Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

De Hooftman ghebiedt datmense heerlick houde inden gantschen leger, ende gheeft haer vrijheyt, dat sy na haer ghewoonheyt tot haer ghebet gae. Hy bereydt een kostelicke maeltijdt, ende bidt haer daer toe, ende wordt droncken.

A.1

DOe liet hyse brengen in de schatkamer, ⁺ dat sy daer blijuen soude, ende beual, datmense van synen dissche spijsen soude.

+ Holofernes beueelt Iudith eerlick te houden.

2

Maer Iudith antwoorde, ende sprack: ^a Ick en derf noch niet eten van dyner spijse, op dat ick my niet en versondige: maer ick hebbe een weynich met my ghenomen, daer wil ick van eten.

a Gene. 43.d.32. Tob. 1.b.12. Deu. 1.a.8.

3

Doe sprack Holofernes selues: Wanneer dat op is, dat du met dy ghebracht hebst, van waer sullen wy dy dan wat weder beschicken?

4

Iudith antwoordde: Mijn heere, so ghewisselick als du leefst, eer dyne maecht alles dat verteeren sal, so sal God door my wtrichten, wat hy inden sinne heeft: ende doe haer de knechten in ^b het ghemack brengen wouden, als hy beuolen hadde,

b de kamer

5

Bidt sy, datmen haer veroorloefde, des auondes ende morghen henen wt te gaen, ende haer ghebedt te doen tot den Heere.

6

Doe beual Holofernes synen Kamerdienaren, datmense dry daghen lanck, soude vrij wt ende in gaen laten, haer gebet te doen tot God.

7

Ende des auondts ghinck sy henenwt inden dale voor Bethulia, ende wiesch haer in water.

8

Daer na badt sy tot den Heere, den God Israels, dat hy haer geluck gaue, zijn volck te verlossen.

9

Ende ginck weder in de tente, ende hielt haer reyne, ende en att niets voor den auondt.

B.10

Aenden vierden daghe, ⁺ maeckte Holofernes synen naesten Dienaren alleene, een auondtmaeltijt, ende sprack tot Bagoa synen Kamerlinghe: Gaet henen, ende ouerredet de Hebreische vrouwe, dat sy haer niet en weyghere, tot my te komen.

+ Holofernes rechtet een groot auontmael aen.

11

Want het is een schande by den Assyriers, dat sulck een vrouwe, soude onbeslapen van ons komen, ende eenen man ghespot hebben.

12

Doe quam Bagoa tot Iudith, ende sprack: Schoone vrouwe, ghy willet v niet weygeren, tot mynen heere ter eeren te komen, ende met hem eten ende drincken, ende vrolick zijn.

13

Doe sprack Iudith: hoe derf ick het mynen heere ^c ontsegghen?

c Of, weygheren

14

Alles wat hem lief is, dat wil ick van herten gheerne doen, alle mijn leefdaghe.

15

Ende sy stondt op, ende vercierde haer, ende ginck henen in voor hem, ende stont voor hem.

16

Doe qual Holoferni zijn herte, ^d want hy was aenghesteken met vyerigher hitte teghen haer.

d Syrach. 9.a.9. Susan. a.8.

17

Ende sprack tot haer: Settet dy neder, drinckt ende weest vrolick: want du hebst ghenade by my gheuonden.

18

Ende Iudith antwoordde: Ia Heere, ick wil vrolick zijn, want ick ben mijn leefdaghe, so hooch niet gheeert gheworden.

19

Ende sy att ende dranck voor hem, wat hare maecht bereydet hadde.

20

Ende Holofernes was vrolick met haer, ⁺ ende dranck so vele, als hy anders niet en plach te drincken.

+ Holofernes is droncken.