Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

Dat hooft Holofernis wordt op de mueren gesteken, de stadt heden oueruallen den legher, schenden hem ende maken hem vluchtich. Achior koemt in het getal des volcx Gods.

A.1

DAerna sprack Iudith tot allen volcke: Lieue broeders hoort my, So haest als den dach aenbreect, ^a so hanget den kop ouer de mueren henen wt,

a 1.Sam. 31.b.10. 1.Mach. 7.e.47. 2.Macha. 15.d.35.

2

Ende nemet uwe wapenen, ende vallet alle tesamen henen wt in eenen hoop, ende met grooten gheschreye:

3

So sullen die in der schaerwacht vlieden, ende sullen dan haren heere opwecken ter slachtinghe.

4

Ende wanneer de Hooftlieden tot Holofernes tente komen sullen, ende het lichaem daer sien inden bloede ligghen, so sullen sy verschricken.

5

Ende wanner ghy mercket, dat sy vertzaecht gheworden zijn, ende de vlucht gheuen, so volghet flucx na, want de Heere heeftse onder uwe voeten ghegheuen.

6

Doe nu Achior sach, ⁺ dat de God Israel, gheholpen hadde, verliet hy de Heydensche wijse, ende gheloofde aen God, ende ^b liet hem besnijden: ^c ende is onder Israel gherekent gheworden, hy ende alle zijn nakomelingen tot op desen dach.

+ Achior wordt genomen in het getal des volcx Gods.

b Gene. 17.b.10.

c Iesaie 6.c.25.

7

Ende doe den dach aenbrack, hinghen sy den kop ouer de mueren henenwt, ⁺ ende namen haer gheweyre, ende vielen henenwt in eenen hoop, ende met grooten gheschreye.

+ Holofernes kop wert ouer de mueren wtghesteken.

8

Ende doe sulcx de nederste schaerwacht sach, liepen sy na Holofernes tente.

9

Ende die daerinne waren, richteden een bulderen aen voor syner kamer, daer hy soude van opwaken.

B.10

Want men en dorste niet aenkloppen, oft in des Vorsten te Assyrien kamer gaen.

11

Maer doe de Hooftlieden der Assyriers quamen, seyden sy den Kamerdienaren:

12

^d Gaet daer henenin, ende weckt hem op: want de muysen zijn henenwt gheloopen, wt haren holen, ende zijn koene geworden, dat sy ons nu aengijrpen dorren.

d 1.Sam. 14.b.11.

[fol. 24v]

13

Doe ghinck Bagoa daer henenin, ende tradt voor den voorhanck, ende kloppede met den handen: want hy meynde, hy sliepe by Iudith, ende luysterde oft hy hem verrueren woude.

14

Doe hy nu niets en vernam, hief hy den voorhanck op: doe sach hy het lichaem sonder den kop, in synen bloede op der Aerden ligghen: doe ^e schreyede ende huylede hy luyde, ende verscheurde syne kleederen.

e Iudith. 16.b.14.

15

Ende sach in der kamer Iudith, ende doe hyse niet en vandt, liep hy wt tot den krijchsuolcke, ende sprack:

16

Een eenighe Hebreische vrouwe, heeft het gantsche huys NebucadNezar van Assyrien, tot spotte ende hoone gemaeckt, voor der gantscher werelt: want Holofernes leyt daer doot op der Aerden, ende de kop is hem afghehouwen.

17

Doe dat de Hooftlieden van Assyrien hoorden verscheurden sy hare kleederen, ende verschrickten wtermaten seer,

18

Ende daer werdt een groot moortgheschrey onder hen.