Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 23v]

Dat xj. Capittel.

Holofernes vraecht haer om wat oorzake sy wtghekomen zy, ende het gheualde hem wel, also sy het hem vertelt.

A.1

ENde Holofernes sprack to haer: ⁺ Hebbet eenen goeden moedt, ende en vreest dy niet; want ick hebbe noyt eenen mensche leedt ghedaen, die hem onder den Koninck NebucadNezar, ghegheuen heeft.

+ Iudith spreect met Holofernes.

2

Ende en hadde my dijn volck niet verachtet, so en hadde ick noyt eene spiesse teghen haer opgheheuen.

3

Nu segghet hier, waerom dat du bist van hen gheweken, ende tot my ghekomen?

4

Iudith antwoorde ende sprack: ⁺ Du woudest dyne maecht genadichlicken hooren, salstu doen, als dy dyne maecht seggen sal, so sal dy de Heere gheluck ende ouerwinninghe gheuen.

+ De reden Iudith by den Holofernes.

5

God gheue NebucadNezar gheluck ende heyl, den Koninck des gantschen landts, die dy wtgheschicket heeft, alle onghehoorsamen te straffen: want du kanst hem onderdanich maken, niet alleene de lieden, maer oock alle dieren op den lande.

6

Want dyne vernuft ende wijsheydt is beroemet in der gantscher wereldt, ende ^a alle man weet, dat du de gheweldichste Vorst bist inden gantschen Koninckrijcke, ende dijn goede regiment, wordt oueral ghepresen.

a Of, yeghelick

7

So weten wy oock, ^b wat Achior ghesproken heeft, ende hoe du met hem daer teghen gedaen hebst.

b Iudith. 5.a.5.

8

Want onse God, is so toornich ouer onse sonden, dat hy door syne Propheten heeft verkondighen laten: Hy wille dat volck straffen, om syner sonden wille.

9

Dewijle nu het volck Israels weet, dat sy haren God vertoornt hebben, so zijn sy voor dy verschrocken.

B.10

Daertoe lijden sy grooten hongher, ende moeten van dorste versmachten.

11

Ende hebben als nu voorgenomen, haer vee te slachten, op dat sy desseluen bloedt drincken,

12

Ende het heylighe offer te eten, aen koorne, wijn, ende olye, dat hen God verboden heeft, dat sy het oock niet aenroeren en souden. Daeromme isset ghewisse, dat sy moeten omkomen, dewijle sy sulcx doen.

13

Ende dewijle ick dat weet, ^c ben ick van hen gheuloden, ende de Heere heeft my tot dy ghesonden, dat ick dy sulcks soude aensegghen.

c Iudith. 10.b.11.

14

Want hoewel ick to dy ben ghekomen, so ben ick doch daeromme van God niet afgeuallen, maer wil mynen God noch dienen by dy: ende dyne maget sal henen wt gaen, ende God aenbidden.

15

Die sal my openbaren, wanneer hy hen haren loon gheuen wil voor hare sonde: so wil ick dan komen, ende wilt dy aensegghen, ende dy midden door Ierusalem voeren, dat du alle dat volck Israel hebbest, ghelijck als schapen die gheenen Herder en hebben: ende dy en sal niet een hondt doruen aenbassen:

16

Want dit heeft my God gheopenbaert,

17

Dewijle hy op haer toornich is, ende heeft my herwaerts gesonden, op dat ick het dy aensegghe.

18

Dese reden behaechde Holoferni, ende synen knechten wel: ende sy verwonderden hen harer wijsheyt, ende spraken onder malcanderen:

19

Dier vrouwen ghelijck en is niet op Aerden, van schoonheyt ende wijsheyt.

C.20

Ende Holofernes sprack tot haer: Dat heeft God also gheschicket, dat hy dy herwaerts gesonden heeft, eer dan dat volck in myne handt quame.

21

^d Sal nu dijn God sulcks wtrichten, als du geseyt hebst, so sal hy oock mijn God zijn, ende du salt groot worden by den Koninck NebucadNezar, ende dynen name sal ghepresen worden inden gantschen Koninckrijcke.

d Ruth. 1.b.16.