Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

Dat volck Holofernis synen Hooftman verloren hebbende, is seer verschrickt, ende gheeft hem ter vlucht. Israel iaecht hen na, ende slaen wat sy ghekrijgen konnen. Andere steden der Israeliten komen hen te hulpe, ende maken eenen grooten slach. Sy versamelen den roof ende louen God.

A.1

DOe nu het krijchsuolck hoorde, dat Holoferni den kop af was, verschrickten sy, ende werden verbijstert, ende en konden gheenen raet houden, wat sy doen souden, ^a so was hen de moet ontuallen.

a 1.Reg. 17.f.51.

2

Ende gauen de vlucht, dat sy den Hebreen ontkomen mochten, diese saghen teghen hen daer voorts trecken.

3

Ende doe de kinderen Israels saghen, dat de vyanden vloden, snelden sy hen na met grooten gheschreye ende trompetten.

4

Dewijle nu der Assyriers ordeninghe, ghebroken was, ende de kinderen Israels in harer ordeninghe toghen, sloeghen sy alle de ghene, die sy afiaghen konden.

5

Ende Osias sandt tot allen steden inden lande Israels, ⁺

+ Osias.

6

Datmen in allen steden op was, ende iaechde den vyanden na, ten lande henenwt.

7

Maer ^b het ouergebleuen volck te Bethulia, viel in der Assyriers legher, plonderden ende voerden henenwech, wat de Assyriers daer ghelaten hadden, ende brachten groot goet daer van.

b 2.Reg. 7.b.16.

8

De andere nu, doe sy weder quamen, brachten sy met hen, alles wat ghene met hen wech gheuoert hadden, aen vee ende anderen goede, ende het gantsche lant wert rijcke van sulcken rooue.

9

Daer na quam Iehoiakim de hooghe Priester, ⁺ van Ierusalem te Bethulia, met allen Priesteren, op dat sy Iudith saghen.

+ Iehoiakim. Iudith 4.a.5.

B.10

Ende sy ghinck ^c henenwt tot hen: doe presen syse altesamen, ende spraken: Du bist de kroone te Ierusalem, du bist de hertenureuchde Israels, du bist een eere des gantschen volcks,

c Of, voorts

11

Dat du sulcke loflicke daedt ghedaen hebst, ende Israel so groote weldaet betooghet hebst, datse God wederomme, ^d wtgheholpen heeft: gheseghenet zystu voor God eewichlick.

d verlosset,

12

Ende alle het volck sprack Amen.

13

Ende doemen nu dertich daghen lanck, den buete wtghedeylet hadde,

14

Gauen sy Iudith kostelick ^e tuych, dat Holofernes ghehadt hadde, aen goude, siluer, kleederen ende edele steenen.

e Of, gereetcshap

15

Ende ^f alleman was vrolick, songhen ende spronghen, beyde ionck ende oudt.

f Of, yeghelick