudith hinck alle wapenen Holofernis op inden Tempel, ende den voorhanck, dien sy van synen bedde ghenomen hadde, ^u dat het den Heere verbannen zijn soude eeuwichlick.

u 2.Sam. 8.a.5.

24

Ende het volck was vrolick te Ierusalem, by

[fol. 25r]

den Heylichdom, met de Iudith, dry maenden lanck, ende hielden den vierdach der ouerwinninghe.

25

Daer na tooch een yeghelick weder na huys, ende Iudith quam oock weder te Bethulia, ende wert hoch geert inden gantschen lande Israels.

26

Ende sy en nam gheenen man weder, na haers eersten man Manasses doot.

27

Ende sy wert gantsch oudt:

28

Ende bleef in haers mans huys, tot dat sy hondert ende vijf Iaer oudt werdt: ^x ende hare maghet Abra, maeckte sy gantsch vrij.

x Exod. 21.a.2. Deute. 15.b.12. Ierem. 34.a.8.

29

Daer na sterf sy tot Bethulia, ende men begroeffe by haren man Manasse: ^y ende het volck droech leedt om haer, seuen daghen lanck: ende alle haer goet deylde sy wt, onder haers mans vrienden.

y Gene. 50.b.10.

D.30

Ende dewijle dat sy leefde, ende daertoe langhe daer na, en dorste niemandt teghen Israel trecken.

31

^z Ende den dach deser ouerwinninghe, wort vanden Hebreeren voor een groote Feest ghehouden, ende van hen gheuiert eeuwichlick.

z 2.Hest. 5.c.22.